ମଦ ଉପରୁ ଛାଡ଼ ହେଲା କୋଭିଡ ଟ୍ୟାକ୍ସ, ବଢ଼ିଲା ଏମ୍ଆରପି: ଏଯାଏଁ ମିଳିଛି ୨୦୦ କୋଟିର ରାଜସ୍ୱ
ଭୁବନେଶ୍ୱର: ମଦ ଉପରେ ଲାଗୁ କୋଭିଡ ଶୁଳ୍କ ହ୍ରାସ କରିଛି ଅବକାରୀ ବିଭାଗ । ପୂର୍ବରୁ ୫୦ ପ୍ରତିଶତର କୋଭିଡ ଟ୍ୟାକ୍ସ ଲାଗୁ ହୋଇଥିବା ବେଳେ ଟ୍ୟାକ୍ସକୁ ୧୫ ପ୍ରତିଶତକୁ ହ୍ରାସ କରାଯାଇଛି । ଅର୍ଥାତ ବର୍ତ୍ତମାନ କୋଭିଡ ଟ୍ୟାକ୍ସ ଲାଗୁ ହୋଇଥିବା ଯୋଗୁଁ ଲୋକେ ଯେଉଁ ଦରରେ ମଦ କିଣୁଛନ୍ତି ତାହା ଅପେକ୍ଷା କମ୍ ଦାମ୍ରେ ମଦ କିଣିପାରିବେ ।
ପଡ଼ୋଶୀ ରାଜ୍ୟର ଲାଗୁ ଶୁଳ୍କକୁ ଆଖି ଆଗରେ ରଖି ଅବକାରୀ ବିଭାଗ ପକ୍ଷରୁ ଏଭଳି ନିଷ୍ପତ୍ତି । ପଡ଼ୋଶୀ ରାଜ୍ୟରେ ବର୍ତ୍ତମାନ ମଦ ଦାମ୍ କମ୍ ଥିବାରୁ ଓଡ଼ିଶାକୁ ପଡ଼ୋଶୀ ରାଜ୍ୟରୁ ବିନା କର ଯୁକ୍ତ ମଦ ଆସିବାର ଆଶଙ୍କାକୁ ଏଡ଼ାଇବା ଲାଗି ଏଭଳି ନିଷ୍ପତ୍ତି ନିଆଯାଇଛି । ତେବେ ଏଯାବତ୍ କୋଭିଡ ଶୁଳ୍କ ବାବଦକୁ ରାଜ୍ୟ ରାଜକୋଷକୁ ମିଳିଛି ୨୦୦ କୋଟି । ସୂଚନା ଯୋଗ୍ୟ ଯେ, ମଦ ଦୋକାନ ଆଗରେ ଗହଳି କମାଇବା ପାଇଁ ଓ କରୋନା ମୁକାବିଲା ନେଇ ରାଜସ୍ୱ ଆଦାୟ ନେଇ ୫୦ ପ୍ରତିଶତର କୋଭିଡ ଟ୍ୟାକ୍ସ ଲାଗୁ କରିଥିଲେ ରାଜ୍ୟ ସରକାର ।
ଏମଆରପି ଉପରେ ଲାଗୁ ହୋଇଥିଲା ୫୦ ପ୍ରତିଶତର ଅତିରିକ୍ତ କୋଭିଡ ଟ୍ୟାକ୍ସ । ସେହିଭଳି ଦିଲ୍ଲୀ ଓ ପଞ୍ଜାବ ସମେତ ଅନ୍ୟ ରାଜ୍ୟଗୁଡ଼ିକରେ ମଦ ଉପରେ କୋଭିଡ ଟ୍ୟାକ୍ସ ଲାଗୁକରାଯାଇଥିଲା । ତେବେ ଗୁରୁବାର ଅବକାରୀ ବିଭାଗ ପକ୍ଷରୁ ଏହି କୋଭିଡ ଟ୍ୟାକ୍ସକୁ ଛାଡ଼ କରାଯାଇଛି । ଜୁଲାଇ ୧୦ରୁ ନୂଆ ଏମ୍ଆରପିରେ ବିକ୍ରି ହେବ ମଦ ।
