ନନ୍ଦିଘୋଷ ବ୍ୟୁରୋ: ଆଜି ଏକାଦଶତମ ପ୍ରଧାନମନ୍ତ୍ରୀ ଭାବେ ଶପଥ ନେବେ ବିଏନପି ନେତା ତାରିକ ରହେମାନ। ଶପଥ ଗ୍ରହଣ ଉତ୍ସବ ସହ ବାଂଲାଦେଶର ନୂଆ ପ୍ରଧାନମନ୍ତ୍ରୀ ଭାବେ ଦାୟିତ୍ବ ନେବେ ତାରିକ । ଏହି ଉତ୍ସବ ବାଂଲାଦେଶ ସଂସଦ ଭବନର ସଦର୍ଣ୍ଣ ପ୍ଲାଜାରେ ଅନୁଷ୍ଠିତ ହେବ। ଦକ୍ଷିଣ ଏସିଆର ବହୁ ରାଷ୍ଟ୍ରର ନେତାଙ୍କୁ ଏହି ଉତ୍ସବକୁ ଆମନ୍ତ୍ରଣ କରାଯାଇଛି। ପ୍ରଥମେ ନବନିର୍ବାଚିତ ସାଂସଦମାନେ ଶପଥ ନେବେ । ପରେ ପ୍ରଧାନମନ୍ତ୍ରୀ ଭାବେ ତାରିକ ଶପଥ ନେବେ । ତାରିକଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇବେ ମୁଖ୍ୟ ନିର୍ବାଚନ କମିଶନର ଏଏମଏମ ନାସିର ଉଦ୍ଦିନ। କୂଟନୈତିକ ସଦଭାବ କ୍ରମେ ଅନ୍ତରୀଶ ଶାସକ ପ୍ରଫେସର ମହମ୍ମଦ ୟୁନୁସ ନିଜ ପକ୍ଷରୁ ୧୩ ରାଷ୍ଟ୍ରର ମୁଖ୍ୟଙ୍କୁ କରିଛନ୍ତି ଅନୁରୋଧ ।
ସେହି ରାଷ୍ଟ୍ର ମଧ୍ୟରେ ରହିଛନ୍ତି ଭାରତ, ଚୀନ, ସାଉଦିଆରବ, ପାକିସ୍ତାନ, ତୁର୍କୀ, ୟୁଏଇ, କତାର, ବ୍ରୁନେଇ, ମାଲେସିଆ, ଶ୍ରୀଲଙ୍କା, ନେପାଳ, ମାଳଦ୍ବୀପ, ଭୁଟ୍ଟାନ। ଶପଥ ଗ୍ରହଣ ଉତ୍ସବରେ ସାମିଲ ହେବା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ କରାଯାଇଛି ଆମନ୍ତ୍ରଣ। ତେବେ ଉତ୍ସବରେ ମୋଦୀ ସାମିଲ ହେବେ ନାହିଁ । ମୋଦୀଙ୍କ ବଦଳରେ ଉତ୍ସବରେ ସାମିଲ ହେବେ ଲୋକସଭା ବାଚସ୍ପତି ଓମ ବିରଲା। ପାକିସ୍ତାନ ପକ୍ଷରୁ ପ୍ରଧାନମନ୍ତ୍ରୀ ଶେହବାଜ ଶରିଫ ଯୋଗ ଦେବା ସମ୍ଭାବନା ରହିଛି। ବାପା ଜିଆଉର ରହେମାନଙ୍କ ଦ୍ବାରା ପ୍ରତିଷ୍ଠିତ ବିଏନପି ଏବେ ଦେଶର ନେବ ନେତୃତ୍ବ। ଦୀର୍ଘ ୧୭ ବର୍ଷ ପରେ ନିର୍ବାସନରେ ରହି ସ୍ବଦେଶ ଫେରିଥିବା ପୁଅ ତାରିକ ରହେମାନ ହେବେ ପ୍ରଧାନମନ୍ତ୍ରୀ। ନିର୍ବାଚନରେ ତାଙ୍କ ଦଳ ପ୍ରାୟ ୬୦ ପ୍ରତିଶତ ଭୋଟ ହାସଲ କରିଥିଲା।
