’ଶୀଘ୍ର ଶୀଘ୍ର ଛୁଆ ଜନ୍ମ କର’: ଅଧିକ ପିଲା ଜନ୍ମ କରିବାକୁ ନବ ବିବାହିତ ଦମ୍ପତିମାନଙ୍କୁ ଆହ୍ବାନ ଦେଲେ ମୁଖ୍ୟମନ୍ତ୍ରୀ

ଚେନ୍ନଇ: ଶୀଘ୍ର ଶୀଘ୍ର ଛୁଆ ଜନ୍ମ କରିବାକୁ ତାମିଲନାଡ଼ୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ ଲୋକଙ୍କୁ ଅପିଲ କରିଛନ୍ତି । ତାମିଲନାଡ଼ୁ ପାଇଁ ସଫଳ ଫ୍ୟାମିଲୀ ପ୍ଲାନିଂ ଲାଗୁ କରିବା ଏକ କ୍ଷତିକାରକ ପଦେକ୍ଷପ । ଜନସଂଖ୍ୟା ଆଧାରିତ ଡିଲିମିଟେସନ ତାମିଲନାଡ଼ୁର ରାଜନୈତିକ ପ୍ରତିନିଧିତ୍ବକୁ ପ୍ରଭାବି କରିବାର ସମ୍ଭାବନା ରହିଛି । ତେଣୁ ଏହା ଉପରେ ଧ୍ୟାନ ଦେବା ଜରୁରୀ । କେନ୍ଦ୍ର ସରକାର ୨୦୨୬ରେ ଲୋକସଭା ଆସନର ଡିଲିମିଟେସନ କରି ପାରନ୍ତି । ଜନସଂଖ୍ୟାକୁ ଆଧାର କରି ଲୋକସଭା ଓ ବିଧାନସଭା ନିର୍ବାଚନ ମଣ୍ଡଳୀ ସୀମା ପୁନଃନିର୍ଦ୍ଧାରଣ ହେବ । ତାମିଲନାଡ଼ୁ ସମେତ ୫ଟି ଦକ୍ଷିଣ ଭାରତୀୟ ରାଜ୍ୟରେ ଲୋକସଭା ଆସନ ସଂଖ୍ୟା ହ୍ରାସ ପାଇପାରେ । ତେଣୁ ଶୀଘ୍ର ଶୀଘ୍ର ଅଧିକ ପିଲା ଜନ୍ମ କରିବାକୁ ନବବିବାହିତ ଦମ୍ପତିଙ୍କୁ ସିଏମ୍ ଆହ୍ବାନ ଦେଇଛନ୍ତି ।

ଏକ ବିବାହ ଉତ୍ସବରେ ସାମିଲ ହେବା ଅବସରରେ ମୁଖ୍ୟମନ୍ତ୍ରୀ ଷ୍ଟାଲିନ ଏପରି କହିଛନ୍ତି । କମ୍ ଲୋକସଭା ପାଇଁ ଆସନ ସଂଖ୍ୟା କମିଯାଇପାରେ । ଅଧିକ ଜନସଂଖ୍ୟା ଥିବା ରାଜ୍ୟକୁ ଅଧିକ ପ୍ରତିନିଧିତ୍ବ କରିବାର ସୁଯୋଗ ମିଳିବ । ତେଣୁ ଅଧିକ ପିଲା ଜନ୍ମ ନକଲେ ଅତିକମରେ ୮ଟି ଆସନ ହରାଇବାକୁ ପଡ଼ିପାରେ । ସମୟ ନିଅ, ବିଚାର କର ଓ ସମୟକୁ ଦୃଷ୍ଟିରେ ରଖି ଶିଶୁ ଜନ୍ମ କରିବାକୁ ପୂର୍ବରୁ କୁହାଯାଉଥିଲା । ମାତ୍ର ଏବେ ସ୍ଥିତି ବଦଳି ଯାଇଛି । ଆମକୁ ତୁରନ୍ତ ଛୁଆ ଜନ୍ମ କରିବା ଉଚିତ ବୋଲି ମୁଖ୍ୟମନ୍ତ୍ରୀ କହିଛନ୍ତି । ସୂଚନାଯୋଗ୍ୟ ଯେ, ସୀମା ପୁନଃନିର୍ଦ୍ଧାରଣ ପ୍ରସଙ୍ଗ ଉପରେ ଆଲୋଚନା କରିବା ପାଇଁ ଷ୍ଟାଲିନ ମାର୍ଚ୍ଚ ୫ରେ ଏକ ସର୍ବଦଳୀୟ ବୈଠକ ଡକାଇଛନ୍ତି । ସମସ୍ତେ ଏକ ଏକହୋଇ ତାମିଲନାଡ଼ୁର ଭବିଷ୍ୟତ ଉପରେ ବିଚାର କରିବାକୁ ସେ କହିଛନ୍ତି ।