ଯଦି ଆପଣ କ୍ରେଡିଟ୍ କାର୍ଡ ବ୍ୟବହାର କରୁଥାନ୍ତି, ତେବେ ସେଥିପାଇଁ ଆସିଛି ଏକ ଜରୁରୀ ଖବର । ଏପ୍ରିଲ ୧ ତାରିଖରୁ ଏହା ଜଡ଼ିତ କିଛି ନିୟମରେ ଗୁରୁତ୍ବପୂର୍ଣ୍ଣ ପରିବର୍ତ୍ତନ ହୋଇପାରେ । ନୂଆ ପ୍ରାବଧାନ ପ୍ରଭାବୀ ହେବା ପରେ ୧୯୬୨ର ପୁରୁଣା ଆୟକର ନିୟମ ବଦଳରେ ଅପଡେଟେଟ୍ ନିୟମ ବ୍ୟବସ୍ଥା ଲାଗୁ କରାଯିବ । ଦେଶରେ ଡିଜିଟାଲ ପେମେଣ୍ଟ ଦ୍ରୁତ ଭାବେ ବଢ଼ିବାରେ ଲାଗିଥିବା ବେଳେ କ୍ରେଡିଟ କାର୍ଡ ଏବେ କେବଳ ମେଟ୍ରୋ ସହରମାନଙ୍କରେ ସୀମିତ ରହିନାହିଁ । ଟିୟର-୨ ଟିୟର-୩ ସହରମାନଙ୍କରେ ମଧ୍ୟ ଲୋକମାନେ ଦୈନନ୍ଦିନ ଖର୍ଚ୍ଚ, ଅନଲାଇନ ଶପିଂ ଓ ବିଲ ପେମେଣ୍ଟ ପାଇଁ ଏହାର ବ୍ୟବହାର କରୁଛନ୍ତି ।
ନିକଟରେ ଇନକମ ଟ୍ୟାକ୍ସ ବିଭାଗ ଡ୍ରାଫ୍ଟ ଇନକମ ଟ୍ୟାକ୍ସ ରୁଲ୍ସ ୨୦୨୬ ଜାରି କରିଛି । ଯଦି ଜଣେ ବ୍ୟକ୍ତି ଏକ ଆର୍ଥିକ ବର୍ଷରେ ୧୦ ଲକ୍ଷରୁ ଅଧିକ କ୍ରେଡିଟ କାର୍ଡ ବିଲ ଅଣ-ନଗଦ ମାଧ୍ୟମ ଯେପରିକି ୟୁପିଆଇ, ବ୍ୟାଙ୍କ ଟ୍ରାନ୍ସଫର ବା ଚେକରେ ପେମେଣ୍ଟ କରନ୍ତି, ତେବେ ବ୍ୟାଙ୍କ ବା କାର୍ଡ ଜାରୀ କରିଥିବା କମ୍ପାନୀ ଏହାର ସୂଚନା ଆୟକର ବିଭାଗକୁ ଦେବ । ପ୍ୟାନ କାର୍ଡ ପାଇଁ ଆବେଦନ କରିବା ସମୟରେ ଏବେ କ୍ରେଡିଟ କାର୍ଡ ଷ୍ଟେଟେମଣ୍ଟକୁ ଆଡ୍ରେସ ପ୍ରମାଣପତ୍ର ଭାବେ ସ୍ବୀକାର କରାଯିବ । ମାତ୍ର ଷ୍ଟେଟମେଣ୍ଟ ୩ ମାସରୁ ପୁରୁଣା ହୋଇନଥିବା ସର୍ତ୍ତ ରହିଛି । ନୂଆ ଡ୍ରାଫ୍ଟ ନିୟମରେ ପେମେଣ୍ଟ ପାଇଁ କ୍ରେଡିଟ କାର୍ଡ, ଡେବିଟ କାର୍ଡ ଓ ନେଟ ବ୍ୟାଙ୍କିଂକୁ ଅଫିସିଆଲ ଇଲେକଟ୍ରୋନିକ ମାଧ୍ୟମ ଭାବେ ମାନ୍ୟତା ଦିଆଯାଇଛି । ଏହାର ଅର୍ଥ ହେଉଛି ଟ୍ୟାକ୍ସ ଜମା କରିବାର ପ୍ରକ୍ରିୟା ଆହୁରି ଅଧିକ ସୁବିଧା ହୋଇଯିବ । କୌଣସି ବ୍ୟାଙ୍କ ଆ ଆର୍ଥିକ ସଂସ୍ଥାକୁ କ୍ରେଡିଟ କାର୍ଡ ଜାରି କରିବା ପୂର୍ବରୁ ଆବେଦକଙ୍କ ପ୍ୟାନ ନେବା ବାଧ୍ୟତାମୂଳକ ହେବ । ବିନା ପ୍ୟାନରେ ନୂଆ କ୍ରେଡିଟ କାର୍ଡ ଜାରି କରାଯିବ ନାହିଁ । ଯଦି କୌଣସି କର୍ମଚାରୀଙ୍କୁ କମ୍ପାନୀ ପକ୍ଷରୁ କ୍ରେଡିଟ କାର୍ଡ ଦିଆଯାଇଥିବ ତେବେ ତା’ର ଖର୍ଚ୍ଚ ଯେପରିକି- ବାର୍ଷିକ ଶୁଳ୍କ ବା ସଦସ୍ୟତା ଫିସକୁ କମ୍ପାନୀ ଭରଣା କରିଥାଏ, ତେବେ ତାହାକୁ ପରକ୍ବିଜିଟ ଗ୍ରହଣ କରାଯିବ । ଅର୍ଥାତ ଏହା କର୍ମଚାରୀଙ୍କ ଆୟରେ ଯୋଡ଼ାଯିବ ଓ ତା’ ଉପରେ ଟ୍ୟାକ୍ସ ଲାଗିବ ।
