ଜୁଲାଇ ୧୧ରେ ପଳାତକ ବିଜୟ ମାଲ୍ୟାଙ୍କ ବିରୋଧରେ ଶୁଣାଣି

ନୂଆଦିଲ୍ଲୀ: ପଳାତକ ବିଜୟ ମାଲ୍ୟା ଓ ଅବୁ ସଲେମଙ୍କ ବିରୋଧରେ ସୋମବାର ଦିନ ସୁପ୍ରିମକୋର୍ଟ ଶୁଣାଣି କରିବେ । କୋର୍ଟର ଅବମାନନା କରିବା ସମ୍ପର୍କିତ ମାମଲା ଶୁଣାଣି କରିବେ କୋର୍ଟ । ରବିନ୍ଦ୍ର ଏସ ଭଟ ଓ ପିଏସ ନରସିମ୍ହାଙ୍କୁ ନେଇ ଜଷ୍ଟିସ ୟୁୟୁ ଲଲିତଙ୍କ ନେତୃତ୍ୱରେ ଏକ ତିନିଜଣିଆ ଖଣ୍ଡପୀଠ ସୋମବାର ଦିନ ଶୁଣାଣି କରିବେ ।

ଉଲ୍ଲେଖଯୋଗ୍ୟ, କିଙ୍ଗଫିସର ଏୟାରଲାଇନ୍ସ ମାଲିକ ବିଜୟ ମାଲ୍ୟା ମନି ଲଣ୍ଡରିଂ ମାମଲାରେ ଦେଶ ଛାଡି ପଳାୟନ କରିଥିଲେ  । ପରେ କୋର୍ଟଙ୍କ ଆଦେଶକୁ ଅବମାନନା ପାଇଁ ମାଲ୍ୟା ୨୦୧୭ ରେ ଦୋଷୀ ସାବ୍ୟସ୍ତ ହୋଇଥିଲେ । ସେହିପରି କୋର୍ଟଙ୍କ ନିର୍ଦ୍ଦେଶକୁ ଅବମାନନା କରି ତାଙ୍କ ପିଲାଙ୍କ ଆକାଉଣ୍ଟକୁ ୪୦  ମିଲିୟନ ଡଲାର ସ୍ଥାନାନ୍ତର କରିବା ସମ୍ପର୍କିତ ତଥ୍ୟ ଲୁଚାଇଥିଲେ ।

ଗତବର୍ଷ  କିଙ୍ଗଫିସର ଏୟାରଲାଇନ୍ସ ମାଲିକ ବିଜୟ ମାଲ୍ୟାଙ୍କୁ ଦେବାଳିଆ ଘୋଷଣା କରିଥିଲେ ବ୍ରିଟେନର ଏକ କୋର୍ଟ। ବ୍ରିଟେନର ଚିଫ ଇନସଲଭେନ୍ସି ଆଣ୍ଡ କମ୍ପାନୀଜ କୋର୍ଟ ବା ଆଇସିସିର ବିଚାରପତି ମାଇକେଲ ବ୍ରିଗସ ଏହି ଘୋଷଣା କରିଥିଲେ। ଭାରତୀୟ ବ୍ୟାଙ୍କଗୁଡିକ ସପକ୍ଷରେ ଏହି ରାୟ ପ୍ରଦାନ କରିବା ଲାଗି କୋର୍ଟ ନିକଟରେ ଆବେଦନ କରିଥିଲା ଟିଏଲଟି ଏଲଏଲପି ଫାର୍ମ ଓ ବାରିଷ୍ଟର ମାର୍ସିଆ ସେକର୍ଡେମିଆନ ।