ନୀତିଶଙ୍କୁ ସମାଲୋଚନା, ଏମିତି କହିଲେ ତେଜସ୍ବୀ

ନନ୍ଦିଘୋଷ ବ୍ୟୁରୋ: ଇଣ୍ଡିଆ ମେଣ୍ଟ ଛାଡିବାକୁ ନେଇ ନୀତୀଶ କୁମାରଙ୍କୁ ବିଭିନ୍ନ ମହଲରୁ ସମାଲୋଚନା। ବିଭିନ୍ନ ଦଳର ରାଜନେତା ନୀତୀଶଙ୍କୁ ତୀବ୍ର କଡ଼ା ଆକ୍ଷେପ କରିଛନ୍ତି। ବିରୋଧୀ ଆରଜେଡି ନେତା ତେଜସ୍ବୀ ଯାଦବ କହିଛନ୍ତି ବିହାରରେ ଖେଳ ଏବେ ଆରମ୍ଭ ହୋଇଛି। ଆହୁରି ଖେଳ ବାକି ଅଛି। ମୁଁ ଯାହା କୁହେ ତାହା ଲେଖିକି ରଖନ୍ତୁ। ୨୦୨୪ରେ ନୀତୀଶ କୁମାରଙ୍କ ଖେଳ ଖତମ ହୋଇଯିବ। ସେପଟେ ଆରଜେଡି ନେତା ଲାଲୁ ଯାଦବଙ୍କ ଝିଅ ରୋହିଣୀ ଆଚାର୍ଯ୍ଯ ନୀତୀଶ ଇଣ୍ଡିଆ ମେଣ୍ଟ ଛାଡିବା ପରେ ଅନାବଶ୍ଯକ ବୋଲି କହିଛନ୍ତି। ମେଣ୍ଟରେ ଥିବା ଅନାବଶ୍ଯକ ଲୋକଙ୍କୁ ଅଳିଆ ଗଦାରେ ପକାଇ ଦିଆଗଲା ବୋଲି କହିଛନ୍ତି ଲାଲୁଙ୍କ ଝିଅ ରୋହିଣୀ ଆଚାର୍ଯ୍ୟ।

ତେବେ ସୋସିଆଲ ମିଡିଆରେ ଏହି ପୋଷ୍ଟ କରିବା ପରେ ପୁଣିଥରେ ଏହାକୁ ଡିଲିଟ୍ କରି ଦେଇଥିଲେ ଲାଲୁଙ୍କ ଝିଅ ରୋହିଣୀ। ବିହାରବାସୀଙ୍କୁ ଧୋକା ଦେଇଛନ୍ତି। ବିହାରରେ କୌଣସି ବିକାଶ ଦେଖିବାକୁ ମିଳୁନି। ବିହାରରେ ନୀତୀଶ ସରକାର କେବଳ ନାମକୁ ମାତ୍ର ବୋଲି କହିଛନ୍ତି। ସେପଟେ କଂଗ୍ରେସ ସାଂସଦ ଶଶୀ ଥରୁର ମଧ୍ଯ ନୀତୀଶଙ୍କୁ ସମାଲୋଚନା କରିଛନ୍ତି। ଇଂରାଜୀ ଭାଷାରେ ପାରଦର୍ଶିତା ଥିବା ସାଂସଦ ଶଶୀ ଥରୁର ନୀତୀଶଙ୍କୁ ସ୍ନଲିଗଷ୍ଟର ବୋଲି ଉଲ୍ଲେଖ କରିଛନ୍ତି। ନୀତୀଶଙ୍କୁ ଚତୁର କହିବା ସହ ନୀତିବିହୀନ ରାଜନେତା ବୋଲି କହିଛନ୍ତି ଶଶୀ ଥରୁର। ସେହିପରି କଂଗ୍ରେସ ନେତା ଜୟରାମ ରମେଶ ନୀତୀଶଙ୍କୁ ରଂଗବଦଳାଉଥିବା ଏଣ୍ଡୁଅ ବୋଲି କହିଛନ୍ତି।

ରାଜନେତା ତଥା ନିର୍ବାଚନୀ ରଣନୀତିଜ୍ଞ ପ୍ରଶାନ୍ତ କିଶୋର ନୀତୀଶ କୁମାରଙ୍କୁ ପଲଟୁମାର ନେତା ବୋଲି କହିଛନ୍ତି। ଇଣ୍ଡିଆ ମେଣ୍ଟରେ ଯୋଗ ଦେବା ପରେ କେତେବେଳେ ବି ନୀତୀଶ କୁମାର ମେଣ୍ଟ ଛାଡି ଦେଇପାରନ୍ତି ବୋଲି କହିଥିଲେ ପ୍ରଶାନ୍ତ କିଶୋର। ୨୦୧୮ରେ ଜେଡିୟୁରେ ଯୋଗ ଦେଇଥିଲେ ପ୍ରଶାନ୍ତ କିଶୋର। ଏହାପରେ ସେ ଦଳରେ ଉପସଭାପତି ପଦରେ ଅଳଙ୍କୃତ ହୋଇଥିଲେ। କିଛି ଦିନ ପରେ ଜେଡିୟୁରେ ସମାଲୋଚନାକୁ ନେଇ ପ୍ରଶାନ୍ତ କିଶୋରରୁ ଦଳକୁ ବିତାଡ଼ିତ କରିଥିଲେ ନୀତୀଶ କୁମାର। ୨୦୨୨ରେ ନୀତୀଶ ଏନଡିଏ ଛାଡି କଂଗ୍ରେସ ଏବଂ ଆରଜେଡିର ସହ ମେଣ୍ଟ କରି ସରକାର ଗଠନ କରିଥିଲେ।