ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ର ଠାଣେର ଏକ ସ୍କୁଲରେ ୨ ଜଣ ଶିଶୁଙ୍କୁ ଯୌନ ନିର୍ଯାତନା ଦିଆଯାଇଥିବାର ଅଭିଯୋଗ। ୪ ବର୍ଷର ୨ ଜଣ ଶିଶୁଙ୍କୁ ଜଣେ ସଫେଇ କର୍ମଚାରୀ ଯୌନ ନିର୍ଯାତନା ଦେବା ଅଭିଯୋଗକୁ ନେଇ ତୀବ୍ର ଉତ୍ତେଜନା ଦେଖା ଦେଇଛି। ହଜାର ହଜାର ଲୋକ ବଦଲାପୁର ରେଳଷ୍ଟେସନରେ ବିକ୍ଷୋଭ କରିବା ସହ ମୁମ୍ବାଇ ରେଳ ରୁଟକୁ ଅବରୋଧ କରିଛନ୍ତି। ଫଳରେ ଟ୍ରେନ ଚଳାଚଳ ସମ୍ପୂର୍ଣ୍ଣ ପ୍ରଭାବିତ ହୋଇଛି। ଗତ ଅଗଷ୍ଟ ୧୬ ତାରିଖରେ ଜଣେ ୨୩ ବର୍ଷ ବୟସ୍କ ସଫେଇ କର୍ମଚାରୀ ୨ ଜଣ ବାଳିକାଙ୍କୁ ଟଏଲେଟ ଭିତରେ ଯୌନ ନିର୍ଯାତନା ଦେଇଥିବା ଅଭିଯୋଗ ପ୍ରକାଶ ପାଇଥିଲା। ସେହି କର୍ମଚାରୀଙ୍କ ବିରୋଧରେ ଏଫଆଇଆର ଦାୟର ପରେ ତାକୁ ଗିରଫ କରାଯାଇଥିଲା। ଏହି ଘଟଣାରେ ସ୍କୁଲ ପ୍ରଶାସନ ପକ୍ଷରୁ ପ୍ରିନ୍ସିପାଲଙ୍କୁ ସସପେଣ୍ଡ କରାଯାଇଥିବାବେଳେ ଶ୍ରେଣୀ ଶିକ୍ଷକଙ୍କୁ ବାହାର କରିଦିଆଯାଇଛି। ସ୍କୁଲରେ ଶିଶୁମାନେ ଅସୁରକ୍ଷିତ ବୋଲି ଅଭିଯୋଗ କରିଛନ୍ତି ଅଭିଭାବଗ। ସ୍କୁଲରେ ଲାଗିଥିବା ସିସିଟିଭି ଅକାମି ଥିବା ଜଣାପଡିଛି। ଘଟଣାର ତଦନ୍ତ ଲାଗି ଏସଆଇଟି ଗଠିତ ହୋଇଛି। ସ୍ପେସାଲ ଆଇଜି ଭାରତୀ ସିଂଙ୍କ ନେତୃତ୍ବରେ ଏସଆଇଟି ଗଠିତ ହୋଇଛି।
