ଇସ୍ତଫା ଦେଲେ ବ୍ରିଟେନ୍ ପ୍ରଧାନମନ୍ତ୍ରୀ ବୋରିସ୍ ଜନସନ୍

ଲଣ୍ଡନ: ଇସ୍ତଫା ଦେଲେ ବ୍ରିଟେନ୍ ପ୍ରଧାନମନ୍ତ୍ରୀ । ବ୍ରିଟେନରେ ଜାରି ରହିଥିବା ରାଜନୈତିକ ସଙ୍କଟ ମଧ୍ୟରେ ଇସ୍ତଫା ଦେଲେ ବୋରିସ୍ ଜନସନ୍ । ଇସ୍ତଫା ନେଇ ବ୍ରିଟିଶ୍ ଗଣମାଧ୍ୟମରେ ଚର୍ଚ୍ଚା । ମନ୍ତ୍ରୀମଣ୍ଡଳରେ ବିଦ୍ରୋହ ପରେ ଇସ୍ତଫା ଦେଲେ ଜନସନ୍ । ବ୍ରିଟେନ ପ୍ରଧାନମନ୍ତ୍ରୀଙ୍କ ନେତୃତ୍ୱକୁ ବିରୋଧ କରି ଜଣଙ୍କ ପରେ ଜଣେ ମନ୍ତ୍ରୀ ଇସ୍ତଫା ଦେଇଥିଲେ । ଜନସନ୍ ଶାସନ କରିବାକୁ ଅକ୍ଷମ ବୋଲି ତାଙ୍କ ମନ୍ତ୍ରୀମଣ୍ଡଳର ମନ୍ତ୍ରୀମାନେ ଅଭିଯୋଗ କରିଛନ୍ତି ।

ସୂଚନା ଅନୁସାରେ ବୋରିସ୍ ଜନସନ୍ କ୍ରିସ୍ ପିଞ୍ଚରଙ୍କୁ ଉପମୁଖ୍ୟ ସଚେତକ ଭାବେ ନିଯୁକ୍ତି ଦେବା ପରେ ମନ୍ତ୍ରୀମାନେ ବିଦ୍ରୋହ ଆରମ୍ଭ କରିଥିଲେ । ଯୌନ ନିର୍ଯାତନା ଅଭିଯୋଗ ସତ୍ତ୍ୱେ ବୋରିସ ଜନସନ୍ ଉପମୁଖ୍ୟ ସଚେତକ ଭାବେ କ୍ରିସ ପିଞ୍ଚରଙ୍କୁ ନିଯୁକ୍ତି ଦେଇଥିଲେ । ପିଞ୍ଚରଙ୍କ ନିଯୁକ୍ତିକୁ ବିରୋଧୀ ଦଳ ସମେତ ଜନସନଙ୍କ ନିଜ ଦଳର ଅନେକ ସଦସ୍ୟ ଓ ମନ୍ତ୍ରୀ ବିରୋଧ କରିଥିଲେ । ବିରୋଧ ପରେ ପିଞ୍ଚର ଇସ୍ତଫା ଦେଇଥିଲେ ମଧ୍ୟ ଘଟଣା ନେଇ ଡାଉନିଂ ଷ୍ଟ୍ରିଟ  ଆଭିମୁଖ୍ୟକୁ ସମାଲୋଚନା କରାଯାଇଥିଲା । ଯୌନ ନିର୍ଯାତନାର ଅଭିଯୋଗ ସତ୍ତ୍ୱେ ପିଞ୍ଚରଙ୍କୁ କାହିଁକି ପ୍ରଧାନମନ୍ତ୍ରୀ ଜନସନ ଡେପୁଟି ଉପମୁଖ୍ୟ ସଚେତକ ଭାବେ ନିଯୁକ୍ତ କଲେ, ସେ ନେଇ ପ୍ରଶ୍ନ ଉଠିଛି । ଏ ପ୍ରସଙ୍ଗରେ ଜନସନଙ୍କୁ ବିରୋଧ କରି ପ୍ରଥମେ ଅର୍ଥ ମନ୍ତ୍ରୀ ଋଷି ସୁନକ ଓ ସ୍ବାସ୍ଥ୍ୟ ମନ୍ତ୍ରୀ ସାଜିଦ ଜାଭେଦ ଇସ୍ତଫା ଦେଇଥିଲେ । ଏହା ପରେ ଇସ୍ତଫାର ସୁଅ ଆରମ୍ଭ ହୋଇଛି ।