ଯାଜପୁର: ସମସ୍ତଙ୍କୁ ସ୍ତବ୍ଧ କଲାପରି ଘଟଣା। ଝିଅର ବିବାହ ଦିନ ଆଖି ବୁଜିଲେ ବାପା। ଯାଜପୁର ଜିଲ୍ଲା ଧର୍ମଶାଳା ଆରୁହା ଗାଁରେ ଏଭଳି ଅଭାବନୀୟ ଘଟଣା ଘଟିଛି। ପରିବାରରେ ଖୁସି ଲହଡ଼ି ଭାଙ୍ଗୁଥିଲା। ରଙ୍ଗିନ ଆଲୋକ ମାଳାରେ ଝଲସି ଉଠୁଥିଲା ପରିବେଶ। ଲାଗିଥିଲା ସାଙ୍ଗସାଥୀ ଏବଂ ଅତିଥିଙ୍କ ଗହଳି। ଭୋଜିଭାତର ଆସର ଜମୁଥିଲା। କିଛି ସମୟ ପରେ ଆସିଥାନ୍ତା ବର । ହେଲେ ଏହି ସମୟରେ ବାପା ତଥା ଗାଁର ପୂର୍ବତନ ସରପଞ୍ଚ ହରିହର ରାଉତଙ୍କର ସ୍ବାସ୍ଥ୍ଯାବସ୍ଥା ବିଗିଡ଼ି ଯାଇଥିଲା। ତୁରନ୍ତ ତାଙ୍କୁ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ଚାଲି ଯାଇଥିଲା ହରିହର ରାଉତଙ୍କ ଜୀବନ। ବାହାଘରର ଖୁସି ନିମିଷକେ ପାଣି ଫୋଟକା ପରି ମିଳିଇଯାଇଥିଲା। ସୃଷ୍ଟି ହୋଇଥିଲା ଶୋକାକୁଳ ପରିବେଶ।
