ଗୁରୁଙ୍କୁ ପରମାତ୍ମା ଘୋଷିତ କରିବାକୁ ଶିଷ୍ୟ ଯାଇଥିଲେ ସୁପ୍ରିମକୋର୍ଟ, ଲାଗିଲା ୧ ଲକ୍ଷ ଟଙ୍କାର ଜରିମାନା
ନୂଆଦିଲ୍ଲୀ: ସୁପ୍ରିମକୋର୍ଟରେ ସୋମବାର ଏକ ଅଜବ ମାମଲା ଆସିଥିଲା । ଜଣେ ଶିଷ୍ଯ ନିଜ ଗୁରୁଙ୍କୁ ପରମାତ୍ମା ଘୋଷିତ କରିବା ପାଇଁ ଜନହିତକର ଯାଚିକା ଦାଖଲ କରିଥିଲେ । ଏହି ଆବେଦନକୁ ଜଷ୍ଟିସ ଏମଆର୍ ଶାହ ଏବଂ ଜଷ୍ଟିସ ସିଟି ରବି କୁମାରଙ୍କ ଖଣ୍ଡପୀଠ ଖାରଜ କରିଦେଇଛନ୍ତି । ଏଥିସହିତ ଆବେଦନକାରୀଙ୍କ ଉପରେ ଏକ ଲକ୍ଷ ଟଙ୍କାର ଜରିମାନା ମଧ୍ୟ ଲଗାଇଛନ୍ତି । ଆବେଦନକାରୀ ଉପେନ୍ଦ୍ର ନାଥ ଦଳାଇ, ଶ୍ରୀ ଶ୍ରୀ ଅନୁକୂଳ ଚନ୍ଦ୍ର ଠାକୁରଙ୍କ ଶିଷ୍ୟ ଅଟନ୍ତି ।
ତାଙ୍କର ଦାବି ଥିଲା ଯେ ଶ୍ରୀ ଶ୍ରୀ ଠାକୁରଙ୍କ ଧର୍ମ ସମାଜରେ ଯୋଗଦାନକୁ ଦୃଷ୍ଟିରେ ରଖି ସୁପ୍ରିମକୋର୍ଟ ତାଙ୍କୁ ପରମାତ୍ମା ମାନିବା ପାଇଁ ନିର୍ଦ୍ଦେଶ ଦିଅନ୍ତୁ । ଉପେନ୍ଦ୍ରଙ୍କ ଆବେଦନରେ ବିଜେପି, ଆରଏସଏସ୍, ଅଲ ଇଣ୍ଡିଆ ମୁସଲିମ୍ ପର୍ସନାଲ ଲ ବୋର୍ଡ, ଗୁରୁଦ୍ୱାରା ବଙ୍ଗାଲ ସାହିବ, ଇସ୍କନ ସମିତି, ବୁଦ୍ଧିଷ୍ଟ ସୋସାଇଟି ଅଫ୍ ଇଣ୍ଡିଆ, ନ୍ୟାସନାଲ କ୍ରୀଷ୍ଟିଆନ କାଉନ୍ସିଲଙ୍କୁ ମଧ୍ୟ ପକ୍ଷ କରାଯାଇଥିଲା ।
କୋର୍ଟ ଯାଚିକା ଖାରଜ କରି କହିଥିଲେ, ଭାରତ ଏକ ଧର୍ମ ନିରପେକ୍ଷ ଦେଶ ଅଟେ । ଆବେଦନକାରୀଙ୍କୁ ଏହି କଥାର ଅନୁମତି ଦିଆଯାଇ ପାରିବନି ଯେ ସେ ଦେଶର ଲୋକଙ୍କୁ ଜବରଦସ୍ତି ଶ୍ରୀ ଶ୍ରୀ ଅନୁକୂଳ ଚନ୍ଦ୍ରଙ୍କୁ ପରାମାତ୍ମା ମନାନ୍ତୁ ବୋଲି । ଜଷ୍ଟିସ ଶାହ କହିଥିଲେ, ଯଦି ଆପଣ ତାଙ୍କୁ ପରମାତ୍ମା ମାନିବାକୁ ଚାହୁଁଛନ୍ତି ତେବେ ମାନନ୍ତୁ, ଅନ୍ୟମାନଙ୍କ ଉପରେ କାହିଁକି ଲଦିବାକୁ ଚାହୁଁଛନ୍ତି ।
ଆମେ ଏଠାକୁ ଆପଣଙ୍କ ଲେକ୍ଚର ଶୁଣିବାକୁ ଆସିନାହୁଁ, ଶୁଣାଇବାକୁ ଆସିଛୁ । ଆମର ଧର୍ମନିରପେକ୍ଷ ଦେଶ ଅଟେ । ସମସ୍ତଙ୍କୁ ସମ୍ପୂର୍ଣ୍ଣ ଅଧିକାର ଅଛି ଏହି ଦେଶରେ । ଯାହାକୁ ଯେଉଁ ଧର୍ମ ମାନିବାର ଅଛି ମାନ । ଶିଷ୍ଯଙ୍କ ଦଲିଲ ପରେ କୋର୍ଟ ଏହି ଆବେଦନକୁ ଜନହିତରେ ପାଇନଥିଲେ । ଏଥିପାଇଁ ତାଙ୍କ ଉପରେ ଏକ ଲକ୍ଷ ଟଙ୍କା ଜରିମାନା ମଧ୍ୟ ଲଗାଇଛନ୍ତି । ୪ ସପ୍ତାହ ମଧ୍ୟରେ ଏହି ଜରିମାନା ସୁପ୍ରିମକୋର୍ଟ ରେଜିଷ୍ଟ୍ରିରେ ଜମା କରାଇବା ପାଇଁ ଆଦେଶ ଦିଆଯାଇଛି ।
