ଚୋରି ଜିନିଷ ଫେରାଇ ଭାବବିହ୍ୱଳ ହେଲା ଚୋର, ଜାଣିନଥିଲି ଆପଣ ଏତେ ଗରିବ…

ଲକ୍ଷ୍ନୌ: ଉତ୍ତରପ୍ରଦେଶର ବାନ୍ଦାରୁ ଚୋରିର ଏକ ରୋଚକ କାହାଣୀ ସାମ୍ନାକୁ ଆସିଛି । ଯେଉଁଠି ଜଣେ ଚୋର ଏକ ୱେଲ୍ଡିଂ ଦୋକାନରୁ ହଜାରେରୁ ଅଧିକ ଟଙ୍କାର ସାମଗ୍ରୀ ଚୋରି କରିଥିଲା । ଚୋରି ପରେ ପୀଡ଼ିତଙ୍କ ଚିନ୍ତା ଦେଖି ଚୋରର ହୃଦୟ ତରଳି ଯାଇଛି । ଭାବବିହ୍ୱଳ ହୋଇ ଚୋର ଗୋଟି ଗୋଟି କରି ସମସ୍ତ ଚୋରି ସାମଗ୍ରୀ ଫେରାଇ ଦେବା ସହ କ୍ଷମା ମାଗିଛି ।

ଚୋର ଏକ ବସ୍ତା ଓ ଡବାରେ ସମସ୍ତ ଜିନିଷ ପ୍ୟାକ କରି ଭୁଲ୍ କରିଥିବା ଏକ କାଗଜରେ ଲେଖି ଫେରାଇ ଦେଇଛି । ଏହାକୁ ନେଇ ସ୍ଥାନୀୟ ଅଞ୍ଚଳରେ ବେଶ ଚର୍ଚ୍ଚା ହେଉଛି । ସୂଚନା ଅନୁସାରେ, ବିସଣ୍ଡା ଥାନା ଅଞ୍ଚଳର ଚନ୍ଦ୍ରାୟଲ ଗାଁରେ ରୁହନ୍ତି ଦିନେଶ ତିୱାରୀ । ତାଙ୍କର ଆର୍ଥିକ ଅବସ୍ଥା ବେଶ୍ ଖରାପ । କିଛିବର୍ଷ ତଳେ ୪୦ ହଜାର ଟଙ୍କା ଧାର କରି ଘର ତିଆରି କରିଥିଲେ । ସବୁଦିନ ଭଳି ଡିସେମ୍ବର ୨୦ ସକାଳେ ଦୋକାନ ଖୋଲିବାକୁ ପହଞ୍ଚିଥିଲେ ଦିନେଶ । ଆଉ ଦେଖିଥିଲେ ଭଙ୍ଗା ଯାଇଛି ଦୋକାନର ତାଲା, ଚୋରି ହୋଇ ଯାଇଛି ସାମଗ୍ରୀ ।

ଏନେଇ ସେ ଥାନାରେ ଅଭିଯୋଗ କରିଥିଲେ । ୨୨ ଡିସେମ୍ବରରେ ଜଣାପଡ଼ିଥିଲା କି ତାଙ୍କର ଚୋରି ହୋଇଥିବା ଜିନିଷ ଘର ଠାରୁ କିଛି ଦୂରରେ ଖାଲି ସ୍ଥାନରେ ପଡ଼ିଛି । ଚୋର ଦିନେଶଙ୍କ ସାମଗ୍ରୀଙ୍କୁ ଗାଁର ଏକ ଖାଲି ସ୍ଥାନରେ ରଖି ଦେଇଥିଲା । ଫେରାଇଥିବା ସାମଗ୍ରୀ ସହ ଚୋର ଏକ ପେପର ନୋଟ ଦେଇଥିଲା । ଯେଉଁଥିରେ ଲେଖାଥିଲା, ଏହା ଦିନେଶ ତିୱାରୀଙ୍କ ସାମଗ୍ରୀ । ମୁଁ ବାହାର ଲୋକଙ୍କ ଠାରୁ ଆପଣଙ୍କ ବିଷୟରେ ଶୁଣିଲି । ଭୁଲ୍ ଠିକଣା ଯୋଗୁଁ ମୋର ଭୁଲ୍ ହୋଇ ଯାଇଛି ।