ବିଶ୍ୱରେ କରୋନା ସଂକ୍ରମଣ ୨ କୋଟି ୪୬ ଲକ୍ଷ ପାର, ଗତ ୨୪ ଘଣ୍ଟାରେ ଗଲାଣି ୬ ହଜାର ଲୋକଙ୍କ ଜୀବନ
ନୂଆଦିଲ୍ଲୀ: କରୋନା ଭାଇରସର ଜାଲରେ ସମଗ୍ର ବିଶ୍ୱ ଦିନକୁ ଦିନ ଅଧିକରୁ ଅଧିକ ଛନ୍ଦି ହେବାରେ ଲାଗିଛି । ପରିସ୍ଥିତି ସୁଧୁରିବା ପରିବର୍ତ୍ତେ ଅଧିକ ବିଗିଡ଼ିବାରେ ଲାଗିଛି । ଗତ ୨୪ ଘଣ୍ଟା ମଧ୍ୟରେ ବିଶ୍ୱରେ ୨ ଲକ୍ଷ ୬୩ ହଜାର ୩୩୩ ଟି ନୂଆ ମାମଲା ରୁଜୁ ହୋଇଛି । ଏବଂ ୫ ହଜାର ୮୭୯ ଲୋକ ପ୍ରାଣ ହରାଇଛନ୍ତି । ତେବେ ବର୍ତ୍ତମାନ ସମଗ୍ର ବିଶ୍ୱରେ ୨ କୋଟି ୪୬ ଲକ୍ଷ ୫ ହଜାର ୮୭୬ ଲୋକ ସଂକ୍ରମିତ ହୋଇଛନ୍ତି । ଏଥିମଧ୍ୟରୁ ୮ ଲକ୍ଷ ୩୪ ହଜାର ୭୯୧ ଲୋକ ପ୍ରାଣ ହରାଇଛନ୍ତି । ସବୁଠାରୁ ବଡ଼ କଥା ହେଉଛି ସଂକ୍ରମିତର ଭୟ ଭିତରେ ସୁସ୍ଥ ସଂଖ୍ୟା ଆଶ୍ୱସ୍ତି ଦେଉଛି । ବିଶ୍ୱରେ ୧ କୋଟି ୭୦ ଲକ୍ଷ ୭୭ ହଜାର ୯୭ ଲୋକ ମଧ୍ୟ ସୁସ୍ଥ ହୋଇଛନ୍ତି । ଯଦିଓ ସମଗ୍ର ବିଶ୍ୱରେ ୬୬ ଲକ୍ଷ ୯୩ ହଜାର ୯୮୮ ସକ୍ରିୟ ମାମଲା ଅଛି |
କରୋନା ଦ୍ୱାରା ଅଧିକ ପ୍ରଭାବିତ ଦେଶ ତାଲିକାରେ ଆମେରିକା ପ୍ରଥମ ସ୍ଥାନରେ ରହିଛି । ବର୍ତ୍ତମାନ ସୁଦ୍ଧା ୬୦ ଲକ୍ଷରୁ ଅଧିକ ଲୋକ ସଂକ୍ରମଣର ଶିକାର ହୋଇଛନ୍ତି । ଗତ ୨୪ ଘଣ୍ଟା ମଧ୍ୟରେ ଆମେରିକାରେ ୪୬ ହଜାରରୁ ଅଧିକ ନୂଆ ମାମଲା ଆସିଛି । ଏଥି ସହିତ ବ୍ରାଜିଲରେ ୨୪ ଘଣ୍ଟାରେ ୪୨ ହଜାର ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ଯଦି ଦେଖିବା ଭାରତରେ ପ୍ରତିଦିନ ସର୍ବାଧିକ ସଂଖ୍ୟକ କରୋନା ମାମଲା ଆସୁଛି ।
ବିଶ୍ୱର ୨୨ ଟି ଦେଶରେ କରୋନା ସଂକ୍ରମିତଙ୍କ ସଂଖ୍ୟା ୨ ଲକ୍ଷରୁ ଅଧିକ ହୋଇଛି । ଏଥିମଧ୍ୟରେ ଇରାନ, ପାକିସ୍ଥାନ, ତୁର୍କୀ, ସାଉଦି ଆରବ, ଇଟାଲୀ, ଜର୍ମାନୀ ଏବଂ ବାଂଲାଦେଶ ଭଳି ଦେଶ ଅନ୍ତର୍ଭୁକ୍ତ ରହିଛନ୍ତି । ଦୁନିଆରେ ୬୦ ପ୍ରତିଶତ ଲୋକ କେବଳ ୬ ଟି ଦେଶରେ ପ୍ରାଣ ହରାଇଛନ୍ତି । ଏହି ଦେଶଗୁଡ଼ିକ ହେଉଛି ଆମେରିକା, ବ୍ରାଜିଲ, ମେକ୍ସିକୋ, ଭାରତ, ବ୍ରିଟେନ, ଇଟାଲୀ । ତେବେ ଭାରତ କରୋନା ସଂକ୍ରମିତଙ୍କ ତାଲିକାରେ ବିଶ୍ୱରେ ୩ୟ ସ୍ଥାନରେ ରହିଛି । ସେହିପରି ସର୍ବାଧିକ ମୃତ୍ୟୁ ସଂଖ୍ୟାରେ ଭାରତ ବିଶ୍ୱରେ ଚତୁର୍ଥ ସ୍ଥାନରେ ରହିଛି ।
