ସାଇକେଲରେ ଆସି ଦରଜି କଲେ ନାମାଙ୍କନ, କହିଲେ- ବିଧାୟକ ହେଲେ ପ୍ରଥମେ କରିବି ନିଜ ବିକାଶ
1 min read
ପାଟଣା: ବିଧାୟକ ହେଲେ ଲୋକଙ୍କ ବିକାଶ କରିବି । ଏହି କଥା ଆପଣ ନେତାଙ୍କ ମୁହଁରୁ ନାମାଙ୍କନ ଭରିବା ପରେ ଅଧିକାଂଶ ସମୟ ଶୁଣିଥିବେ । କିନ୍ତୁ, ଶେଖପୁରାର ବରବିଘା ଆସନରୁ ନାମାଙ୍କନ କରିବା ପରେ ଜଣେ ପ୍ରାର୍ଥୀ ଯାହା କହିଛନ୍ତି ଜାଣିଲେ ଆପଣ ବି ଚମକି ପଡ଼ିବେ । ପେସାରେ ଦରଜି ଥିବା ବ୍ୟକ୍ତି ସାଇକେଲରେ ଆସି ନାମାଙ୍କନ କରିଥିଲେ । କହିଥିଲେ- ଯଦି ବିଧାୟକ ହେବି ତ ପ୍ରଥମେ ନିଜ ବିକାଶ କରିବି, ପରେ ଜନତାଙ୍କୁ ଦେଖିବି ।
ଶଖପୁରା ଜିଲ୍ଲା ବିରବିଘା ବିଧାନସଭା ପୁରନକାମ ଗାଁର ରାଜେନ୍ଦ୍ର ପ୍ରସାଦ ନାମାଙ୍କନ ପତ୍ର ଦାଖଲ କରିଛନ୍ତି । ପେସାରେ ଦରଜି ଥିବା ରାଜେନ୍ଦ୍ର ପ୍ରସାଦ ଘରୁ ସାଇକେଲରେ ବାହାରି ନାମାଙ୍କନ ପାଇଁ ପହଞ୍ଚି ଥିଲେ । ନାମାଙ୍କନ ପରେ ସେ କହିଛନ୍ତି- ଗଣତନ୍ତ୍ରକୁ ମଜଭୁତ୍ କରିବାକୁ ମୁଁ ପ୍ରାର୍ଥିପତ୍ର ଭରିଛି ।
ଗଣମାଧ୍ୟମ ସହ କଥାହେବା ବେଳେ ରାଜେନ୍ଦ୍ର ସିଧା ସିଧା କହିଛନ୍ତି- ନିର୍ବାଚନ ପରେ ଯଦି ସେ ବିଧାୟକ ହୁଅନ୍ତି । ତ ପ୍ରଥମେ ନିଜର ବିକାଶ କରିବେ । ସେ ଆହୁରି କହିଛନ୍ତି- ବିଧାୟକ ହେବା ପରେ ଲୋକ ଦିଲ୍ଲୀ, ମୁମ୍ବାଇରେ ଫ୍ଲାଟ କିଣୁଛନ୍ତି, ଧନ ସମ୍ପତ୍ତି ବଢ଼ାଉଛନ୍ତି ।
ମୁଁ ଦୀର୍ଘ ବର୍ଷ ଧରି ପରିଶ୍ରମ କରି ଆସୁଛି । କିନ୍ତୁ, ମୋ ପାଖେ ଏବେ କିଛି ନାହିଁ । ତାଙ୍କ କହିବାର ଉଦ୍ଦେଶ୍ୟ- ବିଧାୟକ ହେବା ପରେ ସେ ଘର ତିଆରି କରିପାରିବେ, ନିଜ ପରିବାରର ବିକାଶ କରିପାରିବେ । ଏହି ଉଦ୍ଦେଶ୍ୟ ନେଇ ସେ ପ୍ରାର୍ଥିପତ୍ର ଦାଖଲ କରିଛନ୍ତି । ତାଙ୍କ ପ୍ରାର୍ଥିପତ୍ର ଦାଖଲକୁ ନେଇ ସୋସିଆଲ୍ ମିଡିଆରେ ଜୋରଦାର ଚର୍ଚ୍ଚା ହେଉଛି ।
