‘ସୁଶାନ୍ତଙ୍କୁ ହତ୍ୟା ନେଇ ଏଯାଏଁ ମିଳିନି ପ୍ରମାଣ, ଆତ୍ମହତ୍ୟା ଉପରେ CBI ଫୋକସ୍’

ମୁମ୍ବାଇ: ଅଭିନେତା ସୁଶାନ୍ତ ସିଂହ ରାଜପୁତ ମୃତ୍ୟୁ ମାମଲାର ଯାଞ୍ଚ କରୁଛି ସିବିଆଇ । ମାମଲାର ମୁଖ୍ୟ ଅଭିଯୁକ୍ତ ରିୟା ଚକ୍ରବର୍ତ୍ତୀ ସମେତ କେସ୍ ସହ ଜଡ଼ିତ ଅନ୍ୟ ଲୋକଙ୍କୁ ଜେରା କରୁଛି ସିବିଆଇ । ଜେରା ବଢ଼ିବା ସହିତ ଜଟିଳ ହେବାରେ ଲାଗିଛି ମୃତ୍ୟୁ ରହସ୍ୟ । କାରଣ ପଚରାଉଚରାରୁ ଆସୁଛି ନୂଆ ନୂଆ ତଥ୍ୟ । କିନ୍ତୁ, ମୃତ୍ୟୁ ରହସ୍ୟ ଗୁନ୍ଥି ହୋଇ ଚାଲିଛି । ତେବେ ଏବେ ଯାଏଁ ହୋଇଥିବା ତଦନ୍ତରୁ ସୁଶାନ୍ତଙ୍କୁ ମର୍ଡର କରାଯାଇଥିବା ନେଇ କୌଣସି ପ୍ରମାଣ ମିଳିନଥିବା କହିଛନ୍ତି ସିବିଆଇର ୩ ଅଧିକାରୀ । ଏବେ ବି ତଦନ୍ତ ଜାରି ରହିଛି ।

ସିବିଆଇ ଅଧିକାରୀ କହିଛନ୍ତି- ଏବେ ତଦନ୍ତ ସୁଇସାଇଡ୍ ଦୃଷ୍ଟିକୋଣକୁ ଫୋକସରେ ରଖି କରାଯାଉଛି । ସୁଇସାଇଡ୍ ପାଇଁ କେହି ଉସୁକାଇ ନାହାଁନ୍ତି ତ ? ଏବେ ଯାଏଁ ସିବିଆଇ କ୍ରାଇମ୍ ସିନକୁ ରିକ୍ରିଏଟ୍ କରିଛି । ମୁମ୍ବାଇ ପୋଲିସ ଦ୍ୱାରା ସଂଗୃହିତ ପ୍ରମାଣକୁ ଯାଞ୍ଚ କରି ସିବିଆଇ ସମସ୍ତଙ୍କୁ ଜେରି କରୁଛି ।

ଟିମ୍ ଅନୁଯାୟୀ, ଫୋରେନ୍ସିକ ରିପୋର୍ଟସ, ସନ୍ଦିଗ୍ଧଙ୍କ ବୟାନ ଅବା କ୍ରାଇମ୍ ସିନ୍ ରି-କ୍ରିଏସନ୍ ତର୍ଜମା କଲେ ଏହା ହତ୍ୟା ଆଡ଼କୁ ଇସାରା କରୁନାହିଁ । ତେବେ, ତଦନ୍ତ ଏବେ ଜାରି ରହିଛି । କେସରେ ସୁଇସାଇଡ୍ ଦୃଷ୍ଟିକୋଣ ନେଇ ଆହୁରି ତଦନ୍ତ କଡ଼ା କରାଯିବ । ମର୍ଡର ତଦନ୍ତକୁ ସିବିଆଇ ବନ୍ଦ କରୁ ନାହିଁ ।

ତେବେ, ମାମଲାରେ AIIMS ଫରେନ୍ସିକ ରିପୋର୍ଟକୁ ଗୁରୁତ୍ୱପୂର୍ଣ୍ଣ କୁହାଯାଉଛି । ଏହି ରିପୋର୍ଟରେ ସୁଶାନ୍ତ ସିଂହ ରାଜପୁତଙ୍କ ପୋଷ୍ଟମର୍ଟମ ଓ ଅଟୋପ୍ସି ରିପୋର୍ଟ ରହିଛି । ମଙ୍ଗଳବାର କେସର ଅଭିଯୁକ୍ତ ତଥା ସୁଶାନ୍ତଙ୍କ ଗର୍ଲଫ୍ରେଣ୍ଡ ରିୟାଙ୍କ ବାପା, ମାଆଙ୍କୁ ପଚରାଉଚରା କରିଥିଲା ସିବିଆଇ । ଏହା ବାଦ୍ କେସରେ ଡ୍ରଗ୍ସ ଆଙ୍ଗଲ ନେଇ ଇଡି ଗୌରବ ଆରିୟାଙ୍କୁ ଜେରା ପାଇଁ ଡାକିଛି ।