ମିଳିଲା ଅପହୃତ ଯବାନଙ୍କ ମୃତଦେହ

ନନ୍ଦିଘୋଷ ବ୍ୟୁରୋ : ଜମ୍ମୁ ଓ କାଶ୍ମୀରର ଅନନ୍ତନାଗ ଜିଲ୍ଲାରୁ ମିଳିଲା ଅପହୃତ ହୋଇଥିବା ଯବାନଙ୍କ ମୃତଦେହ। ଭାରତୀୟ ସେନାର ବରିଷ୍ଠ କର୍ତ୍ତୃପକ୍ଷ ଏନେଇ ସୂଚନା ଦେଇଛନ୍ତି। ଟେରିଟୋରିଆଲ ଆର୍ମିର ୧୬୧ ୟୁନିଟର ଦୁଇ ଯବାନଙ୍କୁ ଅପହରଣ କରିନିଆଯାଇଥିଲା। ଗତ ଅକ୍ଟୋବର ୮ରୁ ଆରମ୍ଭ ହୋଇଥିବା ଅପରେସନ ବେଳେ ଅନନ୍ତନାଗର ଜଙ୍ଗଲ ଇଲାକାରୁ ସେମାନଙ୍କୁ ଅପହରଣ କରିନିଆଯାଇଥିଲା। ସେମାନଙ୍କ ମଧ୍ଯରୁ ଜଣେ ଖସିଆସିଥିବାବେଳେ ଅନ୍ଯଜଣେ ନିଖୋଜ ଥିଲେ। ଖସିଆସିଥିବା ଯବାନଙ୍କ ଦେହରେ ଦୁଇଟି ଗୁଳି ବାଜିଥିଲେ ବି ସେ ବର୍ତ୍ତି ଯାଇଥିଲେ। ତାଙ୍କୁ ତୁରନ୍ତ ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେ ସୁସ୍ଥ ଥିବା ସୂଚନା ମିଳିଛି। ପରେ ଅନ୍ଯ ଜଣେ ନିଖୋଜ ଯବାନଙ୍କୁ ଖୋଜିବା ଲାଗି ସର୍ଚ୍ଚ ଅପରେସନ ଜାରି ରହିଥିଲା। ଏହି ଅପରେସନରେ ସେନା ଓ ଜମ୍ମୁ ଓ କାଶ୍ମୀର ପୋଲିସ ସାମିଲ ଥିଲେ। ଅନନ୍ତନାଗର ପଥ୍ରୀବାଲ ଅଞ୍ଚଳରୁ ତାଙ୍କ ଗୁଳିବଦ୍ଧ ଶରୀର ମିଳିଥିଲା। ଗତ ଅଗଷ୍ଟରେ ଅନନ୍ତନାଗରେ ସମଧରଣର ଘଟଣାରେ ୨ ଜଣ ଯବାନ ପ୍ରାଣ ହରାଇଥିବାବେଳେ ୩ ଜଣ ଆହତ ହୋଇଥିଲେ।