ଆଫଗାନିସ୍ତାନର ଅଭେଦ୍ୟ ଦୁର୍ଗ ପଞ୍ଜଶୀର ଦଖଲ ପାଇଁ ଅଭିଜାନ ଆରମ୍ଭ କଲା ତାଲିବାନ
କାବୁଲ: ତାଲିବାନ ପୁରା ଦେଶକୁ ଅଧିକାର କରିବା ପରେ ଏବେ ପଞ୍ଜଶୀର ଅଭିଯାନ ଆରମ୍ଭ କରିଛି। ପଞ୍ଜଶୀର ହେଉଛି ଦେଶର ଏକମାତ୍ର ସ୍ଥାନ ଯାହା ଏପର୍ଯ୍ୟନ୍ତ ତାଲିବାନର ଅଧିନତା ସ୍ୱୀକାର କରିନାହିଁ। ପଞ୍ଜଶୀର ଘାଟିରୁ ନିଜକୁ ଅସଲ ରାଷ୍ଟ୍ରପତି ବୋଲି ଦାବି କରୁଥିବା ଅମରୁଲ୍ଲା ସାଲେହ ଓ ଅହମ୍ମଦ ମାସୁଦ ତାଲିବାନ ବିରୋଧରେ ଶେଷ ଯୁଦ୍ଧ କଥା ଘୋଷଣା କରିଛନ୍ତି।
ପଞ୍ଜଶୀର ଘାଟିର ଆଧିକାରିକ ଟ୍ୱିଟର ଆକାଉଣ୍ଟରୁ ତାଲିବାନ ଅଭିଯାନ ବାବଦରେ କୁହାଯାଇଛି। ଏଥିରେ ତାଲିବାନ ପଞ୍ଜଶୀର ଉପରେ ଆକ୍ରମଣ କରିବାକୁ ତା’ର ସେନାକୁ ପଠାଇଥିବା ଦାବି କରାଯାଇଛି।
ଅନ୍ୟପକ୍ଷରେ ପଞ୍ଜଶୀର ପକ୍ଷରୁ ତାଲିବାନ ଆକ୍ରମଣର କଡା ଉତ୍ତର ଦିଆଯିବ ବୋଲି କୁହାଯାଇଛି । ପଞ୍ଜଶୀରର ଜଣେ କମାଣ୍ଡର କହିଛନ୍ତି ଯେ, ତାଲିବାନ ଯଦି ଘାଟି ଉପରେ ଆକ୍ରମଣ କରେ ତେବେ ତାକୁ ଉଚିତ ଉତ୍ତର ଦିଆଯିବ । ସୂଚନାଯୋଗ୍ୟ ଯେ, କାବୁଲଠାରୁ ମାତ୍ର ୧୫୦ କିଲୋମିଟର ଦୂରରେ ଥିବା ପଞ୍ଜଶୀର ତାଲିବାନ ପାଇଁ ବଡ଼ ଚ୍ୟାଲେଂଜ୍ । କାରଣ ପୂର୍ବରୁ ସୋଭିଏତ ଋଷ ଓ ତାଲିବାନର ପ୍ରଥମ ଶାସନ କାଳରେ ମଧ୍ୟ ଏହି ଘାଟି ସ୍ୱାଧିନ ଥିଲା । ସୋଭିଏତ ଋଷ ବିରୋଧରେ ବିଦ୍ରୋହର ନାୟକ ଥିବା ଅହମ୍ମଦ ଶାହା ମାସୁଦ ଏହି ଉପତ୍ୟକାକୁ ଏକ ଅଭେଦ୍ୟ ଦୁର୍ଗରେ ପରିଣତ କରିଥିଲେ ।
ଋଷ କରିବ ମଧ୍ୟସ୍ଥି ?
ପଞ୍ଜଶୀରକୁ ଅଧିକାର କରିବା ସହଜ ନୁହେଁ। ଏଥିପାଇଁ ରକ୍ତପାତ ହୋଇପାରେ। ଅଧିକ ରକ୍ତପାତରୁ ବଂଚିବା ପାଇଁ ତାଲିବାନ ଏହି ମାମଲାରେ ଋଷର ହସ୍ତକ୍ଷେପ ଚାହିଁଛି । ତାଲିବାନ ପଞ୍ଜଶୀର ମାମଲାର ରାଜନୈତିକ ସମାଧାନ ଚାହୁଁଥିବା ଋଷ ରାଷ୍ଟ୍ରଦୂତ କହିଛନ୍ତି। ତାଲିବାନ ତରଫରୁ ଏଥିପାଇଁ ଋଷକୁ ଅନୁରୋଧ କରାଯାଇଛି।
