ଭାରତରେ ବଢୁଛି କରୋନା ଆକ୍ରାନ୍ତଙ୍କ ସଂଖ୍ୟା
ଭାରତରେ ଭାଇରସ ଭୟ । ନୂଆଦିଲ୍ଲୀ ଓ ତେଲେଙ୍ଗାନାରେ ୨ କରୋନା ଆକ୍ରାନ୍ତ । ଦୁଇଜଣ ଆକ୍ରାନ୍ତ ନିକଟରେ ବିଦେଶ ଗସ୍ତ କରି ଫେରିଛନ୍ତି । ଦିଲ୍ଲୀର ଆକ୍ରାନ୍ତ ଇଟାଲୀରୁ ଏବଂ ତେଲେଙ୍ଗାନାର ଆକ୍ରାନ୍ତ ଦୁବାଇରୁ ଫେରିଥିବା ଜଣାପଡ଼ିଛି । ସେପଟେ ଦିଲ୍ଲୀ, ତେଲେଙ୍ଗାନା ପରେ ଜୟପୁରରେ କରୋନା ସନ୍ଦିଗ୍ଧ । ଉଭୟ ଦିଲ୍ଲୀ ଓ ତେଲେଙ୍ଗାନାରେ ରିପୋର୍ଟ ପଜିଟିଭ ଆସିଛି । ତେବେ ଜୟପୁର ସନ୍ଦିଗ୍ଧଙ୍କ ରିପୋର୍ଟକୁ ନେଇ ଏବେ କିଛି ସ୍ପଷ୍ଟ କରିନି ସ୍ବାସ୍ଥ୍ୟବିଭାଗ । ଇଟାଲୀରୁ ଆସିଥିବା ପର୍ଯ୍ୟଟକଙ୍କ ଦେହରେ କରୋନା ଭାଇରସ ଥିବାର ଲକ୍ଷଣ ଦେଖାଯାଇଥିଲା । ତାଙ୍କୁ ଚିକିତ୍ସା ପାଇଁ ଜୟପୁରର ସଓ୍ବାଇ ମାନସିଂହ ହସ୍ପିଟାଲରେ ଭର୍ତ୍ତି କରାଯାଇଛି । ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ରଘୁ ଶର୍ମାଙ୍କ ଅନୁସାରେ ପ୍ରଥମ ଥର୍ମାଲ ସ୍କ୍ରୀନିଂ ସମୟରେ ରିପୋର୍ଟ ନେଗେଟିଭ ଆସିଥିଲା । ତେବେ ଦ୍ୱିତୀୟ ଥର ରିପୋର୍ଟ ପଜିଟିଭ ଆସିଥିଲା । ଭାରତରେ ଏହାକୁ ମିଶାଇ ୬ଟି କରୋନା କେସ୍ ସାମ୍ନାକୁ ଆସିଛି ।
ସେପଟେ ସତର୍କତା ଦୃଷ୍ଟିରୁ ଇରାନ ନାଗରିକଙ୍କୁ ଜାରି ଭିସାକୁ ବାତିଲ କରିଛି ଭାରତ । ବର୍ତ୍ତମାନ ସୁଦ୍ଧା ଇରାନରେ କରୋନାରେ ୬୬ ଜଣଙ୍କର ମୃତ୍ୟୁ ଓ ୧ ହଜାରରୁ ଅଧିକ ଆକ୍ରାନ୍ତ ରହିଛନ୍ତି । ଏଭଳି ସ୍ଥିତିରେ ସେଠାରେ ରହୁଥିବା ଭାରତୀୟ ଛାତ୍ର, ମତ୍ସ୍ୟଜୀବୀ ଓ ତୀର୍ଥଯାତ୍ରୀ ଫଶି ରହିଛନ୍ତି । ସାରା ବିଶ୍ବରେ ଆତଙ୍କ ଖେଳାଇଥିବା କରୋନା ଭାଇରସ, ୨ ହଜାର ୮୦୦ ଲୋକଙ୍କ ଜୀବନ ନେଇସାରିଛି ।
