ଅନ୍ଧବିଶ୍ୱାସରେ ବିତୁଛି ଜୀବନ; ପକ୍କା ଘର ଅଛି, ହେଲେ ରହିବାକୁ ଡର !
ବଲାଙ୍ଗିର: ଛାତ ଘରେ ରହିଲେ ମୃତ୍ୟୁ ସୁନିଶ୍ଚିତ ! ଆଜିର ଯୁଗରେ ଆଧୁନିକତା ବହୁ ଆଗକୁ ଚାଲିଯାଇଛି । ସହର ଠାରୁ ଗ୍ରାମାଞ୍ଚଳ ପର୍ଯ୍ୟନ୍ତ ଶିକ୍ଷିତଙ୍କ ସଂଖ୍ୟା ବଢିଛି । ସଚେତନତା ମଧ୍ୟ ବେଶ ଆଗକୁ ଯାଇଛି । ହେଲେ ଏବେବି ଅନ୍ଧବିଶ୍ୱାସର ଅନ୍ଧଗଳିରେ ବଞ୍ଚୁଛନ୍ତି ବଲାଙ୍ଗିର ଜିଲ୍ଲା କାଲସାଏପାଲିବାସୀ । ଆଖିରେ ଅନ୍ଧପୁଟୁଳି ବାନ୍ଧି ଅନ୍ଧବିଶ୍ୱାସର ଜୀବନ ବିତାଉଛନ୍ତି । ପିଢି ପରେ ପଢି ଚାଲିଗଲାଣି । ହେଲେ ଏବେ ବି ମନରେ ଅନେକ ଅନ୍ଧ ବିଶ୍ୱାସ ।
ସମୟ ବଦଳିଛି, ମଣିଷ ମଧ୍ୟ ବଦଳୁଛନ୍ତି । ହେଲେ ଲୋକଙ୍କ ମାନସିକତା ବଦଳୁନାହିଁ । ଗାଁରେ ଘର ତିଆରି ହୋଇଛି, ହେଲେ କାହିରି ଘରେ ଛାତ ନାହିଁ । ପକ୍କା ଘର ନିର୍ମାଣ କରି ମଧ୍ୟ ଛପର ପକାଇ ରହୁଛନ୍ତି । କାରଣ ଘରେ ଛାତ ପଡିଥିଲେ ପରିବାରରେ ଜଣକର ମୃତ୍ୟୁ ହେବ ବୋଲି ଲୋକଙ୍କକ ବିଶ୍ୱାସ ରହିଛି ।
ବଲାଙ୍ଗିର ସହର ଠାରୁ ମାତ୍ର ୭ କିଲୋମିଟର ଦୂରରେ ରହିଛି ଏହି ଗାଁ । ବିଭିନ୍ନ ସରକାରୀ ଯୋଜନାରେ ଲୋକଙ୍କୁ ପକ୍କାଘର ମିଳୁଛି । ଲୋକେ ପକ୍କାଘର ନିର୍ମାଣ କରୁଛନ୍ତି, କିନ୍ତୁ ଘର ଗୁଡିକରେ ଛାତ ପକାଇବାକୁ ସାହାସ କରୁନାହାଁନ୍ତି । କାରଣ କିଛି ଅଘଟଣ ଘଟିବାର ଭୟ ଲୋକଙ୍କୁ ଆନ୍ଦୋଳିତ କରୁଛି । ଏନେଇ ଜିଲ୍ଲାପାଳଙ୍କୁ ପଚାରିବାରୁ ସେ କ୍ୟାମେରା ସାମ୍ନାରେ କିଛି କହିନଥିଲେ ମଧ୍ୟ ପ୍ରଶାସନିକ ଟିମ୍ ଯାଇ ଲୋକଙ୍କୁ ସଚେତନ କରିବ ବୋଲି କହିଛନ୍ତି ।
