ସୁନ୍ଦରଗଡ଼: ସୁନ୍ଦରଗଡ଼ ହେମଗିରି ଗଏକନପାଲି ନିକଟରେ ଦୁର୍ଘଟଣାରେ ୫ ଜଣଙ୍କ ମୃତ୍ୟୁ ଘଟଣା। ୨୪ ଘଣ୍ଟା ପରେ ହଟିଲା ରାସ୍ତାରୋକ। ଦୁର୍ଘଟଣାରେ ୫ ଜଣଙ୍କ ମୃତ୍ୟୁ ହୋଇଥିବା ବେଳେ ୬ ଜଣ ଗୁରୁତର ହୋଇଥିଲେ। ହେମଗିରି ତହସିଲଦାରଙ୍କ ଲିଖିତ ପ୍ରତିଶୃତି ପରେ ଆନ୍ଦୋଳନରୁ ଓହରିଥିଲେ ଉତ୍ତ୍ଯକ୍ତ ଲୋକେ। ଗାଁ ଲୋକଙ୍କ ସହ ସୁନ୍ଦରଗଡ଼ ସଦର ଏସଡିପିଓ, ହେମଗିରି ବିଡିଓ ଏବଂ ତହସିଲଦାରଙ୍କ ଆଲୋଚନା ପରେ ଦାବି ପୂରଣ ନେଇ ପ୍ରତିଶୃତି ଦେଇଥିଲେ। ପ୍ରମୁଖ ଦାବି ଗୁଡ଼ିକ ମଧ୍ୟରେ କୋଇଲା ପରିବହନ ପାଇଁ ସ୍ବତନ୍ତ୍ର କୋଲ କରିଡ଼ର ନିର୍ମାଣ, ଦୁର୍ଘଟଣାରେ ପ୍ରାଣ ହରାଉଥିବା ବ୍ୟକ୍ତିଙ୍କ ପରିବାରକୁ ସହାୟତା ରାଶି ୪ ଲକ୍ଷ ବଦଳରେ ୫୦ ଲକ୍ଷ ପ୍ରଦାନ, ଦୁର୍ଘଟଣାରେ ପ୍ରାଣ ହରାଉଥିବା ପରିବାରର ଜଣେ ବ୍ୟକ୍ତିଙ୍କୁ ଯୋଗ୍ୟତା ଭିତ୍ତିରେ ନିଯୁକ୍ତି ପ୍ରଦାନ, ବ୍ରେକ ଡାଉନ୍ ଗାଡ଼ି ଗୁଡ଼ିକୁ ରାସ୍ତାରେ ୧ ଘଣ୍ଟାରେ ହଟାଇବା ପାଇଁ କ୍ରେନ୍ ବ୍ୟବସ୍ଥା , ଏମସିଏଲ୍ ପକ୍ଷରୁ ରାସ୍ତାରେ ସୁକ୍ୟୁରିଟି ଗାର୍ଡ ନିଯୁକ୍ତି ଏବଂ ଗାଡ଼ି ମାଲିକ ସଂଘ ମାନଙ୍କ ପକ୍ଷରୁ ସହାୟତା ରାଶି ୩ ଲକ୍ଷ ଲେଖାଏଁ ପ୍ରଦାନ ଆଦି ଦାବି ଉପରେ ଆଲୋଚନା ହୋଇଥିଲା। ତହସିଲଦାର ସକାଳ ୯ ଟା ରୁ ୧୦ଟା ୩୦ ଏବଂ ଅପରାହ୍ନ ୪ଟା ରୁ ସଂଧ୍ୟା ୭ ଟା ଯାଏଁ ନୋ ଏଣ୍ଟ୍ରି ରହିବା ପାଇଁ ପ୍ରତିଶ୍ରୁତି ଦେବା ସହ ବାକି ସମସ୍ତ ଦାବି ଗୁଡ଼ିକୁ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଆସନ୍ତା ୧୦ ତାରିଖ ଆଲୋଚନା କରାଯିବ ବୋଲି ଲିଖିତ ପ୍ରତିଶ୍ରୁତି ଦେଇଥିଲେ।
ଏହା ସହିତ ଟ୍ରକ ମାଲିକ ସଂଘ ବିଜି ଏମଏସ ପକ୍ଷରୁ ୧ ଲକ୍ଷ ଟଙ୍କା ଲେଖାଏଁ ମୃତ ବ୍ୟକ୍ତିଙ୍କ ପରିବାରକୁ ପ୍ରଦାନ କରାଯିବା ସହିତ ରେଡକ୍ରସ ପାଣ୍ଠିରୁ ୨୦ ହଜାର ଟଙ୍କା ଲେଖାଏଁ ଅନ୍ତେଷ୍ଟି କ୍ରିୟା ପାଇଁ ପ୍ରଦାନ କରାଯାଇଥିଲା।
