ପ୍ରବାସୀଙ୍କୁ ଦୁର୍ବ୍ୟବହାର ଘଟଣାର ହେବ ତଦନ୍ତ: ମନ୍ତ୍ରୀ ପ୍ରତାପ ଜେନା
ଭୁବନେଶ୍ୱର: ପ୍ରବାସୀ ଓଡ଼ିଆ ଶ୍ରମିକଙ୍କୁ ବାଲିଆପାଳ ବ୍ଳକ୍ ଉନ୍ନୟନ ଅଧିକାରୀ (ବିଡିଓ) ଦୁର୍ବ୍ୟବହାର କରିଥିବା ଅଭିଯୋଗ ଘଟଣା । ରାଜ୍ୟ ସରକାରଙ୍କ ପକ୍ଷରୁ ଘଟଣାର ତଦନ୍ତ ନିର୍ଦ୍ଦେଶ । ଏ ନେଇ ସୂଚନା ଦେଇଛନ୍ତି ପଞ୍ଚାୟତିରାଜ ମନ୍ତ୍ରୀ ପ୍ରତାପ ଜେନା । ଗୁରୁବାର ଗଣମାଧ୍ୟମ ପ୍ରତିନିଧିଙ୍କୁ ସୂଚନା ଦେଇ ସେ ଆହୁରି କହିଛନ୍ତି ଯେ, ଘଟଣା ନେଇ ବାଲେଶ୍ୱର ଜିଲ୍ଲାପାଳଙ୍କ ଠାରୁ ରିପୋର୍ଟ ମଗାଯାଇଛି ।
ଘଟଣା ନେଇ ରାଜ୍ୟ ସରକାର ଅବଗତ ଅଛନ୍ତି । ଜିଲ୍ଲାପାଳଙ୍କ ରିପୋର୍ଟ ଆଧାରରେ ଆକ୍ସନ ନିଆଯିବ । ଏଭଳି ବ୍ୟବହାର ସମ୍ପୂର୍ଣ୍ଣ ଅନୁଚିତ । ବର୍ତ୍ତମାନର ବିପତ୍ତି ସମୟରେ ବହୁ କରୋନା ଯୋଦ୍ଧା ଅତ୍ୟନ୍ତ ନିଷ୍ଠାର ସହ ସେମାନଙ୍କ କର୍ତ୍ତବ୍ୟ ପାଳନ କରୁଛନ୍ତି । ସେମାନଙ୍କ ପ୍ରଶଂସା ପାଇଁ ଯେ କୌଣସି ରାଶି ଖୁବ୍ କମ୍ ।
ବାଲିଆପାଳ ବିଡିଓ ଛବିରାଣୀ ସାହୁ କଥିତ ଭାବେ ପ୍ରବାସୀ ଓଡ଼ିଆ ଶ୍ରମିକଙ୍କ ଦୁର୍ବ୍ୟବହାର କରିଛନ୍ତି । ସେମାନେ ପାଣି ମାଗିଥିଲେ । ଯାହା ସୋସିଆଲ ମିଡିଆରେ ଖୁବ୍ ଭାଇରଲ ହୋଇଛି । ବୁଧବାର ଗୁଜରାଟରୁ ଏକ ବସ୍ରେ କେତେକ ପ୍ରବାସୀ ବାଲେଶ୍ୱର ଜିଲ୍ଲାକୁ ଆସିଥିଲେ । ପରେ ସେମାନେ କ୍ୱାରେଣ୍ଟାଇନ୍ ବା ଘରକୁ ଯିବା ପାଇଁ ବିଡିଓଙ୍କୁ ଅନୁରୋଧ କରିବାକୁ ଯାଇଥିଲେ ହେଲେ ବିଡ଼ିଓ ତାଙ୍କୁ ଦେଖା କରିନଥିବା ଅଭିଯୋଗ ହୋଇଥିଲା । ପ୍ରାୟ ୨ ଘଣ୍ଟାରୁ ଅଧିକ ସମୟ ଅଖିଆ ପିଆ ବ୍ଳକ୍ ସମ୍ମୁଖରେ ଠିଆ ହୋଇଥିଲେ । ଶୋଷ ହେବାରେ ସେମାନେ ପାଣି ମାଗିଥିଲେ । ଏକଥା ଶୁଣି ବିଡିଓ ଛବିଣାଣୀ କୁଆଡ଼େ ରାଗି ଯାଇଥିଲେ । ଆଉ ପ୍ରବାସୀଙ୍କ ପ୍ରତି କଟୁ ମନ୍ତବ୍ୟ ଦେଇଥିଲେ ।
