କାଶୀ ପଣ୍ଡିତ କହି ଟଙ୍କା ମାଗୁଥିଲେ, ଗାଁରୁ ନକଲି ବାବାଙ୍କୁ ତଡ଼ିଲେ ଲୋକେ

ବଲାଙ୍ଗୀର: ଭଣ୍ଡ ବାବାଙ୍କୁ ଗାଁରୁ ତଡ଼ିଲେ ଗ୍ରାମବାସୀ । ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକ ବହଲି ଗାଁରେ ୨ଜଣ ଭଣ୍ଡ ବାବା ନିଜକୁ କାଶୀର ପଣ୍ଡିତ କହି ଘରକୁ ଘର ବୁଲି ବିଭିନ୍ନ ଉପାୟରେ ଟଙ୍କା ମାଗୁଥିଲେ । ଯିଏ ଟଙ୍କା ଦେଉନଥିଲେ ସେମାନଙ୍କୁ ଅଭିଶାପ ଦେଇ ଭୟଭୀତ କରୁଥିଲେ I

ଏହି ଦୁଇ ନକଲି ବାବା ବହୁ ସମୟ ଧରି ଗାଁରେ ଆତଙ୍କ ଖେଳାଇ ଗରିବ ଓ ନୀରିହ ଲୋକଙ୍କୁ ଅଭିଶାପ ଦେଇ ଟଙ୍କା ଲୁଟ କରୁଥିଲେ I ତେବେ ଏହି ବାବାଙ୍କ ଦୌରାତ୍ମ୍ୟ ଦେଖି କିଛି ଶିକ୍ଷିତ ଯୁବକ ବାବାକୁ ବିଭିନ୍ନ ପ୍ରଶ୍ନ ପଚାରିଥିଲେ ।

ଯେମିତିକି ଗାୟତ୍ରୀମନ୍ତ୍ର, ଶିବ ପୂରାଣ, ଭଗବାନଙ୍କ କେତୋଟି ଅବତାର । କିନ୍ତୁ ଭଣ୍ଡ ବାବା କୌଣସି ପ୍ରଶ୍ନର ଉତ୍ତର ନ ଦେଇ କିପରି ସେଠାରୁ ଫେରାର୍ ମାରିବେ ସେନେଇ ବାଟ ଖୋଜିଥିଲେ I ଲୁଟ୍ ଉଦ୍ଦେଶ୍ୟରେ ଗାଁରେ ବାବା ବେଶରେ ପଶିଥିବା କହି ଗାଁରୁ ତଡ଼ିଦେଲେ ଲୋକ ।