ଓ୍ବାକଫ ସଂଶୋଧନ ବିଲକୁ ସମର୍ଥନ କରିବା ପଡ଼ିଲା କି ମହଙ୍ଗା ? ବଢ଼ୁଛି ଦଳୀୟ ନେତାଙ୍କ ଇସ୍ତଫା ସଂଖ୍ୟା..

ନନ୍ଦିଘୋଷ ବ୍ୟୁରୋ: ପାରିତ ହୋଇଛି ଓ୍ବାକଫ୍ ସଂଶୋଧନ ବିଲ୍ । ଏହି ବିଲ ପାରିତ ହେବାକୁ ନେଇ ରାଜନୈତିକ ମହଲରେ ତିବ୍ର ଆରୋପ-ପ୍ରତ୍ୟାରୋପ ଚାଲିଛି । ତେବେ ଏହି ଓ୍ବାକଫ ସଂଶୋଧନ ବିଲକୁ ସମର୍ଥନ କରିଥିବା ନୀତିଶ କୁମାରଙ୍କୁ ପଡ଼ୁଛି ମହଙ୍ଗା । ସେ ଏହାକୁ ସମର୍ଥନ କରିବା ପରେ ଦଳର ଜଣଙ୍କ ପରେ ଜଣେ ପୁରୁଖା ନେତାମାନେ ଦଳ ଛାଡ଼ୁଛନ୍ତି । ଆଗକୁ ନିର୍ବାଚନ ଆସୁଥିବାବେଳେ ତାଙ୍କ ପାଇଁ ଚିନ୍ତାର କାରଣ ପାଲଟିଛି । ଏଯାବତ ୫ ଜଣ ବଡ଼ ନେତା ଦଳ ଛାଡ଼ିଛନ୍ତି । ଏପରିକି ଦଳର ବହୁ ନେତା ଏବେ ନୀତିଶଙ୍କ ବିରୋଧରେ ନାରା ଦେବା ମଧ୍ୟ ଆରମ୍ଭ କରି ଦେଇଛନ୍ତି । ଆଉ କହୁଛନ୍ତି କି, ମୁଖ୍ୟମନ୍ତ୍ରୀ ସେମାନଙ୍କୁ ଧୋକା ଦେଇଛନ୍ତି ।

ଦଳର ରାଜୁ ନାୟର, ତବରେଜ ସିଦ୍ଧିକ ଅଲିଗ, ନଦିମ ଅଖତର, ମୋହମ୍ମଦ ଶାହନବାଜ ମଲ୍ଲିକ ଏବଂ ମହମ୍ମଦ କାସିମ ଅନସାରୀ ମଲ୍ଲିକ ପ୍ରମୁଖ ଦଳରୁ ଇସ୍ତଫା ଦେଇ ସାରିଛନ୍ତି । ଦଳର ବହୁ ତୁଙ୍ଗ ମୁସଲମାନ ନେତାମାନେ ଇସ୍ତଫା ଦେଉଛନ୍ତି । ତେବେ ଚଳିତ ବର୍ଷ ଶେଷକୁ ରହିଛି ନିର୍ବାଚନ । ଏବେ ଦଳୀୟ ନେତାଙ୍କ ଇସ୍ତଫା ଦଳ ପାଇଁ ଚିନ୍ତାର କାରଣ ପାଲଟିଛି । ରାଜୁ ନାୟାର ତାଙ୍କ ଇସ୍ତଫାପତ୍ରରେ କହିଛନ୍ତି ଯେ ୱାକଫ ସଂଶୋଧନ ବିଲ୍ ପ୍ରତି ଜେଡିୟୁର ସମର୍ଥନ ତାଙ୍କୁ ଗଭୀର ଆଘାତ ଦେଇଛି, ଏହାକୁ ମୁସଲମାନମାନଙ୍କୁ ଅତ୍ୟାଚାର କରୁଥିବା ଏକ କଳା ଆଇନ ବୋଲି କହିଛନ୍ତି। ସେ କହିଛନ୍ତି ଯେ ୱାକଫ ସଂଶୋଧନ ବିଲ୍ ଲୋକସଭାରେ ଗୃହୀତ ହେବା ଏବଂ ସମର୍ଥନ ହେବା ପରେ, ମୁଁ ଜେଡିୟୁରୁ ​​ଇସ୍ତଫା ଦେଉଛି ଏବଂ କହିଛି ଯେ ମୁଁ ଦଳର ସମସ୍ତ ଦାୟିତ୍ୱରୁ ମୁକ୍ତ ହେଉଛି ବୋଲି ଲେଖିଛନ୍ତି । ସେପଟେ ଦଳର ଭୋଟ ବ୍ୟାଙ୍କ ମଧ୍ୟ ମାଇନସ ହେଉଥିବା ରାଜନୈତିକ ମହଲରେ ଚର୍ଚ୍ଚା ହେଉଛି ।