ଟିମ୍ ହାରୁଛି ଦେଖି ଷ୍ଟାଡିୟମରେ ଚୁପଚାପ ଭାରତୀୟ ଜର୍ସି ପିନ୍ଧିଲେ ପାକିସ୍ତାନୀ ଫ୍ୟାନ୍

ନନ୍ଦିଘୋଷ ବ୍ୟୁରୋ: ବହୁ ଅପେକ୍ଷାର ଅନ୍ତ ଘଟିଛି  । ଶେଷରେ ପାକିସ୍ତାନ ବିପକ୍ଷରେ ଭାରତୀୟ ଦଳ ବିଜୟର ମୁକୁଟ ପିନ୍ଧିଛି । ଚମ୍ପିୟାନ୍ସ ଟ୍ରଫିରେ ଭାରତ ବିପକ୍ଷରେ ପାକିସ୍ତାନକୁ ପରାଜୟର ସ୍ବାଦ ଚାଖିବାକୁ ପଡିଛି । ଟିମ ଇଣ୍ଡିଆ ପାକିସ୍ତାନକୁ ୬ଓ୍ବିକେଟରେ ପରାସ୍ତ କରି ସେମିଫାଇନାଲ ରାସ୍ତାକୁ ସଫା କରିଦେଇଛି । ତେବେ ପାକିସ୍ତାନ ପରାସ୍ତ ହେବା ପରେ ପାକିସ୍ତାନ ପ୍ରଶଂସକଙ୍କର ହୃଦୟ ଭାଙ୍ଗିଯାଇଛି । ଷ୍ଟାଡିୟମରେ ନିରାଶ ଚେହେରା ସହିତ ସୋସିଆଲ ମିଡିଆର ସମାଲୋଚନା ଦେଖିଲେ ଜଣାପଡୁଛି କି ପାକିସ୍ତାନକୁ ଏକ ବଡ ଝଟକା ଲାଗିଛି  । ଗତକାଲି ଦୁବାଇରେ ଖେଳାଯାଇଥିବା ମ୍ୟାଚରେ ପାକିସ୍ତାନ ପ୍ରଥମେ ଟସ୍ ଜିତି ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ମାତ୍ର ୨୪୧ରନ କରି ଅଲଆଉଟ ହୋଇଯାଇଥିଲା । ଟିମ୍ ଇଣ୍ଡିଆ ଆଗରେ ଟାର୍ଗେଟ ଥିଲା ୨୪୨ ରନ୍। ବିରାଟ କୋହଲିଙ୍କ ନଟ୍ ଆଉଟ୍ ସେଞ୍ଚୁରି ବଳରେ ଏହି ଲକ୍ଷ୍ୟକୁ ଟିମ୍ ସହଜରେ ହାସଲ କରିନେଇଥିଲା।

https://twitter.com/i/status/1893849986644791551

ତେବେ ମ୍ୟାଚ ଚାଲିଥିବା ଭିତରେ ଷ୍ଟାଡିୟମରେ କିଛି ମଜାଦାର ଜିନିଷ ଦେଖିବାକୁ ମିଳିଥିଲା । କିଛି ସ୍ଥାନରେ ପାକିସ୍ତାନୀ ପ୍ରଶଂସକଙ୍କ ଆଖିରେ ଲୁହ ଥିବା ବେଳେ କିଛି ପ୍ରଶଂସକ ପାକିସ୍ତାନ ପ୍ରଶଂସକରୁ ଭାରତର ପ୍ରଶଂସକ ପାଲଟିଯାଇଥିଲେ । ଷ୍ଟାଡିୟମରୁ ଏକ ଭିଡିଓ ଭାଇରାଲ ହେଉଛି ଯେଉଁଥିରେ କିଛି ପାକିସ୍ତାନୀ ପ୍ରଶଂସକ ନିଜ ଜର୍ସି ବଦଳାଇଥିବାର ଦେଖିବାକୁ ମିଳୁଛି । ମ୍ୟାଚ ଆରମ୍ଭରେ ସେମାନେ ପାକିସ୍ତାନୀ ଜର୍ସି ପିନ୍ଧିଥିଲେ କିନ୍ତୁ ଯେତେବେଳେ ପାକିସ୍ତାନ ହାରିବାକୁ ଲାଗିଥିଲେ ସେତେବେଳେ ସେମାନେ ଚୁପଚାପ ଭାରତୀୟ ଜର୍ସି ପିନ୍ଧିଥିଲେ । ଏହାକୁ ଦେଖି ଅନ୍ୟମାନେ ହସିବା ସହିତ ସମାଲୋଚନା କରିଥିଲେ । ସୋସିଆଲ ମିଡିଆରେ ଏହି ଭିଡିଓ ଜୋରଦାର ଭାଇରାଲ ହେଉଥିବା ବେଳେ ୟୁଜରର୍ସ ମାନେ ବିଭିନ୍ନ କମେଣ୍ଟ ଦେଉଛନ୍ତି ।

ଟିମ ଇଣ୍ଡିଆର ବିଜୟ ସହିତ ଭାରତର ସେମିଫାଇନାଲ ଟିକଟ ଏକ ରକମର ପକ୍କା ହୋଇଥିବା ବେଳେ ପାକିସ୍ତାନ ଟୁର୍ଣ୍ଣାମେଣ୍ଟରୁ ବାଦ୍ ପଡ଼ିବାର ଆଶଙ୍କା ଦେଖାଦେଇଛି। ନିଜର ପ୍ରଥମ ମ୍ୟାଚରେ ବାଂଲାଦେଶକୁ ଭାରତ ହରାଇଥିବା ବେଳେ ମାର୍ଚ୍ଚ ୨ରେ ନ୍ଯୁଜିଲାଣ୍ଡ ସହିତ ଶେଷ ଲିଗ୍ ମ୍ୟାଚ ।