ଚୀନରେ କରୋନାର ନୂଆ ଲହର, ପ୍ରତି ସପ୍ତାହରେ ଆକ୍ରାନ୍ତ ହୋଇପାରନ୍ତି ସାଢ଼େ ୬ କୋଟି ଲୋକ

ବେଜିଂ: ଚୀନରେ କରୋନାର ନୂଆ ଲହର । ଅନ୍ତୁଡିଶାଳରେ ପୁଣି ମୃତ୍ୟୁର ତାଣ୍ଡବ ରଚିପାରେ କୋଭିଡ୍-୧୯ ଭୂତାଣୁ । ଜୁନ୍ ଶେଷ ସୁଦ୍ଧା ପିକ୍ ଛୁଇଁପାରେ ସଂକ୍ରମଣ । ପ୍ରତି ସପ୍ତାହରେ ୬ କୋଟି ୫୦ ଲକ୍ଷ ଲୋକ ସଂକ୍ରମିତ ହୋଇପାରନ୍ତି ବୋଲି ଆଶଙ୍କା ବ୍ୟକ୍ତ କରିଛନ୍ତି ସ୍ବାସ୍ଥ୍ୟ ବିଶେଷଜ୍ଞ । ଟିକାକରଣକୁ ବିଶେଷଜ୍ଞ ଗୁରୁତ୍ବ ଦେଉଥିବା ବେଳେ ସତର୍କ ରହିବାକୁ ସାରା ଦେଶରେ ଆଲର୍ଟ ଜାରି କରାଯାଇଛି । ଓମିକ୍ରନର XBB ସବ୍ ଭାରିଆଣ୍ଟ ଯୋଗୁ ଚୀନରେ ପୁଣି ଥରେ ସଂକ୍ରମଣ ଗ୍ରାଫ୍ ଉପରମୁହାଁ ହୋଇଛି । ଆଗାମୀ ମାସେ ମଧ୍ୟରେ ଏହା ଘାତକ ରୂପ ନେଇପାରେ ବୋଲି ରିପୋର୍ଟ କରିଛି ଦି ଓ୍ବାଶିଂଟନ ପୋଷ୍ଟ ।

ଏବେ ଚୀନରେ ମାଡୁଥିବା କରୋନାର ସବ ଭାରିଆଣ୍ଟ ଅତ୍ୟଧିକ ସଂକ୍ରାମକ । ଏବଂ ଇମ୍ୟୁନୋ ସିଷ୍ଟମ ବା ରୋଗ ପ୍ରତିରୋଧକ ଶକ୍ତିକୁ ମଧ୍ୟ ଏହା ବିଶେଷ କ୍ଷତି ପହଞ୍ଚାଇପାରେ ବୋଲି ସ୍ବାସ୍ଥ୍ୟ ବିଶେଷଜ୍ଞ ଆଶଙ୍କା ବ୍ୟକ୍ତ କରିଛନ୍ତି । ପୂର୍ବରୁ ସ୍ବାସ୍ଥ୍ୟ ବିଶେଷଜ୍ଞ କରୋନାର ନୂଆ ଲହର ଆସିବା ନେଇ ସଙ୍କେତ ଦେଇଥିଲେ । ୨୦୨୦ରେ ସାରା ବିଶ୍ବରେ କରୋନା ଭୂତାଣୁ ମୃତ୍ୟୁର ତାଣ୍ଡବ ରଚିଥିବା ବେଳେ ଚୀନ ସରକାର ଜିରୋ କୋଭିଡ ପଲିସି ଲାଗୁ କରିଥିଲେ ।