ବିଶ୍ୱବିଦ୍ୟାଳୟରେ ଶେଷ ବର୍ଷର ପରୀକ୍ଷାକୁ ନେଇ ସୁପ୍ରିମକୋର୍ଟଙ୍କ ବଡ଼ ରାୟ

ନୂଆଦିଲ୍ଲୀ: କରୋନା ଭୂତାଣୁ ବିପର୍ଯ୍ୟୟ ମଧ୍ୟରେ ସୁପ୍ରିମକୋର୍ଟଙ୍କ ବିଶ୍ୱବିଦ୍ୟାଳୟରେ ଶେଷ ବର୍ଷର ପରୀକ୍ଷାକୁ ନେଇ ବଡ଼ ରାୟ। ବିଶ୍ୱବିଦ୍ୟାଳୟରେ ଫାଇନାଲ ପରୀକ୍ଷା ହେବ ବୋଲି କହିଛନ୍ତି କୋର୍ଟ । ଯେଉଁ ରାଜ୍ୟ ମାନେ ବର୍ତ୍ତମାନ ସମୟରେ ପରୀକ୍ଷା କରାଇବାକୁ ସମର୍ଥ ନାହାନ୍ତି ସେମାନେ ୟୁଜିସିର ଗାଇଡଲାଇନ ମାନିବାକୁ କୋର୍ଟ ପରାମର୍ଶ ଦେଇଛନ୍ତି । ଫାଇନାଲ ପରୀକ୍ଷା ନକରି ଛାତ୍ରଛାତ୍ରୀଙ୍କୁ ପାସ କରାଯାଇପାରିବ ନାହିଁ ବୋଲି କୋର୍ଟ ସ୍ପଷ୍ଟ କରି ଦେଇଛନ୍ତି । ତେବେ କରୋନା ଦ୍ୱାରା ପ୍ରଭାବିତ ଅଞ୍ଚଳରେ କିଛି ରିହାତି ପ୍ରଦାନ କରାଯାଇପାରେ ବୋଲି କୋର୍ଟ କହିଛନ୍ତି । ଅଗଷ୍ଟ ୧୮ ରେ ବିଶ୍ୱବିଦ୍ୟାଳୟର ଅନ୍ତିମ ବର୍ଷ ପରୀକ୍ଷା କରିବା ପାଇଁ UGC ର ନିଷ୍ପତ୍ତିକୁ ଚ୍ୟାଲେଞ୍ଜ କରି ଆବେଦନ ଉପରେ କୋର୍ଟ ଏହି ରାୟ ସଂରକ୍ଷଣ କରିଥିଲେ ।

ସେପଟେ ୩୦ ସେପ୍ଟେମ୍ବର ଭିତରେ ପରୀକ୍ଷା ଶେଷ କରିବାକୁ ୟୁଜିସି ଦେଇଥିବା ନିର୍ଦ୍ଦେଶକୁ ମଧ୍ୟ କୋର୍ଟ ଗ୍ରୀନ ସିଗନାଲ ଦେଇଛନ୍ତି  । ଏପରି ନିଷ୍ପତ୍ତି ପରେ ଛାତ୍ରଛାତ୍ରୀ ମାନେ ଅସନ୍ତୁଷ୍ଟ ରହିଛନ୍ତି । ପୂର୍ବରୁ ଦେଶର ବିଭିନ୍ନ ବିଶ୍ୱବିଦ୍ୟାଳୟର ପ୍ରାୟ ୩୧ ଜଣ ଛାତ୍ର ସୁପ୍ରିମକୋର୍ଟରେ ଆବେଦନ କରି ଜୁଲାଇ ୬ ରେ UGC ଦ୍ୱାରା ଜାରି କରାଯାଇଥିବା ସଂଶୋଧିତ ନିର୍ଦ୍ଦେଶାବଳୀକୁ ବାତିଲ କରିବାକୁ ଦାବି କରିଥିଲେ । UGC ଏହାର ସଂଶୋଧିତ ନିର୍ଦ୍ଦେଶାବଳୀରେ ଦେଶର ସମସ୍ତ ବିଶ୍ୱବିଦ୍ୟାଳୟକୁ ୩୦ ସେପ୍ଟେମ୍ବର ପୂର୍ବରୁ ଅନ୍ତିମ ବର୍ଷ ପରୀକ୍ଷା ସାରିବାକୁ କହିଥିଲା । ଛାତ୍ରଛାତ୍ରୀମାନେ ସେମାନଙ୍କ ପିଟିସନରେ ଦାବି କରିଥିଲେ ଯେ ଅନ୍ତିମ ବର୍ଷର ପରୀକ୍ଷା ବାତିଲ କରାଯାଉ ଏବଂ ଛାତ୍ରଛାତ୍ରୀଙ୍କ ଫଳାଫଳକୁ ସେମାନଙ୍କ ପୂର୍ବ ପ୍ରଦର୍ଶନ ଆଧାରରେ ପ୍ରକାଶ କରାଯାଉ ।