ସଂସଦ ଅଧିବେଶନ ବେଳେ ଧରାପଡ଼ିଲେ ସାଂସଦ, ମୋବାଇଲରେ ଦେଖୁଥିଲେ ଅଶ୍ଲୀଳ ଭିଡିଓ

ବ୍ୟାଂକକ: ଥାଇଲାଣ୍ଡ ସଂସଦରୁ ଆସିଛି ଏକ ଲଜ୍ଜାଜନକ ଘଟଣା । ଗୁରୁବାର ଥାଇଲାଣ୍ଡ ସଂସଦରେ ବଜେଟ୍ ଆଗତ ହେଉଥିଲା । ଠିକ୍ ସେତିକି ବେଳେ ଜଣେ ସାଂସଦ ମୋବାଇଲରେ ଅଶ୍ଲୀଳ ଭିଡିଓ ଦେଖୁଥିବା ବେଳେ ଧରାପଡ଼ିଛନ୍ତି । ସାଂସଦ ଜଣଙ୍କ ହେଉଛନ୍ତି ରୋନାଥେପ ଅନୁବତ । ସେ ଅଶ୍ଲୀଳ ଭିଡିଓ ଦେଖୁଥିବା ନେଇ କେତକ ଫଟୋ ସୋସିଆଲ୍ ମିଡିଆରେ ମଧ୍ୟ ଭାଇରାଲ୍ ହୋଇଛି ।

ସୂଚନା ଅନୁସାରେ ବଜେଟ୍ ଅଧିବେଶନରେ ରୋନାଥେପ ଅନୁବତ ମୋବାଇଲ୍ ବାହାର କରି ଟେବୁଲ ତଳକୁ ନେଇ କିଛି ଦେଖିବାକୁ ଲାଗିଥିଲେ । ଏହି ସମୟରେ ଗ୍ୟାଲେରୀରେ ବସିଥିବା ଗଣମାଧ୍ୟମ ପ୍ରତିନିଧିଙ୍କ ନଜର ପଡ଼ିଥିଲା ରୋନାଥେପଙ୍କ ଉପରେ । ଯେଉଁଥିରେ ରୋନାଥେପ ଅଶ୍ଲୀଳ ଭିଡିଓ ଦେଖୁଥିବା ଜଣାପଡ଼ିଥିଲା ।

ଏହାକୁ ନେଇ ସଂସଦରେ ଅପ୍ରୀତିକର ପରିସ୍ଥିତି ଉପୁଜି ଥିଲା । ଅନୁବତ ସ୍ପଷ୍ଟୀକରଣ ଦେଇ କହିଥିଲେ- ତାଙ୍କୁ ଏକ ମେସେଜ ଆସିଥିଲା ଯେଉଁଥିରେ ଯୁବତୀଙ୍କ ଅର୍ଦ୍ଧନଗ୍ନ ଫଟୋ ଥିଲା । ମୋତେ ଲାଗିଲା କେହି ଗ୍ୟାଙ୍ଗଷ୍ଟର କୌଣସି ଯୁବତୀଙ୍କୁ ଜବରଦସ୍ତି କରୁଛି । ପରେ ଶୁଣିଥିଲେ ଯୁବତୀ ଜଣଙ୍କ ଟଙ୍କା ମାଗୁଛନ୍ତି । ତାପରେ ସେ ଫଟୋକୁ ଡିଲିଟ୍ କରି ଦେଇଥିଲେ ।

ସରକାରୀ ଅଧିକାରୀ ତାଙ୍କୁ କାରଣ ଦର୍ଶାଅ ନୋଟିସ୍ ଜାରି କରିବା ସହ ଜବାବ ମାଗିଛନ୍ତି । ତେବେ, ସଂସଦ ବାଚସ୍ପତି ଚୁଆନ୍ ଲିକପାଇ ଏହି ମାମଲାକୁ ବ୍ୟକ୍ତିଗତ କହିଛନ୍ତି । ଅଧିବେଶନ ବେଳେ ମୋବାଇଲ୍ ବ୍ୟବହାର ନକରିବା ନେଇ କୌଣସି ନିୟମ ନାହିଁ । ଫୋନରେ ଆପଣ କଣ ଦେଖୁଛନ୍ତି ତାହା ଆପଣଙ୍କ ବ୍ୟକ୍ତିଗତ । ସାଂସଦ ରୋନାଥେପ ଅନୁବତଙ୍କ ବିରୋଧରେ କୌଣସି ଅଭିଯୋଗ ମଧ୍ୟ ହୋଇନାହିଁ ।

ତେବେ, ଏପରି ଘଟଣା ଥାଇଲାଣ୍ଡ ସଂସଦରେ ପ୍ରଥମଥର ପାଇଁ ସାମନାକୁ ଆସିନାହିଁ । ଏହା ପୂର୍ବରୁ ୨୦୧୨ ମସିହାରେ ସାଂସଦ ନାଟ ବେନଟେଡଟନ୍ ସଂସଦ ପରିସରରେ ଅଶ୍ଲୀଳ ଭିଡିଓ ଦେଖିବା ବେଳେ ଧରାପଡ଼ିଥିଲେ ।