ଭୁବନେଶ୍ବରରେ ଅଦ୍ଭୁତ ଘଟଣା, ସ୍ତ୍ରୀର ଶବ ନେଇଗଲା ନକଲି ସ୍ବାମୀ

ଭୁବନେଶ୍ୱର: ହସ୍ପିଟାଲରୁ ଶବ ନେଇଗଲା ନକଲି ସ୍ବାମୀ । ଶବ ସତ୍କାର କରି ବାରଦୁଆର ବୁଲୁଛନ୍ତି ଅସଲି । ଶାଶୂଙ୍କ ଭୂମିକା ନେଇ ପ୍ରଶ୍ନ ଉଠାଇଲେ ପ୍ରଫୁଲ୍ଲ । ବାଲିପାଟଣା ଥାନା ଦନାପଡାର ପ୍ରଫୁଲ୍ଲ ଷଡ଼ଙ୍ଗୀ । ପୋଖରୀପୁଟର ଏକ ମନ୍ଦିରରେ ପୂଜକ ଭାବେ କାମ କରନ୍ତି । ୨୦୧୯ ମସିହାରେ ଖାରବେଳନଗର NAC କଲୋନୀର ଅପରାଜିତା ଆଚାର୍ଯ୍ୟଙ୍କୁ ବୈଦିକ ରୀତିରେ ବିବାହ କରିଥିଲେ । ଅପରାଜିତାଙ୍କ ମା’ ଛଡ଼ା ଆଉ କେହି ନଥିବାରୁ ସେ ବିବାହ ପରେ ଶ୍ବଶୁର ଘରେ ରହୁଥିଲେ । ସ୍ବଳ୍ପ ରୋଜଗାର କାରଣରୁ ପରିବାରରେ ଲାଗି ରହିଥିଲା ଝଗଡା । ଗତ ମାର୍ଚ୍ଚ ୨୬ ତାରିଖରେ ଅସୁସ୍ଥତା କାରଣରୁ ଚିକିତ୍ସିତ ଅବସ୍ଥାରେ ଏମ୍ସରେ ଅପରାଜିତାଙ୍କର ମୃତ୍ୟୁ ହୋଇଥିଲା ।

ସ୍ତ୍ରୀଙ୍କ ମୃତ୍ୟୁ ପରେ ଏମ୍ସ ହସ୍ପିଟାଲରେ ପହଁଚିବା ବେଳକୁ ନୂତନ ନାମକ ଜଣେ ଯୁବକ ଅପରାଜିତାଙ୍କ ସ୍ବାମୀର ପରିଚୟ ଦେଇ ସେଠାରେ କାନ୍ଦବୋବାଳି କରୁଥିଲେ । ଶାଶୁ ମଧ୍ୟ ନୂତନଙ୍କ ସହ ଦୁଃଖରେ ଭାଗିଦାର ହୋଇଥିଲେ । ଏହା ଦେଖି ପାଟିତୁଣ୍ଡ କରିବାରୁ ପ୍ରଫୁଲ୍ଲଙ୍କୁ ପାଗଳ କହି ନିକଟସ୍ଥ ଫାଣ୍ଡିକୁ ପଠାଇ ଦେଇଥିଲେ ହସ୍ପିଟାଲ ସୁରକ୍ଷାକର୍ମୀ । ଆଉ ଏହି ସମୟରେ ମୃତଦେହ ନେଇ ଫେରାର ହୋଇଯାଇଥିଲେ ନକଲି ସ୍ବାମୀ । ଶାଶୂ ଓ ସମ୍ପୃକ୍ତ ଯୁବକ ନୂତନଙ୍କ ନାଁରେ କମିଶନରେଟ ପୋଲିସରେ ଏତଲା ଦେବାସହ ସ୍ତ୍ରୀଙ୍କ କ୍ରିୟାକର୍ମ କରିଛନ୍ତି ପ୍ରଫୁଲ୍ଲ । ଏହି ଘଟଣାକୁ ନେଇ ରାଜଧାନୀରେ ବେଶ ଚର୍ଚ୍ଚା ଚାଲିଥିବା ବେଳେ ଶାଶୂ ଅପର୍ଣ୍ଣା ଆଚାର୍ଯ୍ୟ ଫେରାର ହୋଇଯାଇଛନ୍ତି ।