ନନ୍ଦିଘୋଷ ବ୍ୟୁରୋ: ୪ ରାଜ୍ୟର ଜୀବନରେଖା ଆରାବଳୀ। ପ୍ରକୃତିର ବିରଳ ଅବଦାନ ଆରାବଳୀ ଆଉ କେତେ ଖଣ୍ଡ ବିଖଣ୍ଡିତ ହେବ। ଏନେଇ କେନ୍ଦ୍ର ସରକାର ଆଭିମୁଖ୍ଯକୁ ନେଇ ଥମୁନି ବିବାଦ। ଏଥିରେ ନିଜ ଆଡ଼ୁ ମାମଲା ଦାୟର କରି ସୁପ୍ରିମକୋର୍ଟ ଶୁଣାଣି କରିବେ। ଆଜି ପ୍ରଧାନବିଚାରପତି ଜଷ୍ଟିସ ସୂର୍ଯ୍ଯକାନ୍ତଙ୍କ ଅଧ୍ଯକ୍ଷତାରେ ସୁପ୍ରିମକୋର୍ଟର ଅବକାଶକାଳୀନ ୩ ଜଣିଆ ଖଣ୍ଡପୀଠ ମାମଲାର ଶୁଣାଣି କରିବେ। ଏହାସହ ପୂର୍ବତନ ବନ ଅଧିକାରୀ ଆର.ପି. ବଲଓ୍ବାନଙ୍କ ପକ୍ଷରୁ ଦାୟର ପିଟିସନର ବି ଶୁଣାଣି ହେବ। ଗତ ନଭେମ୍ବର ୨୦ରେ ଆରାବଳୀ ପର୍ବତ ସମ୍ପର୍କିତ କେନ୍ଦ୍ର ସରକାରଙ୍କ ନୂତନ ବ୍ୟାଖ୍ୟାନକୁ ସୁପ୍ରିମକୋର୍ଟ ସ୍ବୀକୃତି ପ୍ରଦାନ କରିଥିଲେ। ଯାହାକୁ ନେଇ ଦେଶବ୍ୟାପୀ ଘୋର ଅସନ୍ତୋଷ ପ୍ରକାଶ ପାଇଥିଲା।
କେନ୍ଦ୍ର ସରକାରଙ୍କ ନୂତନ ବ୍ୟାଖ୍ୟାନ ଅନୁସାରେ ଆରାବଳୀର ୧୦୦ ମିଟର ଉଚ୍ଚତା କିମ୍ବା ତାଠାରୁ ଅଧିକ ଉଚ୍ଚତାରେ ଥିବା ଅଞ୍ଚଳ ଆରାବଳୀ ପର୍ବତର ଅଂଶବିଶେଷ ଭାବେ ପରିଗଣିତ ହେବ । କେନ୍ଦ୍ର ପରିବେଶ ମନ୍ତ୍ରଣାଳୟର ସୁପାରିସକୁ ବି ଗ୍ରହଣ କରିଥିଲେ ତତକାଳୀନ ପ୍ରଧାନ ବିଚାରପତି ଜଷ୍ଟିସ ବି.ଆର. ଗଭାଇଙ୍କ ଖଣ୍ଡପୀଠ । ଯାହାକୁ ନେଇ ରାଜସ୍ଥାନ ସମେତ ଦେଶର ବିଭିନ୍ନ ଭାଗରେ ଉତକ୍ଷିପ୍ତ ହୋଇଥିଲେ ପରିବେଶ କର୍ମୀ । ଆରାବଳୀର କେଉଁ ଅଞ୍ଚଳରେ ଖଣି ଖନନ ନିଷିଦ୍ଧ ହେବ ତାହା ନିର୍ଣ୍ଣୟ କରିବା ଲାଗି ଭାରତୀୟ ଜଙ୍ଗଲ ଗବେଷଣା ଓ ଶିକ୍ଷା ପରିଷଦ ବା CFREକୁ ନିର୍ଦ୍ଦେଶ ଦେଇଥିଲା ପରିବେଶ ମନ୍ତ୍ରଣାଳୟ । ଆରାବଳୀ ପାର୍ବତ୍ଯ ଅଞ୍ଚଳ ପରିବେଶ, ଜଳବାୟୁ, ଜଳ ନିରାପତ୍ତା, ଜୀବନ ଲାଗି ବେଶ୍ ସହାୟକ ହୋଇଥିବାରୁ ଆଉ କୌଣସି ପ୍ରକାର ଖଣି ଖନନ ନ କରିବା ପାଇଁ ବିରୋଧୀ ଜିଦ ଧରିଛନ୍ତି। ଏହି ପର୍ବତଟି ଗୁଜରାଟ, ରାଜସ୍ଥାନ, ହରିଆଣା ଓ ଦିଲ୍ଲୀର ବହୁ ଅଞ୍ଚଳକୁ ସଂଯୋଗ କରୁଛି ।
ଏହାର ଦୈର୍ଘ୍ୟ ୬୯୦ କିଲୋମିଟର । ପର୍ବତର ନିମ୍ନ ଭାଗରେ ଥିବା ଜଳ ପ୍ରଣାଳୀ ଜରିଆରେ ଦିଲ୍ଲୀ, ଗୁରୁଗ୍ରାମ, ଫରିଦାବାଦ ଓ ଅଲଓ୍ବାରକୁ ଜଳ ଯୋଗାଣ ହେଉଛି । ଯଦି ୧୦୦ ମିଟର ତଳେ ଖଣି ଖନନ କରାଗଲେ ଜଳ ଉତ୍ସ ନଷ୍ଟ ହୋଇଯିବ । ଆରାବଳୀରେ ଖଣି ଖନନ ନେଇ ୧୯୮୦ ଦଶକରୁ ମାମଲା କୋର୍ଟରେ ପଡ଼ିରହିଛି। ଖଣି ଖନନ ବନ୍ଦ ଲାଗି ୧୯୯୦ ଓ ୨୦୦୦ ମସିହାରେ ଏକାଧିକ ନିଷେଧାଦେଶ ଜାରି କରିଥିଲେ ସୁପ୍ରିମକୋର୍ଟ । ୧୯୮୫ରେ ଏମ.ସି. ମେହେଟ୍ଟା ବନାମ କେନ୍ଦ୍ର ସରକାର ଓ ଟି.ଏନ. ଗୋଦାବର୍ମନ ଥିରୁମାଲପାଦ ବନାମ କେନ୍ଦ୍ର ସରକାର ମାମଲାରେ ଆରାବଳୀରେ ଖନନ କାର୍ଯ୍ୟ ଉପରେ କଟକଣା ଜାରି କରିଥିଲେ ସୁପ୍ରିମକୋର୍ଟ । ସେପଟେ ଏହି ପର୍ବତମାଳା ବିଶ୍ବର ସର୍ବପୁରାତନ ହୋଇଥିବାରୁ ଏହାର ସୁରକ୍ଷା ଲାଗି ଦାବି କରିଛନ୍ତି ପରିବେଶବିତ। ୬୭୦ ନିୟୁତ ବର୍ଷ ପୁରୁଣା ଏହି ପର୍ବତମାଳା ଥର୍ ମରୁଭୂମିର ପ୍ରାକୃତିକ ବିସ୍ତାର ପ୍ରକ୍ରିୟାକୁ ପ୍ରତିରୋଧ କରିଥାଏ । ଯାହାକୁ ନେଇ ସବୁ ମହଲରେ ଏବେ ଉଦବେଗ ପ୍ରକାଶ ପାଇଛି।
