ବିଜ୍ଞାନର ଚମତ୍କାରିତା: ସରୋଗେଟ ମାଆଠାରୁ ଜନ୍ମନେଲେ ଦୁଇ ଚିତାବାଘ
ଆମେରିକା: ଚିକିତ୍ସା ବିଜ୍ଞାନର ଉନ୍ନତିକରଣ ହେବା ସହ ବର୍ତ୍ତମାନ ସମୟରେ ବହୁ ନୂତନ ପଦ୍ଧତିରେ ଚିକିତ୍ସା ପ୍ରକ୍ରିୟା ଦେଖିବାକୁ ମିଳୁଛି । ଇନ୍ ଭିଟ୍ରୋ ପଦ୍ଧତିରେ ମଣିଷ କ୍ଷେତ୍ରରେ ସରୋଗେଟ୍ ମା’ଠାରୁ ସନ୍ତାନ ଜନ୍ମ ପ୍ରକିୟା ସମ୍ଭବ ହୋଇପାରିଛି । ତେବେ ଗତ ୩୦ ବର୍ଷ ପରେ ଆମେରିକା ଓହିଓଠାରେ ଥିବା କଲମ୍ବସ ଚିଡ଼ିଆଖାନାରେ ସରୋଗେଟ୍ ମା’ଠାରୁ ପୁଣି ୨ ଚିତାବାଘ ଶାବକ ଜନ୍ମ ନେଇଛନ୍ତି । କିବିବି ନାମକ ୬ ବର୍ଷର ଏକ ମାଈ ଚିତାବାଘ ମାଆ ହୋଇପାରି ନଥିଲା। କିବିବି ପାଇଁ ଆଉ ମା’ ହେବା ସମ୍ଭବ ମଧ୍ୟ ନ ଥିଲା।
ତେଣୁ ଚିଡ଼ିଆଖାନାର ପ୍ରାଣୀ ଚିକିତ୍ସକ କିବିବିର ଡିମ୍ବାଣୁ ନେଇ ଅନ୍ୟ ଏକ ଅଣ୍ଡିରା ଚିତାବାଘର ଶୁକ୍ରାଣୁ ସହିତ ଲ୍ୟାବ୍ରେ ଗତ ନଭେମ୍ବର ୧୯ରେ ଫର୍ଟିଲାଇଜେଶନ କରିଥିଲେ। ସୃଷ୍ଟି ହୋଇଥିବା ଭ୍ରୁଣକୁ ନଭେମ୍ବର ୨୧ରେ ଅନ୍ୟ ଏକ ସରୋଗେଟ୍ ମାଈ ଚିତାବାଘ ଇଜ୍ଜି ଗର୍ଭରେ ପ୍ରତିରୋପଣ କରାଯାଇଥିଲା। ଡିସେମ୍ବର ୨୩ରେ ଅଲ୍ଟ୍ରାସାଉଣ୍ଡରୁ ଜଣାପଡ଼ିଥିଲା ଇଜ୍ଜି ଗର୍ଭବତୀ ହୋଇଛି।
ଏହାପରେ ୩ ମାସ ପରେ ଫେବୃୟାରୀ ୧୯ରେ ଇଜ୍ଜି ୨ ଟି ସୁସ୍ଥ ଚିତାବାଘ ଶାବକ ଜନ୍ମ ଦେଇଛି। ସେମାନଙ୍କ ମଧ୍ୟରେ ଗୋଟିଏ ମାଈ ଏବଂ ଅନ୍ୟଟି ଅଣ୍ଡିରା ଶାବକ ବୋଲି ଚିଡ଼ିଆଖାନା କର୍ତ୍ତୃପକ୍ଷ ସୂଚନା ଦେଇଛନ୍ତି। ୧୯୯୦ରେ ଏହି ପଦ୍ଧତିରେ ୩ଟି ଚିତା ଶାବକ ଜନ୍ମ ହୋଇଥିଲେ।
ଏବେ ପୃଥିବୀରେ ଚିତାବାଘଙ୍କ ସଂଖ୍ୟା ପ୍ରାୟ ୭୫୦୦ ରହିଛି। ଏହି ପଦ୍ଧତି ଦ୍ୱାରା ସେମାନଙ୍କ ସଂଖ୍ୟା ବୃଦ୍ଧି ହୋଇପାରିବ ବୋଲି ଚିଡ଼ିଆଖାନାର ପ୍ରାଣୀ ଚିକିତ୍ସକ ଡ. ରୈଣ୍ଡି ଜଙ୍ଗ୍ ସୂଚନା ଦେଇଛନ୍ତି।
