ବିହାରରେ ଚାଲିଥିବା ଆତଙ୍କବାଦୀ ସଂଗଠନରେ ଚଢ଼ାଉ କଲା ପୋଲିସ୍, ୨ ଗିରଫ
1 min read
ପାଟନା: ପ୍ରଧାନମନ୍ତ୍ରୀଙ୍କ ପାଟନା ଗସ୍ତ ପୂର୍ବରୁ ୨ଜଣ ସନ୍ଦିଗ୍ଧ ଆତଙ୍କବାଦୀଙ୍କୁ ଗିରଫ କରିଛି ପୋଲିସ । ଏହି ଦୁଇ ଜଣଙ୍କ ମୁଖ୍ୟ ଲକ୍ଷ୍ୟ ଥିଲା ପ୍ରଧାନମନ୍ତ୍ରୀଙ୍କ ବିହାର ଗସ୍ତ । ମୋଦୀଙ୍କ ପାଟନା ଗସ୍ତର ୧୫ ଦିନ ପୂର୍ବରୁ ସନ୍ଦିଗ୍ଧ ଆତଙ୍କବାଦୀ ଫୁଲଓ୍ୱାରୀ ସରିଫରେ ତାଲିମ ନେଉଥିଲେ । ପୋଲିସ ସେଠାରେ ଚଢ଼ାଉ କରି ଦୁଇ ସନ୍ଦିଗ୍ଧଙ୍କୁ ଗିରଫ କରିଛି । ଗିରଫ ହୋଇଥିବା ୨ ଜଣଙ୍କ ମଧ୍ୟରୁ ଜଣେ ହେଉଛନ୍ତି ଝାଡ଼ଖଣ୍ଡ ପୋଲିସର ଅବସରପ୍ରାପ୍ତ ପୋଲିସ ମହମ୍ମଦ ଜଲାଲୁଦ୍ଦୀନ ଓ ଅନ୍ୟଜଣେ ହେଉଛନ୍ତି ଅଥାର ପରଭେଜ୍ ।
ଉଭୟ ସନ୍ଦିଗ୍ଧ ଆତଙ୍କବାଦୀଙ୍କ ଲିଙ୍କ୍ ପପୁଲାର ଫ୍ରଣ୍ଟ ଅଫ୍ ଇଣ୍ଡିଆ ଏବଂ ସୋସିଆଲ ଡେମୋକ୍ରାଟିକ୍ ପାର୍ଟି ଅଫ୍ ଇଣ୍ଡିଆ ସହିତ ଜଡ଼ିତ ବୋଲି ପୋଲିସ୍ କହିଛି । ଉଭୟଙ୍କ ନିକଟରୁ ପୋଲିସ PFI ପତାକା, ବୁକଲେଟ୍, ପାମ୍ପଲେଟ୍ ଏବଂ ଅନେକ ସନ୍ଦେହଜନକ ଦଲିଲ୍ ମଧ୍ୟ ଜବତ କରିଛି । ଯେଉଁଥିରେ ୨୦୪୭ ସୁଦ୍ଧା ଭାରତକୁ ଏକ ଇସଲାମ ଦେଶ କରିବା ପାଇଁ ଉଲ୍ଲେଖ କରାଯାଇଛି ।
ତଦନ୍ତ ପରେ ପୋଲିସ କହିଛି ଯେ ଜୁଲାଇ ୬ ଓ ୭ରେ ଅଥାର ପରଭେଜ୍ ମାର୍ଶଲ ଆର୍ଟ ଏବଂ ଶାରୀରିକ ଶିକ୍ଷା ଦେବା ନାମରେ ଅନେକ ଯୁବକଙ୍କୁ ଡାକିଥିଲେ । କିନ୍ତୁ ସେମାନଙ୍କୁ ଅସ୍ତ୍ରଶସ୍ତ୍ର ତାଲିମ ଦେବା ଏବଂ ଧର୍ମ ନାଁରେ ପ୍ରବର୍ତ୍ତାଇଥିଲେ । ଆତଙ୍କବାଦୀ ଷଡ଼ଯନ୍ତ୍ର ଯୋଜନା ପାଇଁ ତାଲିମ ନେବା ଲାଗି ସେଠାକୁ ଆସୁଥିବା ଅଧିକାଂଶ ଯୁବକ ହେଉଛନ୍ତ କେରଳ, ପଶ୍ଚିମବଙ୍ଗ, ଉତ୍ତରପ୍ରଦେଶ, ତାମିଲନାଡ଼ୁର ।
