ପଜିଟିଭ୍ ସଂଖ୍ୟାକୁ ନେଇ ବିବ୍ରତ ହେବାର କୈାଣସି କାରଣ ନାହିଁ: ସଞ୍ଜୟ ସିଂହ
ଭୁବନେଶ୍ୱର: ଲକଡାଉନ୍କୁ ନେଇ କାଉଣ୍ଟଡାଉନ୍ ଆରମ୍ଭ ହୋଇଯାଇଥିବା ବେଳେ ଆଜି ଗୋଟିଏ ଦିନରେ ଯାଜପୁରରୁ ଚିହ୍ନଟ ହୋଇଛନ୍ତି ୧୭ଜଣ କରୋନା ପଜିଟିଭ । ଯାହା ସାରା ରାଜ୍ୟବାସୀଙ୍କ ଚିନ୍ତା ବଢାଇ ଦେଇଛି। ଆଜି ସକାଳେ ୩ ଓ ଅପରାହ୍ନରେ ୧୪ଜଣ ଚିହ୍ନଟ ହୋଇଛନ୍ତି। ଯାଜପୁରରେ ପଜିଟିଭଙ୍କ ସଂଖ୍ୟା ୩୬କୁ ବୃଦ୍ଧି ପାଇବା ସହ ସଂକ୍ରମଣ ତାଲିକାରେ ରାଜ୍ୟର ଏକ ନମ୍ବର ପାଲଟିଛି ଯାଜପୁର। ଆଜି ଚିହ୍ନଟ ସମସ୍ତ ୧୭ଜଣ ପଜିଟିଭଙ୍କ ମଧ୍ୟରୁ ୧୬ଜଣ ଦଶରଥପୁର କଟିକଟା ଅଂଚଳର । ପୂର୍ବରୁ ଏହି ଅଂଚଳରୁ 6ଜଣ ପଜିଟିଭ ଚିହ୍ନଟ ହୋଇଥିଲେ । ସମସ୍ତଙ୍କର କୋଲକତା ଲିଙ୍କ୍ ରହିଛି କିମ୍ବା କୋଲକତା ଫେରନ୍ତା ସଂକ୍ରମିତଙ୍କ ସଂସ୍ପର୍ଶରେ ଆସିଛନ୍ତି । ଏହି ଅଂଚଳକୁ ପୂର୍ବରୁ କଣ୍ଟନମେଣ୍ଟ କରାଯାଇଥିଲା। ଏହି ଅଞ୍ଚଳରେ ରହିଛନ୍ତି ୨୬୯ଟି ପରିବାର । ବର୍ତ୍ତମାନ ସୁଦ୍ଧା ଏହି ଅଞ୍ଚଳରୁ ୨୦୦ ଜଣଙ୍କ ନମୂନା ପରୀକ୍ଷଣ କରାଯାଇଛି । ଗୁରୁବାର ଚିହ୍ନଟ ହୋଇଥିବା ୧୪ ନୂଆ ପଜିଟିଭଙ୍କ ଭିତରେ ୫ଜଣ ମହିଳା, ୭ ଜଣ ପୁରୁଷ ଏହଂ ୨ଜଣ ତିନି ବର୍ଷର ଶିଶୁ ଅଛନ୍ତି । ଚିହ୍ନଟ ହୋଇଥିବା ସମସ୍ତେ ହୋମ କ୍ୱାରେଣ୍ଟାଇନ୍ରେ ରହିଥିଲେ ଏବଂ ସେମାନଙ୍କର କୌଣସି ଲକ୍ଷଣ ନଥିଲା । ସେମାନଙ୍କ ସଂସ୍ପର୍ଶରେ ଆସିଥିବା ଲୋକଙ୍କୁ ଏବେ ଜିଲ୍ଲା ପ୍ରଶାସନ ଟ୍ରାକ କରୁଛି ।
ବଢୁଥିବା ପଜିଟିଭ୍ ସଂଖ୍ୟାକୁ ନେଇ ଛାନିଆ ବା ବିବ୍ରତ ହେବାର କୈାଣସି କାରଣ ନାହିଁ । ସରକାର ସରପଞ୍ଚଙ୍କୁ ଦାୟିତ୍ୱ ଦେଇଛନ୍ତି । ସେମାନେ ସରକାରଙ୍କ ନିର୍ଦ୍ଦେଶ ଅନୁଯାୟୀ ବାହାରୁ ଆସୁଥିବା ସମସ୍ତଙ୍କୁ କ୍ୱାରେଣ୍ଟାଇନ୍ରେ ରଖିବାକୁ ପରାମର୍ଶ ଦେଇଛନ୍ତି ସୂଚନା ଓ ଲୋକ ସମ୍ପର୍କ ସଚିବ ସଂଜୟ ସିଂହ । ଏଥିସହିତ ସରକାର ସବୁ ପଞ୍ଚାୟତରେ ରାଜ୍ୟ ବାହାରୁ ଆସୁଥିବା ଲୋକଙ୍କ ପାଇଁ ଅସ୍ଥାୟୀ ମେଡିକାଲ କ୍ୟାମ୍ପ କରିଛନ୍ତି । ଏଥିପ୍ରତି ଦୃଷ୍ଟି ଦେଇ ସରପଞ୍ଚମାନେ ସେମାନଙ୍କ ଦାୟିତ୍ୱ ତୁଲାଇବା ସହ ମାନବିକତା ପ୍ରଦର୍ଶନ କରିବାକୁ ଆହ୍ଵାନ ଦେଇଛନ୍ତି ସରକାର ।
