Prashant Bhushan case: ଅଦଲାତ ଅବମାନନା ମାମଲାରେ ପ୍ରଶାନ୍ତଙ୍କୁ ୧ ଟଙ୍କା ଜରିମାନା,ଫାଇନ୍ ନଦେଲେ ୩ମାସ ଜେଲ ଓ ୩ବର୍ଷ ଓକିଲାତି ଲାଇସେନ୍ସ ରଦ୍ଧ
ନୂଆଦିଲ୍ଲୀ : ଅଦାଲତ ଅବମାନନା ଅଭିଯୋଗରେ ଦୋଷୀ ସାବ୍ୟସ୍ତ ପ୍ରଶାନ୍ତ ଭୁଷଣଙ୍କ ଉପରେ ସୁପ୍ରିମକୋର୍ଟ ଏକ ଟଙ୍କାର ଜରିମାନା ଲଗାଇଛନ୍ତି । ତେବେ ଜୋରିମାନା ନଦେଲେ ୩ ବର୍ଷ ପାଇଁ ଓକିଲାତି ଲାଇସେନ୍ସ ରଦ୍ଧ ହେବା ସହ ୩ ମାସର ଜେଲଦଣ୍ଡ ଭୋଗିବାକୁ ପଡ଼ିବ ବୋଲି ସୁପ୍ରିମକୋର୍ଟ ନିଜ ରାୟରେ କହିଛନ୍ତି ।
ଉଲ୍ଲେଖଯୋଗ୍ୟ ଯେ ପ୍ରଶାନ୍ତ ଭୂଷଣ ଦୁଇଟି ଟ୍ୱିଟ୍ କରିଥିଲେ । ଏହି ଟ୍ୱିଟର ବିଶୟକୁ ସୁପ୍ରିମକୋର୍ଟ ଆପତ୍ତିଜନକ ଭାବେ ଗ୍ରହଣ କରିଥିଲେ । ନିଜ ତରଫରୁ ଏହାକୁ ବିଚାର ପାଇଁ ସୁପ୍ରିମକୋର୍ଟ ଗ୍ରହଣ କରି ତାଙ୍କୁ ଦୋଷୀ ସାବ୍ୟସ୍ତ କରିଥିଲେ । ପ୍ରଶାନ୍ତ ଭୂଷଣଙ୍କୁ ଏହି ପ୍ରସଙ୍ଗରେ ସୁପ୍ରିମକୋର୍ଟ କ୍ଷମା ପ୍ରାଥର୍ନା କରିବା ପାଇଁ ମଧ୍ୟ ନିର୍ଦ୍ଦେଶ ଦେଇଥିଲେ । ସୁପ୍ରିମକୋର୍ଟଙ୍କ କହିବା ଥିଲା ଯେ, ଭୂଷଣଙ୍କ ମନ୍ତବ୍ୟ ସୁପ୍ରିମ୍ କୋର୍ଟର ମର୍ଯ୍ୟାଦାହାନୀ କରିବା ସହ ସାଧାରଣରେ ସୁପ୍ରିମକୋର୍ଟର ବିଶ୍ୱସନୀୟତା କମାଇଛି । ଦେଶର ସର୍ବୋଚ୍ଚ ନ୍ୟାୟାଳୟର ବିଶ୍ୱସନୀୟତା କମାଇବା ପାଇଁ ଚେଷ୍ଟା କରି ସେ ଭୁଲ୍ କରିଛନ୍ତି । ତେଣୁ ଅତିକମରେ ସେ ନିସର୍ତ୍ତ କ୍ଷମାପ୍ରାଥର୍ନା କଲେ ତାଙ୍କୁ ଦଣ୍ଡରୁ ମୁକ୍ତ କରାଯିବା ନେଇ ବିଚାର କରାଯିବ ।
ମାତ୍ର ପ୍ରଶାନ୍ତ ଭୂଷଣ ଏଭଳି କରିବା ପାଇଁ ସିଧାସଳଖ ଭାବେ ମନା କରିଥିଲେ । ସେ ସୁପ୍ରିମକୋର୍ଟ ବିରୋଧରେ ମନ୍ତବ୍ୟ ରଖିନାହାଁନ୍ତି ବରଂ ମୁଖ୍ୟ ବିଚାରପତିଙ୍କ କାର୍ଯ୍ୟକଳାପକୁ ନେଇ ପ୍ରଶ୍ନ ଉଠାଇଥିଲେ ବୋଲି ସଫେଇ ଦେଇଥିଲେ । ଅନ୍ୟପକ୍ଷରେ କେନ୍ଦ୍ର ସରକାରଙ୍କ ଆଟୋର୍ଣ୍ଣି ଜେନେରାଲ ଭେନୁଗୋପାଳ ରାଓଙ୍କୁ ସୁପ୍ରିମ୍ କୋର୍ଟ ଏହି ପ୍ରସଙ୍ଗ ଉପରେ ମତ ରଖିବା ପାଇଁ କହିଥିଲେ ।
ପ୍ରଶାନ୍ତ ଭୂଷଣଙ୍କ ବରିଷ୍ଠତା ଓ ସାମାଜିକ ଦାୟିତ୍ୱବୋଧକୁ ବିଚାରକୁ ନେଇ ଭେନୁଗୋପାଳ ରାଓ କାରାଦଣ୍ଡ ପ୍ରବଧାନ ନରଖି ତାଙ୍କ ଉପରେ ଜରିମାନା ଲାଗୁ କରାଯାଉ ବୋଲି ସେ ପ୍ରସ୍ତାବ ରଖିଥିଲେ । ତାଙ୍କ ପ୍ରସ୍ତାବ ଉପରେ ବିଚାର କରି ସୁପ୍ରିମକୋର୍ଟ ଆଜି ଏହି ରାୟ ଦେଇଛନ୍ତି । ତେବେ ପ୍ରଶାନ୍ତ ଭୂଷଣ ନିଜ ଯଦିରେ ଅଟଳ ରହି ଜେଲଦଣ୍ଡ ଭୋଗିବେ ନା’ ୧ ଟଙ୍କାର ଜରିମାନା ଦେବେ ତାହା ପରିବର୍ତ୍ତୀ ସମୟରେ ଜାଣିବାକୁ ମିଳିବ ।
