କିଛିଦିନ ତଳେ ଆଫଗାନ ସିଙ୍ଗରଙ୍କୁ ଚା’ ପିଆଇଥିଲେ ତାଲିବାନୀ, ଏବେ କଲେ ହତ୍ୟା

କାବୁଲ: କଥାରୁ ହଟୁଛି ତାଲିବାନ । ଆଫଗାନିସ୍ତାନ କବଜା ପରେ ତାଲିବାନ ନାଗରିକଙ୍କ ସୁରକ୍ଷା ନେଇ କଥା ଦେଇଥିଲା । ହେଲେ ଏବେ ନିଜେ ତାଲିବାନ ଗୋଟିଏ ପରେ ଗୋଟିଏ ହିଂସାକାଣ୍ଡ ଘଟାଉଛି । ମହିଳାଙ୍କ ଉପରେ ଅତ୍ୟାଚାର ପରେ ଜଣେ ସିଙ୍ଗରଙ୍କୁ ହତ୍ୟା କରିଛି ତାଲିବାନ । କାବୁଲଠାରୁ ୧୦୦ କିଲୋମିଟର ଦୂର ବଗଲାନ ପ୍ରଦେଶର ଅନ୍ଦ୍ରାବରେ ଜଣେ ଗାୟକ ଫବାଦ ଅନ୍ଦ୍ରାବୀଙ୍କୁ ତାଲିବାନ ଗୁଳି କରି ହତ୍ୟା କରିଛି ।

ସ୍ଥାନୀୟ ଗଣମାଧ୍ୟମ ଅନୁସାରେ, ଗୁଳି ମାରିବା ପୂର୍ବରୁ ଗାୟକ ଜଣଙ୍କୁ ତାଲିବାନ ଘରୁ ଘୋଷାଡ଼ି ଆଣିଥିଲା । ପରେ ହତ୍ୟା କରିଛନ୍ତି । ଏହି ହତ୍ୟାକାଣ୍ଡ ନେଇ ଆଫଗାନିସ୍ତାନର ପୂର୍ବତନ ଗୃହମନ୍ତ୍ରୀ ମସୁଦ ଅନ୍ଦ୍ରାବୀ ସ୍ପଷ୍ଟ କରିଛନ୍ତି ।

ଫବାଦଙ୍କ ପରିବାର ଅନୁସାରେ, କିଛିଦିନ ତଳେ ତାଲିବାନୀ ଆସି ତାଙ୍କ ଘରେ ସର୍ଚ୍ଚ କରିଥିଲେ । ସେତେବେଳେ ତାଲିବାନୀ ଘରେ ଚା’ ପିଇବା ସହ କାହାକୁ ବି କ୍ଷତି ପହଞ୍ଚାଇବେ ନାହିଁ ବୋଲି ଭରସା ଦେଇଥିଲେ । ଏହା ପୂର୍ବରୁ ବି ତାଲିବାନ ସେଠାରେ ଆଉ ଜଣେ କଳାକାରଙ୍କୁ ଆକ୍ରମଣ କରିଥିଲା ।