ରିଲିଜ ହେବ ଓଡିଶାର ଖଣି ଖାଦାନର ପୃଷ୍ଠଭୂମିରେ ନିର୍ମିତ ନୂଆ ହିନ୍ଦୀ ଓ୍ବେବ ସିରିଜ
ଭୁବନେଶ୍ୱର : ଓଡିଶାର ଖଣି ଖାଦନର ପୃଷ୍ଠଭୂମିରେ ନିର୍ମିତ ନୂଆ ହିନ୍ଦୀ ଓ୍ବେବ ସିରିଜ ଜେଙ୍ଗାବୁରୁ କର୍ସ ଅଗଷ୍ଟ ୯ ତାରିଖରେ ରିଲିଜ ହେବ। ଓଟିଟି ପ୍ଳାଟଫର୍ମ ସୋନି ଲିଭରେ ପ୍ରସାରିତ ହେବ ଏହି ବ୍ୟୟବହୁଳ ୱେବସିରିଜ୍ । ମୟଙ୍କ ତିଓ୍ବାରୀଙ୍କ କାହାଣୀକୁ ଚିତ୍ରନାଟ୍ୟର ରୂପ ଦେଇଛନ୍ତି ଖ୍ୟାତନାମା ଚଳଚ୍ଚିତ୍ର ନିର୍ଦ୍ଦେଶକ ପଦ୍ମଶ୍ରୀ ନୀଳମାଧବ ପଣ୍ଡା ।
ଜେଙ୍ଗାବୁରୁ କର୍ସର ଅଧିକାଂଶ ସିନ୍ ଓଡ଼ିଶାର ଏକ ଖଣିଖାଦାନ ଅଞ୍ଚଳରେ ସୁଟିଂ ହୋଇଛି । କ୍ରାଇମଥ୍ରୀଲରର କାହାଣୀ ମୂଳତଃ ଓଡ଼ିଶାର ଖଣି ଇଲାକାର ଏକ ରହସ୍ୟମୟ ମୂଲ୍ୟବାନ ପଥରକୁ ନେଇ ଗତିଶୀଳ । ଫିଲ୍ମରେ ଦର୍ଶାଯାଇଛି ଯେ, ଲଣ୍ଡନରେ ରହୁଥିବା ଆର୍ଥିକ ବିଶ୍ଳେଷକ ପ୍ରିୟା ଦାଶଙ୍କ ପ୍ରଫେସର ବାପା ନିଖୋଜ ହୋଇଯିବା ପରେ ନିଜ ରାଜ୍ୟକୁ ଫେରିବାକୁ ବାଧ୍ୟ ହେଉଛନ୍ତି ।
ବାପାଙ୍କୁ ଖୋଜିବା ଅଭିଯାନ ଭିତରେ ସେ ଆବିଷ୍କାର କରୁଛନ୍ତି ଏକ ଅଜବ ଆତଙ୍କିତ କାହାଣୀକୁ । ଗତବର୍ଷ ଡିସେମ୍ବର ମାସରେ ଜେଙ୍ଗାବୁରୁ କର୍ସର ଟିମ ଆସି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଏକ ସୈଜନ୍ୟମୂଳକ ସାକ୍ଷାତ କରିଥିଲେ । ନିର୍ଦ୍ଦେଶକ ନୀଳମାଧବ ପଣ୍ଡା କହିଛନ୍ତି ଏହା ଦେଶର ପ୍ରଥମ କ୍ଳାଇଫାଇ ସିରିଜ୍ ଅର୍ଥାତ୍ କ୍ଳାଇମେଟ୍ ଚେଞ୍ଜ ଉପରେ ପର୍ଯ୍ୟବେଶିତ କାହାଣୀ ।
