ବିଦାୟୀ ତହସିଲଦାରଙ୍କୁ ଥାନାରେ ଦୀର୍ଘ ସମୟ ଧରି ଜେରା, ମାଲିକ ଓ ମ୍ୟାଡାମଙ୍କ ଭାଇରାଲ ଅଡିଓ ଯାଞ୍ଚ ପାଇଁ ଗଲା କୋଲକାତା

ମୟୂରଭଞ୍ଜ: ବେତନଟୀରେ ତହସିଲଦାର-ଖଣିମାଫିଆ ଲିଙ୍କ ଘଟଣାରେ ବଢ଼ିଲା ବିଦାୟୀ ତହସିଲଦାରଙ୍କ ଅଡ଼ୁଆ । ବେତନଟୀ ଓ ବୈଶିଙ୍ଗା ଥାନାରେ ଦୀର୍ଘ ସମୟ ପଚରାଉଚୁରା କରାଯାଇଛି । ତହସିଲଦାରଙ୍କ ମଧ୍ୟସ୍ଥି ଅଭିଜିତଙ୍କ ଘର ଯାଞ୍ଚ କଲା ପୁଲିସ। ଭାଇରାଲ ଅଡିଓ ଯାଞ୍ଚ ପାଇଁ କୋଲକାତା ପଠାଯାଇଛି । ଘଟଣାରେ ତଦନ୍ତ କରୁଥିବା ଅଧିକାରୀଙ୍କ ବଦଳି ହୋଇଛି ।

ତଦନ୍ତ ଅଧିକାରୀ ଏଆଇ ଅନନ୍ତ ଚରଣ ନାୟକ ଘଟଣାର ତଦନ୍ତ ଭାର ସମ୍ଭାଳିଥିବା ବେଳେ ଏବେ ବୈଶିଙ୍ଗା ଥାନା ଆଇଆଇସି ଲକ୍ଷ୍ମୀଧର ସ୍ୱାଇଁଙ୍କୁ ତଦନ୍ତର ଭାର ଦେଇଛନ୍ତି ବେତନଟୀ ଏସଡିପିଓ ଲଳିତ କୁମାର ପଟ୍ଟନାୟକ। ଦଲାଲକୁ ମାଧ୍ୟମ କରି ତହସିଲଦାର ଟ୍ରକ୍ ମାଲିକଙ୍କୁ ଲାଞ୍ଚ ମାଗିଥିଲେ । ଯାହାର ଏକ ଅଡିଓ ଟେପ୍ ଭାଇରାଲ ହୋଇଥିଲା ।

ଏହାକୁ ମିଛ ବୋଲି ଦର୍ଶାଇ ତହସିଲଦାର ଥାନାରେ ଏତଲା ଦେଇଥିବା ବେଳେ ହାଇଓ୍ୱା ମାଲିକ ମଧ୍ୟ ତହସିଲଦାରଙ୍କ ବିରୋଧରେ ଏତଲା ଦେଇଥିଲେ । ତେବେ ଘଟଣାର ତଦନ୍ତ ଚାଲିଥିବା ବେଳେ ସତ ପ୍ରମାଣିତ ହେଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ୍ କହିଛି ।