ନନ୍ଦିଘୋଷ ବ୍ୟୁରୋ: ଇସ୍ରାଏଲ ଓ ହମାସ ଯୁଦ୍ଧରେ ଲାଗିବ ସାମୟିକ ବ୍ରେକ୍। ଗାଜାରେ ତୁରନ୍ତ ଅସ୍ତ୍ରବିରତି ଲାଗୁ ପାଇଁ କହିଲା ଜାତିସଂଘ ସୁରକ୍ଷା ପରିଷଦ। ବର୍ତ୍ତମାନ ଇସଲାମର ପବିତ୍ର ମାସ ରମଜାନ ଚାଲିଛି। ତେଣୁ ତୁରନ୍ତ ଗାଜା ସହରରେ ଅସ୍ତ୍ରବିରତି ଲାଗୁ କରିବାକୁ ଜାତିସଂଘ ସୁରକ୍ଷା ପରିଷଦରେ ପ୍ରସ୍ତାବ ଆସିଥିଲା। ଯୁଦ୍ଧର ଦୀର୍ଘ ୫ ମାସ ପରେ ଜାତିସଂଘ ସୁରକ୍ଷା ପରିଷଦ ଯୁଦ୍ଧବିରତି ପାଇଁ ଦାବି କରିଛି। ତେବେ ଏହା ଉପରେ ଆସିଥିବା ପ୍ରସ୍ତାବରୁ ଇସ୍ରାଏଲର ଘନିଷ୍ଠ ସହଯୋଗୀ ଆମେରିକା ଦୂରେଇ ରହିଛି। ଏହି ପ୍ରସ୍ତାବ ସପକ୍ଷରେ ୧୪ ରାଷ୍ଟ୍ର ଭୋଟ ଦେଇଛନ୍ତି। ଅସ୍ତ୍ରବିରତି ଲାଗୁ କରାଯିବା ସହ ହମାସ ଓ ଅନ୍ୟ ଆତଙ୍କବାଦୀମାନେ ଅକ୍ଟୋବର ୭ରୁ ପଣବନ୍ଦୀ କରି ରଖିଥିବା ଇସ୍ରାଏଲ ନାଗରିକଙ୍କୁ ଛାଡ଼ି ଦେବାକୁ ମଧ୍ୟ ଜାତିସଂଘ ସୁରକ୍ଷା ପରିଷଦ ଦାବି କରିଛି।
