ତୀରନ୍ଦାଜୀ ଉପରେ ହେବ ଫୋକସ୍, ପ୍ରତ୍ୟେକ ଜିଲ୍ଲାରେ ଜଣେ ଶିକ୍ଷକ-ଶିକ୍ଷୟତ୍ରୀଙ୍କୁ ଦିଆଯିବ ତାଲିମ
କଟକ: ବାରବାଟୀ ଷ୍ଟାଡିୟମରେ ଚାଲିଛି ରାଜ୍ୟ ତୀରନ୍ଦାଜ ଚମ୍ପିଅନସିପ୍ । ଏଥିରେ ୧୭ ଜିଲ୍ଲା ଓ ୫ ଅନୁଷ୍ଠାନର ୨୫୦ ଖେଳାଳୀ ଭାଗ ନେଇଛନ୍ତି । କିନ୍ତୁ ଉପକୂଳବର୍ତ୍ତୀ ଜିଲ୍ଲାରେ ଏହି ଖେଳ ପ୍ରତି ଆଗ୍ରହ ସୃଷ୍ଟି କରାଯାଇ ପାରିନାହିଁ । ଏହାକୁ ବିଚାର କରି ଆସନ୍ତା ଏପ୍ରିଲ ମାସରୁ ରାଜ୍ୟ ତୀରନ୍ଦାଜ ସଂଘ ପ୍ରତି ଜିଲ୍ଲାର ଜଣେ ପୁରୁଷ ଓ ଜଣେ ମହିଳା ସ୍କୁଲ କ୍ରୀଡା ଶିକ୍ଷକଙ୍କୁ ପ୍ରଶିକ୍ଷଣ ଦେବାକୁ ଯୋଜନା କରିଛି ।
ତିନି ପର୍ଯ୍ୟାୟରେ ପ୍ରଶିକ୍ଷଣ ନେବା ପରେ ପିଇଟିମାନେ ଉପକୂଳବର୍ତ୍ତୀ ଜିଲ୍ଲାରେ ଏହି ଖେଳର ପ୍ରସାର କରିବେ । କେବଳ କଟକ, ପୁରୀରେ ତୀରନ୍ଦାଜ କୋଚ ଥିଲେ ସୁଦ୍ଧା ମାତ୍ର ତିନି ଚାରି ଜଣ ତୀରନ୍ଦାଜ ଅଛନ୍ତି । ତେଣୁ ସରକାରୀ ସ୍ତରରେ ଏହାକୁ ଅଧିକ ପ୍ରୋତ୍ସାହନ ଦେବାକୁ ଅନୁରୋଧ କରିଛନ୍ତି ଅଭିଭାବକ ।
