ନାବାଳକ ମଙ୍ଗଳସୁତ୍ର ଏବଂ ସିନ୍ଦୁର ପିନ୍ଧାଇ କ୍ଲାସ୍ ରୁମରେ ନାବାଳିକାକୁ କଲା ବିବାହ, ଭିଡିଓ ହେଲା ଭାଇରାଲ
ନୂଆଦିଲ୍ଲୀ: କଲେଜରେ ଅନେକ ସମୟରେ ବିଭିନ୍ନ ପ୍ରକାରର ଭିଡିଓ ଭାଇରାଲ ହୋଇଥାଏ । କେତେବେଳେ ଛାତ୍ରଛାତ୍ରୀ ସିଗାରେଟ ଟାଣୁଥିବାର ତ ପୁଣି କେତେବେଳେ ଛାତ୍ରଛାତ୍ରୀ ମଦ ପିଉଥିବାର ଭିଡିଓ ଫୋନରୁ ଫୋନକୁ ବୁଲୁଥିବା ଆପଣମାନେ ଦେଖିଥିବେ । କିନ୍ତୁ ଏବେ ଏମିତି ଏକ ଭିଡିଓ ଭାଇରାଲ ହୋଇଛି ଯାହା ଦେଖିଲେ ଆପଣ ଆଶ୍ଚର୍ଯ୍ୟ ହୋଇଯିବେ । ଯେଉଁଠାରେ ବାଲ୍ୟ ବିବାହକୁ ବନ୍ଦ କରିବା ପାଇଁ ଛାତ୍ରଛାତ୍ରୀ ମାନଙ୍କୁ ଶିକ୍ଷା ଦିଆଯାଏ । ସେହିଠାରେ ହୋଇଛି ବାଲ୍ୟ ବିବାହ ।
ହଁ ଆଜ୍ଞା ନାବାଳକ ଏବଂ ନାବାଳିକା ଶ୍ରେଣୀଗୃହରେ ବିବାହ କରିବାର ଘଟଣା ଏବେ ସାମ୍ନାକୁ ଆସିଛି । ଏହି ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ଶ୍ରେଣୀଗୃହରେ ବିବାହର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଏଭଳି ଏକ ଘଟଣା ଆନ୍ଧ୍ରପ୍ରଦେଶର ପୂର୍ବ ଗୋଦାବରୀ ଜିଲ୍ଲାର ରାଜାମହେନ୍ଦ୍ରବରମର ଜୁନିଅର କଲେଜରେ ଦେଖିବାକୁ ମିଳିଛି ।
ଏକ ଗଣମାଧ୍ୟମ ସଂସ୍ଥାର ରିପୋର୍ଟ ଅନୁଯାୟୀ, ଜଣେ ୧୭ ବର୍ଷର ବାଳକ ଶ୍ରେଣୀଗୃହରେ ନାବାଳିକାକୁ ମଙ୍ଗଳାସୁତ୍ର ପିନ୍ଧାଇବା ସହ ସିନ୍ଦୁର ଲଗାଇଛି । ଏହି ଘଟଣା ସାମ୍ନାକୁ ଆସିବା ପରେ ବାଲ୍ୟ ବିବାହ ଆଇନ ୨୦୦୬ ଅନୁଯାୟୀ ପୋଲିସ ଏକ ମାମଲା ରୁଜୁ କରିଛି । ତେବେ ଏହି ବିବାହ କରାଇଥିବା ବ୍ୟକ୍ତିଙ୍କୁ ଖୋଜୁଛି ପୋଲିସ । ଅଧିକାରୀମାନେ ମଧ୍ୟ ଏଭଳି ଘଟଣାକୁ ବହୁତ ନିନ୍ଦା କରିଛନ୍ତି ।
ଏହି ଘଟଣା ସେତେବେଳେ ସମସ୍ତଙ୍କର ସାମ୍ନାକୁ ଆସିଥିଲା ଯେତେବେଳେ ଭିଡିଓଟି ଭାଇରାଲ ହୋଇଥିଲା । ବିବାହ କରିଥିବା ନାବାଳକର ସାଙ୍ଗ ଭିଡିଓ ରେକର୍ଡ କରିଥିଲେ ବୋଲି ସୂଚନା ମିଳିଛି । ଘଟଣାରେ ଜଡ଼ିତ ଥିବା ଛାତ୍ରଛାତ୍ରୀଙ୍କୁ ଅନ୍ୟତ୍ର ସ୍ଥାନାନ୍ତର ପାଇଁ କଲେଜ ପକ୍ଷରୁ ନୋଟିସ କରାଯାଇଛି ।
ଆନ୍ଧ୍ରପ୍ରଦେଶ ମହିଳା ଆୟୋଗର ଅଧ୍ୟକ୍ଷ କହିଛନ୍ତି ଝିଅର ମାଆ ବାପା ତାଙ୍କୁ ଘରକୁ ଫେରିବାକୁ ଦେଇନାହାଁନ୍ତି । ସେଥିପାଇଁ ନାବାଳିକାକୁ କାଉନସେଲିଂ ପାଇଁ ଗୋଟିଏ ଷ୍ଟପ୍ ସେଣ୍ଟରକୁ ନିଆଯାଇଥିଲା ।
