୨୦ ବର୍ଷିୟ ଯୁବତୀଙ୍କ କିଡନୀରୁ ବାହାରିଲା ୩ଶହ ଷ୍ଟୋନ୍, ପ୍ରତିଦିନ ପିଉଥିଲେ ଏହିସବୁ ଜିନିଷ

ତାଇୱାନ୍: ତାଇୱାନର ୨୦ ବର୍ଷିୟ ଯୁବତୀ ୟାଓ ୟୁଙ୍କ କିଡନୀରୁ ବାହାରିଲା ୩ଶହ ଷ୍ଟୋନ୍। ଜ୍ବର ଓ ତଳିପେଟ ଯନ୍ତ୍ରଣା ପରେ ଅଲଟ୍ରାସାଉଣ୍ଡ ସ୍କାନ୍ ରେ ଜଣା ପଡିଥିଲା ଏସମ୍ପର୍କରେ। ମହିଳା ଜଣକ ଦୀର୍ଘବର୍ଷ ଧରି ପିଉନଥିଲେ ପାଣି। ଶୋଷ ହେଲେ ବବଲ୍ ଚା, ଫଳ ରସ ଓ ମଦ୍ୟପାନ କରୁଥିଲେ।  ଫଳରେ କିଡନୀ ସଠିକ୍ ଭାବରେ କାର୍ଯ୍ୟ କରୁନଥିଲା।

ଫଳ ରସ, ମଦ ଓ ବବଲ ଚା କିଡନୀରେ ଖଣିଜ ପଦାର୍ଥ ଜମା ହେବା ଯୋଗୁଁ ଷ୍ଟୋନ ହୋଇଥିଲା। ପ୍ରତ୍ୟେକ ଷ୍ଟୋନ୍ ର ସାଇଜ ୫ ଏମଏମରୁ ୨ ସିଏମ ମଧ୍ୟରେ ରହିଥିଲା। ଗୋଟିଏ ସ୍ଥାନରେ ଗଦା ହୋଇ ରହିଥିବା ଏହି ଷ୍ଟୋନ୍ ବନ୍ ବ୍ରେଡ ଭଳି ଦେଖାଯାଉଥିଲା। ତାଇୱାନର ଚି ମେଇ ଡାକ୍ତରଖାନାରେ ଡାକ୍ତରଙ୍କ ଅକ୍ଲାନ୍ତ ଚେଷ୍ଟା ଫଳରେ ଏହି ସମସ୍ତ ଷ୍ଟୋନ୍ କୁ ବାହାର କରାଯାଇଥିଲା। ଏକ ଡାକ୍ତରୀ ଟିମ୍ ଦୀର୍ଘ ୨ଘଣ୍ଟା ଧରି ଅସ୍ତ୍ରୋପଚାର କରି ଏହି ସମସ୍ତ ଷ୍ଟୋନ୍ ବାହାର କରିଥିଲେ। ଏହି ଅସ୍ତ୍ରୋପଚାରକୁ ପରକ୍ୟୁଟାନିୟସ ନେଫ୍ରୋଲିଥୋଟୋମି ବୋଲି କୁହାଯାଏ।

ଅସ୍ତ୍ରୋପଚାରର କିଛି ଦିନ ପରେ ସଂପୃକ୍ତ ଯୁବତୀଙ୍କୁ ଡାକ୍ତରଖାନାରୁ ଡିସଚାର୍ଜ କରାଯାଇଥିଲା। ଯୁବତୀଙ୍କ ଅସ୍ତ୍ରୋପଚାର କରିଥିବା ଡାକ୍ତର ଲିମ୍ ଚେୟେ ୟାଙ୍ଗ କହିଛନ୍ତି ଯେ, ପର୍ଯ୍ୟାପ୍ତ ପାଣି ଅଭାବରୁ କିଡନୀରେ ଷ୍ଟୋନ୍ ହୋଇଥିଲା। ଶରୀରରେ କାଲସିୟମ ଓ ପ୍ରୋଟିନର ଅଭାବ ମଧ୍ୟ କିଡନୀ ଷ୍ଟୋନ୍ ହେବାର ମୁଖ୍ୟ କାରଣ। ମହିଳାଙ୍କ ତୁଳନାରେ ପୁରୁଷଙ୍କ ଶରୀରରେ ସର୍ବାଧିକ କିଡନୀ ଷ୍ଟୋନ୍ ହେବା ଆଶଙ୍କା ରହିଥାଏ। ପର୍ଯ୍ୟାପ୍ତ ପରିମାଣର ପାଣି ପିଇଲେ କିଡନୀ ଷ୍ଟୋନ୍ ହେବା ଆଶଙ୍କା ୯.୪ ପ୍ରତିଶତ କମ ହୋଇଥାଏ।