ଓଡ଼ିଶାର ବାଉଁଶ କାରିଗର ବିହାର ଜମୂଇରେ ତିଆରି କରୁଛନ୍ତି କାଠ ଷ୍ଟାଡିୟମ…

ଭୁବନେଶ୍ୱର, କୌଣସି ଷ୍ଟାଡିୟମ କଥା ଉଠିଲେ, ଆଖି ଆଗକୁ ଚାଲି ଆସେ ସୁବିସ୍ତୀର୍ଣ୍ଣ ପଡ଼ିଆ, ସିମେଣ୍ଟରେ ନିର୍ମିତ ସେଡ୍, ବସିବା ପାଇଁ ଷ୍ଟାଣ୍ଡ ଏବଂ ପ୍ଲାଷ୍ଟିକ ସାମଗ୍ରୀ  । ହେଲେ ବିହାର ଜାମୂଇ ଜିଲାରେ ନିର୍ମାଣ ହେବାକୁ ଯାଉଛି ଏକ ନିଆରା ଷ୍ଟାଡିୟମ । ଏହି ଷ୍ଟାଡିୟମରେ ପ୍ଲାଷ୍ଟିକ କି ସିମେଣ୍ଟ ନୁହେଁ, ସମସ୍ତ ଜିନିଷ ବାଉଁଶ ତଥା ଅନ୍ୟାନ୍ୟ କାଠରେ ନିର୍ମିତ ହେଉଛି । କହିବାକୁ ଗଲେ ଏକ ଉଡେନ ଷ୍ଟାଡିୟମ ପ୍ରତୀକ୍ଷାରେ ରହିଛି ଜାମୂଇ ଜିଲା । ହେଲେ ଇଏ ତ ବିହାର କଥା । ଏହାର ଓଡ଼ିଶା ସହିତ କଣ ସମ୍ପର୍କ ରହିଛି ।

ସେହି ଷ୍ଟାଡିୟମର ପୂର୍ବ ରୂପ ବଦଳାଇ ତାକୁ ପୂର୍ଣ୍ଣ ଭାବେ ପ୍ରାକୃତିକ ରୂପ ଦେଉଥିବା ବାଉଁଶ କାରିଗର ହେଉଛନ୍ତି ଜଣେ ଓଡ଼ିଆ । ସିଏ ହେଉଛନ୍ତି ମୟୂରଭଞ୍ଜ ଜିଲାର ଆନନ୍ଦ ମହନ୍ତ । ଷ୍ଟାଡିୟମ ସଜ୍ଜାଇବା ପୂର୍ବରୁ କଟେଜ୍ ହାଉସ, ବାଉଁଶ ଦୋଳି, ବାଉଁଶ ନିର୍ମିତ ସୋଫା ସେଟ୍ , ବାଉଁଶ ନିର୍ମିତ ଏକାଧିକ ଆନୁଷଙ୍ଗିକ ଆସବାପତ୍ର ନିର୍ମାଣ କରି ପ୍ରଶଂସା ସାଉଁଟି ସାରିଛନ୍ତି ।

କେମିତି ଚାଲିଛି ଉଡେନ ଷ୍ଟାଡିୟମ

୨୦୧୯ ମସିହାରେ ପରିକଳ୍ପନା କରାଯାଇଥିବା ଏପରି ଏକ ଷ୍ଟାଡିୟମକୁ ଚଳିତ ବର୍ଷ ପ୍ରାରମ୍ଭରେ ନୂଆ ରୂପ ଦେବା ଆରମ୍ଭ କରାଯାଇଥିଲା । ପ୍ରାଥମିକ ଭାବେ ପ୍ରାୟ ୫ଟି ବଡ଼ ଟ୍ରକରେ ପରିପୂର୍ଣ୍ଣ ହୋଇଥିବା ବାଉଁଶକୁ ଭିତ୍ତି କରି ନିର୍ମିତ ହେଉଛି ବିଭିନ୍ନ ସାମଗ୍ରୀ । କେବଳ ଆନନ୍ଦ ନୁହଁନ୍ତି, ଆନନ୍ଦଙ୍କୁ ସହଯୋଗ କରୁଛନ୍ତି ଅନ୍ୟ ୮ ଜଣ କାରିଗର ଓ ଶ୍ରମିକ । ଅଧିକାଂଶ କାର୍ଯ୍ୟ ସରିଥିଲେ ବି ପୂର୍ଣ୍ଣରୂପରେ ଷ୍ଟାଡିୟମ ସରିବାରୁ ଆହୁରି ୧୧ ମାସ ସମୟ ଲାଗିବ ।  ଏହି ଷ୍ଟାଡିୟମ ଚାରିପଟେ ବେଳାଭୂମିରେ ଶୋଭା ପାଉଥିବା ପ୍ରାକୃତିକ କଟେଜ ପ୍ରସ୍ତୁତ କରାଯାଉଛି । ଏଥିରେ ସମସ୍ତ ଆସବାପତ୍ର ଠାରୁ ଆରମ୍ଭ କରି ପେନ୍ ଷ୍ଟାଣ୍ଡ ପର୍ଯ୍ୟନ୍ତ ସବୁ ବାଉଁଶରେ ନିର୍ମିତ ହୋଇଛି । ବସିବା ପାଇଁ ବାଉଁଶରେ ଚୌକି ମଧ୍ୟ ନିର୍ମାଣ କରାଯାଇଛି । ନିର୍ମାଣ କାର୍ଯ୍ୟ ପ୍ରାୟତଃ ସରିଥିଲେ ମଧ୍ୟ ଫିନିଶିଂ, କଲରିଂ ଏବଂ ଏହାକୁ ଦୀର୍ଘଦିନ କିପରି ରଖିହେବ, ସେ କାର୍ଯ୍ୟ ଏବେ ଜାରି ରହିଛି । ଚଳିତ ବର୍ଷ ମାର୍ଚ୍ଚ ଶେଷ ସପ୍ତାହରୁ ଆରମ୍ଭ ହୋଇଥିବା ଲକ୍ ଡାଉନ ସମୟରୁ ହିଁ ଏହି କାର୍ଯ୍ୟ ଆନନ୍ଦ ଓ ତାଙ୍କ ସହଯୋଗୀ ଆରମ୍ଭ କରିଥିଲେ । ସେ କିମ୍ବା କୌଣସି ସହଯୋଗୀ  ନିଜ ଘରକୁ ଯିବାର ସମ୍ଭାବନା ନ ଥିଲା । ତେଣୁ ପୂର୍ଣ୍ଣଭାବେ ସମୟର ସଦୁପଯୋଗ କରିଥିଲେ ଆନନ୍ଦ ।

କେବେଠାରୁ ବାଉଁଶ ଶିଳ୍ପ ସହ ଜଡିତ ହେଲେ ଆନନ୍ଦ?

ଆମ ସମସ୍ତଙ୍କ ଭଳି ସ୍କୁଲ ଶିକ୍ଷା ସାମପ୍ତ ପରେ ବେତନଟୀ ଅଞ୍ଚଳରେ ଇଣ୍ଟର କଲେଜ ପର୍ଯ୍ୟନ୍ତ ଶିକ୍ଷା ଗ୍ରହଣ କରିଥିଲେ ଆନନ୍ଦ । ମୟୂରଭଞ୍ଜ ଅଞ୍ଚଳର ଅଧିବାସୀ ହୋଇଥିବାରୁ ପ୍ରାଥମିକ ଭାବେ ଶାଳ ପତ୍ର, କେନ୍ଦୁପତ୍ର ସଂଗ୍ରହ ବିକ୍ରି ଇତ୍ୟାଦି କରୁଥିଲେ । ଏସବୁ କୁ ଛୋଟ ଛୋଟ ବ୍ୟବସାୟୀଙ୍କୁ ଯୋଗାଉଥିଲେ । ଏହି ପତ୍ରରୁ ଖଲି, ଚା କପ, ଭୋଗେଇ ନିର୍ମାଣ କାର୍ଯ୍ୟ ମଧ୍ୟ ଆନନ୍ଦ କିଛି କିଛି କରୁଥିଲେ । ଦିନ ଗଡିବା ସହ ପରିବାର ପ୍ରତିପୋଷଣ ପାଇଁ ଏହି ଧାରାକୁ ଆପଣାଇଲେ । ଏହି ଧାରାରେ କିଛି ଭିନ୍ନ କରି ଦେଖାଇବା ପାଇଁ ଆନନ୍ଦଙ୍କ ମନରେ କେଉଁଠି ନା କେଉଁଠି ଆଗ୍ରହ ରହିଥିଲା । ତେଣୁ ଉପଯୁକ୍ତ ସୁଯୋଗର ସନ୍ଧାନରେ ଥିଲେ ଆନନ୍ଦ ।

୨୦୦୮ ଜାତୀୟ ବାଉଁଶ କର୍ମଶାଳା ବଦଳାଇଥିଲା ଜୀବନ ମୋଡ

କେନ୍ଦ୍ର ସରକାରଙ୍କ ପକ୍ଷରୁ ଡେରାଡୁନରେ ୨୦୦୮ ମସିହାରେ ଆରମ୍ଭ ହୋଇଥିଲା ଏକ କର୍ମଶାଳା । ଜାତୀୟ ବାଉଁଶ ମିଶନ କାର୍ଯ୍ୟକ୍ରମ ଅଧିନରେ ଅନୁଷ୍ଠିତ ହୋଇଥିଲା ଏହି କର୍ମଶାଳା । ଏଥିରେ ଆଗ୍ରହୀ ଥିବା ବ୍ୟକ୍ତିମାନେ ଦେୟମୁକ୍ତ ଭାବେ କର୍ମଶାଳାରେ ଭାଗ ନେଇଥିଲେ । କୌଣସି ସୂତ୍ରରୁ ଖବର ପାଇଁ ଜିଜ୍ଞାସୁ ଆନନ୍ଦ ପହଞ୍ଚିଥିଲେ ଡେରାଡୁନରେ । ୩ ମାସିଆ ମାଗଣା ପଢିବା ପରେ ମନ ମାନି ନ ଥିଲା । ଅଧିକ ଶିକ୍ଷିବା ପାଇଁ ଚେଷ୍ଟା କରିଥିଲେ ଆନନ୍ଦ । ତେଣୁ କର୍ମଶାଳା ପରେ ନିଜ ହାତରୁ ଟଙ୍କା ଖର୍ଚ୍ଚ କରି ଅଭିଜ୍ଞ କାରିଗର ଏବଂ ସହାୟକଠାରୁ ଶିକ୍ଷା କରିଥିଲେ କାରିଗରୀ । କେବଳ ଶିଖି ନ ଥିଲେ, ସେହି ଶିଳ୍ପରେ ପ୍ରବୀଣତା ଆସିବା ପର୍ଯ୍ୟନ୍ତ ସେଠାରେ ରହିଯାଇଥିଲେ । ଆଉ ତା ପରେ ଫେରିଥିଲେ ଓଡ଼ିଶା । ସ୍ଥାନୀୟସ୍ତରରେ ମିଳୁଥିବା ବାଉଁଶ ଓ ଅନ୍ୟାନ୍ୟ ଆସବାପତ୍ରକୁ ନେଇ ପ୍ରସ୍ତୁତ କରିଥିଲେ ପେନଷ୍ଟାଣ୍ଟ । ତା ପରେ ଘର କରଣା ଜିନିଷ ।  ଏହି ସବୁ ସାମଗ୍ରୀ ତିଆରି କରିବା ସମୟରେ ଘରେ ସଜାରେ ବ୍ୟବହୃତ ହେଉଥିବା ସମସ୍ତ ପ୍ଲାଷ୍ଟିକ ଜିନିଷକୁ ଆଖି ଆଗରେ ରଖି ପ୍ରସ୍ତୁତ କରିଥିଲେ ଅବିକଳ ଆସାବପତ୍ର ।  ୨୦୦୯ରେ ତାଙ୍କ ଦକ୍ଷତାକୁ ଦେଖି ତାଙ୍କୁ ସରକାର ଯୋଗାଇ ଦେଇଥିଲେ ୧୦ ଏକରଜମି । ଏହି ଜମିରେ ବାଉଁଶ ଗଛ ବଢାଇବା ସହ ତାହାକୁ ଭିତ୍ତିକରି ନିଜ ଶିଳ୍ପୀ ଦକ୍ଷତାକୁ ଦେଇଥିଲେ ନୂଆ ରୂପ ।

କେଉଁ ସବୁ ପ୍ରକଳ୍ପ ଉପରେ କାର୍ଯ୍ୟ କରୁଛନ୍ତି ଆନନ୍ଦ , କଣ ରହିଛି ତାଙ୍କର କୀର୍ତ୍ତି

ପ୍ରାୟ ୪୦ ପ୍ରକାରରୁ ଅଧିକ ଆସବାପତ୍ର ପ୍ରସ୍ତୁତି କରିପାରୁଛନ୍ତି ଆନନ୍ଦ । ସମ୍ବଲପୁରରେ ୧୦୦ ବର୍ଗଫୁଟର କଟେଜ୍ ମଧ୍ୟ ତାଙ୍କ ଦ୍ୱାରା ନିର୍ମିତ ହୋଇଥିଲା । ବାଉଁଶରେ କେବଳ କଟେଜ କରି ନ ଥିଲେ ସାଧାରଣତଃ ଘର ପରି ସଲଗ୍ନ ଟଏଲେଟ୍ ଏବଂ ବାରଣ୍ଡା ବ୍ୟବସ୍ଥା ମଧ୍ୟ କରିଥିଲେ । ୧୦ ଜଣ କାରିଗରଙ୍କ ସହାୟତା ନେଇ ପ୍ରାୟ ଦେଢମାସ ମଧ୍ୟରେ ଆନନ୍ଦ ଏହି କାର୍ଯ୍ୟ ସାରିଥିଲେ । ବାଉଁଶ ଗଛ ବଢିବା ପରେ ତାକୁ ଠିକ୍ ସମୟରେ କାଟିବା, ସେଥିରେ କ୍ଲୋର ଫାଷ୍ଟ , ବୋରିକ୍ ଏସିଡ୍, ବଗ ଫ୍ରି ପାଇଁ ଆବଶ୍ୟକ ସାମଗ୍ରୀ ବ୍ୟବହାର କରାଯାଇଥିଲା । ଏହାକୁ ହାଲୁକା ବୋଲି ଅନେକ ମନେ କରି ଥାଆନ୍ତି କିନ୍ତୁ ଏହି ବାଉଁଶ ନିର୍ମିତ କ୍ଷୁଦ୍ର କଟେଜ ୫ କ୍ୱିଣ୍ଟାଲ ତଥା ତାଠାରୁ ଅଧିକ ଓଜନ ସମ୍ଭାଳି ପାରିଥାଏ ।  ଏହା ମଧ୍ୟ ଅଗ୍ନି ପ୍ରତିରୋଧକ କାରଣ ଏଥିରେ ବ୍ୟବହୃତ ହେଉଛି ସିଲିକେଟ୍ ଏସିଡ୍  । କେବଳ ଏହି କଟେଜ ନୁହେଁ ବାଣୀ ବିହାର ଏମବିଏ ବିଭାଗରେ ଥିବା ମିନି କାଫେଟେରିଆ ମଧ୍ୟ ଆନନ୍ଦଙ୍କ ଦ୍ୱାରା ନିର୍ମିତ ।

ସହାୟତା କରୁଛି ସ୍ୱୟଂ ସହାୟିକା ଗୋଷ୍ଠୀ

ଆନନ୍ଦଙ୍କ କେବଳ ନିଜେ ସ୍ୱାବଲମ୍ବୀ ହୋଇ ନାହାନ୍ତି, ତା ସହିତ ୯୫ ଜଣ ସହଯୋଗୀଙ୍କ ପରିବାରକୁ ମଧ୍ୟ ରୋଜଗାର ଯୋଗାଇଛନ୍ତି । ଏହି ୯୫ ଜଣଙ୍କ ମଧ୍ୟରୁ କେତେଜଣ ତାଙ୍କ ସହ ପୂର୍ଣ୍ଣକାଳୀନ ଭାବେ କାର୍ଯ୍ୟ କରୁଛନ୍ତି । ସେହିପରି ଅନ୍ୟ କେତେବେଳେ ସାମୟିକ ଭାବେ ଯୋଗଦାନ ଦେଉଛନ୍ତି । ଏହା ବ୍ୟତୀତ ୩୦ ଜଣ ସ୍ୱୟଂ ସହାୟିକା ମଧ୍ୟ ଆନନ୍ଦଙ୍କୁ ସହଯୋଗ କରୁଛନ୍ତି । ଏହି ସ୍ୱୟଂ ସହାୟିକା ଗୋଷ୍ଠୀର ନାଁ ହେଉଛି ମା ମାନସୀ ଏସ୍ ଏଚ୍ ଜି । ମଣିପୁରର ପିସିସିଏଫ୍ ରହିଥିବା ବ୍ରଜ ନାରାୟଣ ମହାନ୍ତି ବାଉଁଶ ଶିଳ୍ପକୁ ଅଧିକ ଗୁରୁତ୍ୱ ଦେଇଛନ୍ତି । କିଛି ସପ୍ତାହ ତଳେ ସେ ଟୁଇଟ୍ କରି ଆନନ୍ଦଙ୍କ କାର୍ଯ୍ୟକୁ ଭୂୟସୀ ପ୍ରଶଂସା କରିଥିଲେ । ଆନନ୍ଦ ଅନଲାଇନ ଅର୍ଡର ଜରିଆରେ ମଧ୍ୟ ନିଜ ବ୍ୟବସାୟକୁ ଗ୍ଲୋବାଲ କରିପାରିଛନ୍ତି ।

ପ୍ଲାଷ୍ଟିକର ପ୍ରାର୍ଦୁଭାବ ଅନେକ ଅପକାରିତାକୁ ଜନ୍ମ ଦେଉଛି । ଏହି ସମୟରେ ଆନନ୍ଦଙ୍କ କାର୍ଯ୍ୟଦକ୍ଷତା ସମାଜ ପାଇଁ  ନିଶ୍ଚିତ ଉପାଦେୟ ହେବ ବୋଲି ଆଶା ।