ସେପ୍ଟେମ୍ବର ୧ରୁ ବଦଳିବାକୁ ଯାଉଛି ଏହି ସବୁ ନିୟମ, ଆପଣଙ୍କ ପକେଟରେ ପଡ଼ିବ ପ୍ରଭାବ

ନୂଆଦିଲ୍ଲୀ: ଆସନ୍ତା ମାସ ଅର୍ଥାତ ସେପ୍ଟେମ୍ବର ମାସରୁ ଅନେକ ବଡ ପରିବର୍ତ୍ତନ ଘଟିବାକୁ ଯାଉଛି। ଆଉ ଏହି ପରିବର୍ତ୍ତନ ସିଧାସଳଖ ଆପଣଙ୍କ ପକେଟକୁ ପ୍ରଭାବିତ କରିବ। ଏହି ପରିବର୍ତ୍ତନ ସାଧାରଣଠୁ ବିଶେଷ ସମସ୍ତ ବ୍ୟକ୍ତିଙ୍କୁ ପ୍ରଭାବିତ କରିବ। ଏହି ପରିବର୍ତ୍ତନ ଆପଣଙ୍କ ସେଭି ଆକାଉଣ୍ଟରେ ସୁଧଠୁ ଆରମ୍ଭ କରି EPF, ଚେକ କ୍ଲିୟରାନ୍ସ, LPG ନିୟମ, କାର୍ ଚାଳନା, ଆମାଜନ, ଗୁଗୁଲ୍, ଗୁଗୁଲ୍ ଡ୍ରାଇଭ୍ ପରି ସେବା ଉପରେ ଘଟିବାକୁ ଯାଉଛି।

୧) PF ନିୟମରେ ପରିବର୍ତ୍ତନ: 

ଚାକିରୀ କରୁଥିବା ଲୋକଙ୍କ ପାଇଁ ଏକ ବଡ଼ ଖବର, ଆସନ୍ତା ସେପ୍ଟେମ୍ବର 1 ରୁ, ଯଦି ଆପଣଙ୍କର ୟୁନିଭର୍ସାଲ୍ ଆକାଉଣ୍ଟ୍ ନମ୍ବର (UAN) ଆପଣଙ୍କର ଆଧାର କାର୍ଡ ସହିତ ଲିଙ୍କ୍ ହୋଇନାହିଁ, ତେବେ ଆପଣଙ୍କର ନିଯୁକ୍ତିଦାତା ଆପଣଙ୍କର ପ୍ରୋଭିଡେଣ୍ଟ୍ ପାଣ୍ଠି (PF) ଆକାଉଣ୍ଟକୁ ପୈଠ କରିବାକୁ ସମର୍ଥ ହେବେ ନାହିଁ। କର୍ମଚାରୀଙ୍କ ପ୍ରୋଭିଡେଣ୍ଟ ଫଣ୍ଡ ସଂଗଠନ (ଇପିଏଫଏ) ଇପିଏଫ ଆକାଉଣ୍ଟଧାରୀମାନଙ୍କୁ ସେପ୍ଟେମ୍ବର ୧, ୨୦୨୧ ପୂର୍ବରୁ ଆଧାରକୁ UAN ନମ୍ବର ସହିତ ଲିଙ୍କ କରିବାକୁ କହିଛି।

୨) ଚେକ୍ କ୍ଲିଅର୍ ସିଷ୍ଟମରେ ପରିବର୍ତ୍ତନ: 

ଯଦି ଆପଣ ଚେକ୍ ଦ୍ୱାରା ଟଙ୍କା ପଠାଉଛନ୍ତି? କିମ୍ବା ଚେକ୍ ପେମେଣ୍ଟ କରନ୍ତି, ତେବେ ଆପଣଙ୍କ ପାଇଁ ଏହି ଖବର। ସେପ୍ଟେମ୍ବର ୧ ରୁ ୫୦ ହଜାରରୁ ଅଧିକ ଚେକ୍ ପ୍ରଦାନ କରିବା ଆପଣଙ୍କ ପାଇଁ କଷ୍ଟକର ହୋଇପାରେ। ଆଉ ଏହାର କାରଣ ହେଉଛି ବ୍ୟାଙ୍କଗୁଡ଼ିକ ବର୍ତ୍ତମାନ ସକରାତ୍ମକ ବେତନ ବ୍ୟବସ୍ଥା ବା ପଜିଟିଭ ପେ ସିଷ୍ଟମ୍(PPS) ଲାଗୁ କରିବା ଆରମ୍ଭ କରିଛନ୍ତି। ଅଧିକାଂଶ ବ୍ୟାଙ୍କ ୧ ସେପ୍ଟେମ୍ବରରୁ ପିପିଏସ୍ ଲାଗୁ କରିବାକୁ ଯାଉଛନ୍ତି।

୩) PNB ର ସଞ୍ଚୟ ଆକାଉଣ୍ଟରେ ସୁଧ ହ୍ରାସ ହେବ:  

ପଞ୍ଜାବ ନ୍ୟାସନାଲ ବ୍ୟାଙ୍କ (ପିଏନବି) ର ଗ୍ରାହକ ଆସନ୍ତା ମାସରୁ ଏକ ବଡ ଜଟକା ଲାଗିବ। କାରଣ ପଞ୍ଜାବ ନ୍ୟାସନାଲ ବ୍ୟାଙ୍କ ସେପ୍ଟେମ୍ବର ୧ରୁ ସେଭିଂ ଆକାଉଣ୍ଟ ଜମା ଉପରେ ସୁଧ ହାର ହ୍ରାସ କରିବାକୁ ଯାଉଛି। ଏହି ସୂଚନା ବ୍ୟାଙ୍କର ଅଫିସିଆଲ୍ ୱେବସାଇଟରେ ଦିଆଯାଇଛି। ସଞ୍ଚୟ ଆକାଉଣ୍ଟରେ ସୁଧ ହାର ବାର୍ଷିକ ୩ ପ୍ରତିଶତରୁ ୨.୯୦ ପ୍ରତିଶତକୁ ହ୍ରାସ କରିବାକୁ ବ୍ୟାଙ୍କ ନିଷ୍ପତ୍ତି ନେଇଛି। ବ୍ୟାଙ୍କର ଏହି ନିଷ୍ପତ୍ତି ଉଭୟ ନୂତନ ଏବଂ ପୁରୁଣା ଗ୍ରାହକଙ୍କୁ ପ୍ରଭାବିତ କରିବ।

୪) ବଦଳିଯିବ ଗ୍ୟାସ ସିଲିଣ୍ଡର ପାଇବାର ସମୟ:  

ସେପ୍ଟେମ୍ବର ୧ରୁ ଏଲପିଜି ସିଲିଣ୍ଡରର ମୂଲ୍ୟରେ ପରିବର୍ତ୍ତନ ଆସିବ। ଜଣାଇଦେବାକୁ ଚାହୁଁ ଯେ ପ୍ରତ୍ୟେକ ମାସର ପ୍ରଥମ ଦିନରେ ଘରୋଇ ଏଲପିଜି ଏବଂ ବାଣିଜ୍ୟିକ ସିଲିଣ୍ଡରର ନୂତନ ମୂଲ୍ୟ ସ୍ଥିର କରାଯାଏ। ତେବେ ଆସନ୍ତା ମାସରୁ ମୂଲ୍ୟ ବଢ଼ିବା ସହ, କିଛି ଗ୍ୟାସ ଏଜେନ୍ସି ସେମାନଙ୍କର ସିଲିଣ୍ଡର ବିତରଣର ସମୟ ବଦଳିବାକୁ ଯାଉଛନ୍ତି।

୫) କାର ବୀମା ନିୟମ ପରିବର୍ତ୍ତନ ହେବ:

ଏକ ଗୁରୁତ୍ୱପୂର୍ଣ୍ଣ ଆଦେଶ ଦେଇ, ମାଡ୍ରାସ ହାଇକୋର୍ଟ କହିଛନ୍ତି ଯେ ସେପ୍ଟେମ୍ବର ୧ରୁ ଯେତେବେଳେ ବି ଏକ ନୂତନ ଗାଡି ବିକ୍ରି ହେବ, ସେତେବେଳେ ଏହାର ବମ୍ପର-ଟୁ-ବମ୍ପର ବୀମା ବାଧ୍ୟତାମୂଳକ ହେବ। ଏହି ବୀମା୫ ବର୍ଷ ପାଇଁ ଡ୍ରାଇଭର, ଯାତ୍ରୀ ଏବଂ ଗାଡିର ମାଲିକଙ୍କୁ ଅନ୍ତର୍ଭୁକ୍ତ କରୁଥିବା ବୀମା ସହିତ ରହିବ। ତେବେ ଏହି ବମ୍ପର-ଟୁ-ବମ୍ପର ଇନସୁରାନ୍ସରେ, ଗାଡିର ସେହି ଅଂଶଗୁଡିକ ମଧ୍ୟ ଅନ୍ତର୍ଭୁକ୍ତ ହେବ ଯେଉଁଗୁଡ଼ିକ ବୀମା କମ୍ପାନୀଗୁଡ଼ିକ ସାଦାରଣତଃ ବୀମାଭୁକ୍ତ କରନ୍ତି ନାହିଁ।

୬) OTT ପ୍ଲାଟଫର୍ମରେ ସଦସ୍ୟତା କିଣିବା ମହଙ୍ଗା ହେବ:

ଭାରତର OTT ପ୍ଲାଟଫର୍ମ ଡିଜନି ପ୍ଲସ୍ ହଟଷ୍ଟାରର ସବସ୍କ୍ରିପଶନ୍ ସେପ୍ଟେମ୍ବର ୧ରୁ, ୨୦୨୧ରୁ ମହଙ୍ଗା ହୋଇଯିବ। ଏହା ପରେ ଉପଭୋକ୍ତାମାନଙ୍କୁ ବେସ ପ୍ଲାନ ପାଇଁ 399 ଟଙ୍କା ବଦଳରେ 499 ଟଙ୍କା ଦେବାକୁ ପଡିବ। ଅର୍ଥାତ, ଉପଭୋକ୍ତାମାନଙ୍କୁ ଆହୁରି 100 ଟଙ୍କା ଅଧିକ ଦେବାକୁ ପଡିବ। ଏହା ବ୍ୟତୀତ ଉପଭୋକ୍ତାମାନେ 899 ଟଙ୍କା ଦେଇ ଦୁଇଟି ଫୋନରେ ଆପ୍ ଚଳାଇପାରିବେ। ଏହି ସବସ୍କ୍ରିପଶନରେ HD କ୍ୱାଲିଟି ଉପଲବ୍ଧ । ଏହା ବ୍ୟତୀତ, ଆପଣ ୧୪୯୯ ଟଙ୍କାରେ ୪ ଟି ସ୍କ୍ରିନରେ ଏହି ଆପ୍ ଚଳାଇପାରିବେ।

୭) ଆମାଜନ ଲଜିଷ୍ଟିକ୍ ମୂଲ୍ୟ ବୃଦ୍ଧି ହେବ:

ଡିଜେଲ ଏବଂ ପେଟ୍ରୋଲର ମୂଲ୍ୟ ବୃଦ୍ଧି ହେତୁ ଆମାଜନ ଲଜିଷ୍ଟିକ୍ ମୂଲ୍ୟ ବଢ଼ାଇପାରେ। ସେପ୍ଟେମ୍ବର ୧, ୨୦୨୧ରୁ ଆମାଜନରୁ ସାମଗ୍ରୀ ଅର୍ଡର କରିବା ମହଙ୍ଗା ହେବ। ଅର୍ଥାତ ୫୦୦ ଗ୍ରାମ ପ୍ୟାକେଜ୍ ପାଇଁ ଆପଣଙ୍କୁ ୫୮ ଟଙ୍କା ଦେବାକୁ ପଡିପାରେ। ଏଥି ସହିତ ଆଞ୍ଚଳିକ ମୂଲ୍ୟ ୩୬.୫୦ ଟଙ୍କା ହେବ।

୮) ଏହିପରି ଆପ୍ସ ଉପରେ ପ୍ରତିବନ୍ଧକ ଲଗାଯିବ:

ଗୁଗୁଲର ନୂଆ ନିୟମ ୧ ସେପ୍ଟେମ୍ବର ୨୦୨୧ରୁ କାର୍ଯ୍ୟକାରୀ ହେଉଛି। ଏହା ଅଧୀନରେ, ନକଲି ବିଷୟବସ୍ତୁକୁ ପ୍ରୋତ୍ସାହିତ କରୁଥିବା ଆପ୍ ସେପ୍ଟେମ୍ବର ୧ ରୁ ବ୍ୟାନ୍ ହେବ। ଏହା ବ୍ୟତୀତ ଗୁଗୁଲ ଏହାର ବ୍ଲଗ୍ ପୋଷ୍ଟରେ କହିଛି ଯେ ଆପ୍ ଡେଭଲପର୍ମାନଙ୍କ ଦ୍ୱାରା ଦୀର୍ଘ ଦିନ ଧରି ବ୍ୟବହୃତ ହୋଇନଥିବା ଆପ୍ ଗୁଡିକ ମଧ୍ୟ ବ୍ୟାନ୍ କରାଯିବ। ଗୁଗୁଲ୍ ପ୍ଲେ ଷ୍ଟୋର୍‌ର ନିୟମ ପୂର୍ବ ଅପେକ୍ଷା ଅଧିକ କଠୋର କରାଯାଉଛି। ଏଥି ସହିତ, ଗୁଗୁଲ୍ ଡ୍ରାଇଭ୍ ବ୍ୟବହାରକାରୀମାନେ ସେପ୍ଟେମ୍ବର ୧୩ରେ ଏକ ନୂଆ ସିକ୍ୟୋରିଟି ଅପଡେଟ ମିଳିବ। ଯାହା ପରେ ଆପଣଙ୍କ ଡାଟା ପୂର୍ବ ଅପେକ୍ଷା ଅଧିକ ସୁରକ୍ଷିତ ରହିବ।