ଋଷ ବିରୋଧରେ ଲଢିବା ପାଇଁ ୟୁକ୍ରେନକୁ ଯୁଦ୍ଧାସ୍ତ୍ର ପଠାଇଲା ଆମେରିକା

ନୂଆଦିଲ୍ଲୀ: ୟୁକ୍ରେନ–ଋଷ ମଧ୍ୟରେ ବଢୁଛି ବିବାଦ । ଋଷ ବିରୋଧରେ ଲଢ଼ିବା ଲାଗି ୟୁକ୍ରେନକୁ ଷ୍ଟିଞ୍ଜର କ୍ଷେପଣାସ୍ତ୍ର ଓ ଜାଭେଲିନ ଟ୍ୟାଙ୍କ ବିଧ୍ୱଂସୀ ଅସ୍ତ୍ର ପଠାଇଛି ଆମେରିକା । ଏପରିକି ଅସ୍ତ୍ରଗୁଡିକରେ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ନାଁ ଲେଖାଯାଇଥିବା କୁହାଯାଇଛି । ଆମେରିକା ରାଷ୍ଟ୍ରପତି ଜୋ ବିଡେନଙ୍କ ପ୍ରତ୍ୟେକ୍ଷ ନିର୍ଦ୍ଦେଶ କ୍ରମେ ଏହି ଯୁଦ୍ଧାସ୍ତ୍ର ପଠାଯାଇଛି । ପେଣ୍ଟାଗନ ପକ୍ଷରୁ ପ୍ରେରିତ ଏହି ଅସ୍ତ୍ର ୟୁକ୍ରେନର କିଏଭ ସହରସ୍ଥିତ ଆନ୍ତର୍ଜାତିକ ବିମାନ ବନ୍ଦରରେ ରହିବ । ଏହାସହ ଏକ ଶକ୍ତିଶାଳୀ ଏୟାର ଡିଫେନ୍ସ ସିଷ୍ଟମ ବି ପଠାଯାଇଛି । ପୁଟିନଙ୍କ ବିରୋଧରେ ବ୍ୟକ୍ତିଗତ କଟକଣା ଲଗାଇବାକୁ ମଧ୍ୟ ଆମେରିକା ଧମକ ଦେଇଛି ।

ପୁଟିନ, ତାଙ୍କ ପରିବାରର ବିଭିନ୍ନ ସଦସ୍ୟ ଓ ଗାର୍ଲଫ୍ରେଣ୍ଡ କୁହାଯାଉଥିବା ତଥା ଅଲିମ୍ପିକ ଜିମ୍ନାଷ୍ଟ ଏଲିନା କାବାଏଭାଙ୍କ ଉପରେ ଟ୍ରାଭେଲ ବ୍ୟାନ ନିର୍ଦ୍ଦେଶ ଜାରି କରାଯାଇପାରେ ବୋଲି ସୂଚନା ମିଳିଛି । ଆମେରିକା କଂଗ୍ରେସରେ ଏନେଇ ଏକ ବିଲ୍ ଗୃହୀତ ହୋଇଛି । ଶୀତଳଯୁଦ୍ଧର ଅବସାନ ପରେ ବର୍ତ୍ତମାନ ୟୁକ୍ରେନ ପ୍ରସଙ୍ଗରେ ଆମେରିକା ଓ ଋଷ ମଧ୍ୟରେ ସମ୍ଭାବ୍ୟ ଯୁଦ୍ଧକୁ ନେଇ ଅସ୍ଥିରତା ବଢିବା ଆଶଙ୍କା କରାଯାଉଛି । ଆସନ୍ତା ମାସ ୟୁକ୍ରେନ ଉପରେ ଋଷ ଆକ୍ରମଣ କରିବା ରିପୋର୍ଟ ପ୍ରକାଶ ପାଇବା ପରେ ତତ୍ପର ହୋଇଛନ୍ତି ଆମେରିକା ନେତୃତ୍ୱାଧୀନ ନାଟୋ ବାହିନୀ ।