ସହିଦଙ୍କ ସ୍ମୃତି ସ୍ତମ୍ଭ ଏବେ ମଦ୍ୟପଙ୍କ ଆଡ୍ଡାସ୍ଥଳୀ

ଯାଜପୁର: ସହିଦଙ୍କୁ ଅସମ୍ମାନ । ସହିଦଙ୍କୁ ଭୁଲିଗଲା ପ୍ରଶାସନ । ସହିଦଙ୍କ ସ୍ମୃତିସ୍ତମ୍ଭ ଅବହେଳିତ । ଯାଜପୁର ବୃନ୍ଦାବନପୁର ସହିଦ ସ୍ମୃତିପୀଠ ଏବେ ଅବହେଳିତ ଅବସ୍ଥାରେ । ସ୍ଥାନୀୟ ପ୍ରଶାସନ କି ସରକାରଙ୍କ ଏହି ସ୍ମୃତିସ୍ତମ୍ଭ ଉପରେ ନଜର ପଡୁନଥିବା ବେଳେ ଏହା ମଦ୍ୟପଙ୍କ ପାଲଟିଛି ଆଡ୍ଡାସ୍ଥଳୀ । ଏହା ସହିତ ଅଳିଆ ଆବର୍ଜନାରେ ଭର୍ତ୍ତି ହୋଇଛି ।

ଆମେ କହୁଛୁ ଦେଶମାତୃକା ପାଇଁ ସର୍ବୋଚ୍ଚ ବଳିଦାନ ଦେଇଥିବା ଯାଜପୁର ଜିଲ୍ଲା ବୃନ୍ଦାବନପୁରର ସହିଦ ହୃଷିକେଶ ମଲ୍ଲିକଙ୍କ ସ୍ମୃତିସମ୍ଭ । ଅବହେଳିତ ହୋଇ ପଡ଼ିରହିଥିବା ଏହି ସ୍ମୃତିସ୍ତମ୍ଭ ପରିସରକୁ ବିଦ୍ୟୁତକରଣ, ପାଚେରୀ ନିର୍ମାଣ ବ୍ୟବସ୍ଥା ସହିତ ସହିଦଙ୍କୁ ମନେ ରଖିବା ପାଇଁ ସ୍କୁଲ କିମ୍ବା ଚିକିତ୍ସାଳୟ ସ୍ଥାପନା ପାଇଁ ଦାବି ହୋଇଛି ।

୨୦୧୦ ମସିହା ଏପ୍ରିଲ ୬ ତାରିଖରେ ଛତିଶଗଡ଼ ଦାନ୍ତେଓ୍ୱାଡ଼ାରେ କୁମ୍ବିଂ ଅପରେସନ ସାରି ଫେରୁଥିବା ବେଳେ ନକ୍ସଲ ହମଲାର ଶିକାର ହୋଇଥିଲେ ସିଆରପିଏଫର ୬୨ ବାଟାଲିୟନ । ଏହି ଅତର୍କିତ ଆକ୍ରମଣରେ ୭୬ ଜଣ ବୀର ଯବାନ ସହିଦ ହୋଇଥିବା ବେଳେ ଏମାନଙ୍କ ମଧ୍ୟରେ ହୃଷିକେଶ ମଧ୍ୟ ପ୍ରାଣ ହରାଇଥିଲେ । ଏହି ଘଟଣାକୁ ୧୧ ବର୍ଷ ପୁରି ଯାଇଛି, ହେଲେ ଏପର୍ଯ୍ୟନ୍ତ ସହିଦଙ୍କ ପରିବାରକୁ ଦୃଷ୍ଟି ଦେଇନି ପ୍ରଶାସନ ।