ଭୁବନେଶ୍ୱର: ଆସନ୍ତାକାଲିଠୁ ପ୍ରଥମ ବିଶ୍ବ ଓଡ଼ିଆ ଭାଷା ସମ୍ମିଳନୀ। ପୂରା ବିଶ୍ବରେ ଓଡ଼ିଆ ଭାଷାର ପ୍ରଚାର ପ୍ରସାର, ସଂରକ୍ଷଣ ସହ ସଭିଁଙ୍କ ମନରେ ଓଡ଼ିଆ ଭାଷାପ୍ରେମ ଜାଗ୍ରତ କରିବାକୁ ଅଣ୍ଟା ଭିଡ଼ିଛନ୍ତି ରାଜ୍ୟ ସରକାର। ସ୍ବତନ୍ତ୍ର କାର୍ଯ୍ୟକ୍ରମ ଜରିଆରେ ବିଶାଳ ଭାଷା ମହାକୁମ୍ଭ ରାଜଧାନୀରେ ଆୟୋଜନ ହେବ। କାଲି ଦିନ ସାଢେ ୧୧ଟାରେ ଏକକାଳୀନ ବନ୍ଦେ ଉତ୍କଳ ଜନନୀ ସଙ୍ଗୀତ ଗାନ କରିବାକୁ ଅନୁରୋଧ କରିଛନ୍ତି ରାଜ୍ୟ ସରକାର। ରାଜ୍ୟ ସଙ୍ଗୀତ ଗାନ ସହ ପ୍ରଥମ ବିଶ୍ବ ଓଡ଼ିଆ ଭାଷା ସମ୍ମିଳନୀର ଉଦଘାଟନ ହେବ। ପ୍ରଥମ ବିଶ୍ବ ଓଡ଼ିଆ ଭାଷା ସମ୍ମିଳନୀର ଉଦଘାଟନଠାରୁ ଉଦଯାପନ ଯାଏଁ ୧୭ଟି ବିଶେଷ ଆଲୋଚନାଚକ୍ର ଅନୁଷ୍ଠିତ ହୋଇଛି।
ସମ୍ମିଳନୀରେ ଅନ୍ତର୍ଜାତୀୟସ୍ତରର ଭାଷାବିତ, ଲେଖକ, ସାହିତ୍ୟିକ ଓ ଭାଷାପ୍ରେମୀ ସାମିଲ ହେବା ନେଇ ସୂଚନା ମିଳିଛି। ଭବିଷ୍ୟତ ପିଢିଙ୍କ ପାଖରେ ଓଡ଼ିଆ ଭାଷାର ଆଦର ବଢାଇବା ସହ ଆଧୁନିକ ଜ୍ଞାନକୌଶଳ ଜରିଆରେ ଭାଷାକୁ ଆଗକୁ ବଢାଇବା ପ୍ରଥମ ବିଶ୍ବ ଓଡ଼ିଆ ଭାଷା ସମ୍ମିଳନୀର ଲକ୍ଷ୍ଯ। ସମ୍ମିଳନୀକୁ ନେଇ ପୁରପଲ୍ଲୀରୁ ବିଦେଶରେ ବାସ କରୁଥିବା ପ୍ରବାସୀ ଓଡ଼ିଆ ବେଶ ଉତ୍ସାହିତ ଅଛନ୍ତି।
