ନୂଆଦିଲ୍ଲୀ: ସୁଇଡେନ ପ୍ରଧାନମନ୍ତ୍ରୀ ଷ୍ଟିଫାନ ଲଫଭେନ ଇସ୍ତଫା ପ୍ରଦାନ କରିଛନ୍ତି। ସେ ନିଜର ଇସ୍ତଫା ପତ୍ର ବାଚସ୍ପତିଙ୍କୁ ଦେଇଛନ୍ତି। ଗତ ସପ୍ତାହରେ ସୋସାଲ ଡେମୋକ୍ରାଟ ନେତା ଲଫଭେନଙ୍କ ଇସ୍ତଫା ନେଇ ସ୍ପଷ୍ଟ ସୂଚନା ମିଳିଥିଲା। ସେ ଇସ୍ତଫା ଦିଅନ୍ତୁ କିମ୍ବା ସାନି ନିର୍ବାଚନ ଘୋଷଣା କରିବା ଲାଗି ତାଙ୍କୁ କୁହାଯାଇଥିଲା ।
ସୂଚନା ଅନୁଯାୟୀ, ତାଙ୍କ ଉପରୁ ବାମ ଦଳ ସମର୍ଥନ ପ୍ରତ୍ୟାହାର କରିବା ପରେ ଗତ ଜୁନ ୨୧ ତାରିଖରେ ହୋଇଥିବା ଆସ୍ଥା ଭୋଟରେ ସେ ପରାସ୍ତ ହୋଇଥିଲେ । ଆସ୍ଥା ଭୋଟରେ ହାରିବା ପରେ ସେ ବିଭିନ୍ନ ସମ୍ଭାବ୍ୟ ରାଜନୈତିକ ସମୀକରଣ କରିବାକୁ ଚାହିଁଥଲେ । ମାତ୍ର ବିଫଳ ହେବା ପରେ ସେ ଶେଷରେ ଇସ୍ତଫା ଦେଇଥିଲେ।
ତେବେ ଆସନ୍ତା ବର୍ଷ ସେପ୍ଟେମ୍ବରରେ ଲୋକସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଥିବାବେଳେ ଏହି ରାଜନୈତିକ ପଟପରିବର୍ତ୍ତନ ଅନେକ ନୂଆ ସମ୍ଭାବନା ସୃଷ୍ଟି କରୁଛି । ନୂଆ ପ୍ରଧାନମନ୍ତ୍ରୀ ଲାଗି ବାଚସ୍ପତି ଏବେ ପ୍ରକ୍ରିୟା ଆରମ୍ଭ କରିଛନ୍ତି। ନିର୍ବାଚନ ଏଡାଇବା ଲାଗି ବାଚସ୍ପତି ସମସ୍ତ ପଦକ୍ଷେପ ନେଇଥିବା ଜଣାପଡିଛି।
