ସୁନ୍ଦରଗଡ଼ ଚୋରା କୋଇଲା ଖଣି ଘଟଣା : ୩ ଦିନରେ ରିପୋର୍ଟ ଦେବାକୁ ନିର୍ଦ୍ଦେଶ ଦେଲେ ଜିଲ୍ଲାପାଳ

ନନ୍ଦିଘୋଷ ବ୍ୟୁରୋ : ସୁନ୍ଦରଗଡ଼ ଚୋରା କୋଇଲା ଖଣିର ତଦନ୍ତ ନିର୍ଦ୍ଦେଶ । ଏହି କୋଇଲା ଖଣିରୁ କୋଲ୍ ୱାସେରିକୁ କୋଇଲା ଯାଉଥିଲା କି? ତାହାରର ପୁଙ୍ଖାନୁପୁଙ୍ଖ ତଦନ୍ତ କରି ରିପୋର୍ଟ ଦେବାକୁ ସୁନ୍ଦରଗଡ଼ ଉପଜିଲ୍ଲାପାଳ, ଡେପୁଟି ଡିରେକ୍ଟର ମାଇନ୍ସ ଓ ହେମଗିରି ତହସିଲଦାରଙ୍କୁ ନିର୍ଦ୍ଦେଶ ଦେଇଛନ୍ତି ସୁନ୍ଦରଗଡ଼ ଜିଲ୍ଲାପାଳ। ତିନି ଦିନ ମଧ୍ୟରେ ତଦନ୍ତ ସାରିବାକୁ କୁହାଯାଇଛି। ତେଲେନଡ଼ିହି ଜଙ୍ଗଲରୁ ଚୋରାରେ ଚାଲିଥିଲା କୋଇଲା ଖନନ ଓ ଚାଲାଣ।

କୋଲ ୱାସେରି ଓ କୋଲ ଡିପୋକୁ କୋଇଲା ଯାଉଥିବା ସନ୍ଦେହ କରାଯାଉଛି। ତେଣୁ ଏହି ଅଂଚଳର ସମସ୍ତ କୋଲ ୱାସେରି ଓ କୋଲ ଡିପୋକୁ ଯାଞ୍ଚ କରିବା ସହ ଷ୍ଟକର ହିସାବ ନେବା ପାଇଁ ନିର୍ଦ୍ଦେଶ ଦିଆଯାଇଛି। ହିସାବରୁ ବେଶୀ କୋଇଲା ବାହାରିଲେ, କଡ଼ା କାର୍ଯ୍ୟାନୁଷ୍ଠାନ ପାଇଁ ନିର୍ଦେଶ ଦେଇଛନ୍ତି ସୁନ୍ଦରଗଡ଼ ଜିଲ୍ଲାପାଳ। ସେପଟେ ପୁଣି ଆକ୍ସନ ମୋଡ୍ ରେ ସୁନ୍ଦରଗଡ଼ ଜିଲ୍ଲା ପ୍ରଶାସନ। ଆଜି ପୁଣି ବେଆଇନ କୋଇଲା ଖଣି ଉପରେ ଚଢ଼ଉ ଚାଲିଛି।

ଗୋପାଳପୁର ପଞ୍ଚାୟତ ରତନସରାରେ ଚଢ଼ାଉ କରିଛି ମିଳିତ ଟିମ୍। ରତନସରାରେ ୧୦ ରୁ ଅଧିକ ବେଆଇନ କୋଇଲା  ଖଣି ଠାବ ହୋଇଛି। ଜିଲ୍ଲାପାଳଙ୍କ କଡ଼ା ନିର୍ଦ୍ଦେଶ ପରେ ଆଜି ପୁଣି ରେଡ୍ କରାଯାଉଛି। ବିପୁଳ ମାତ୍ରାରେ କୋଇଲା ଉତ୍ତୋଳନ ପରେ ଗଚ୍ଛିତ ରଖାଯାଇଛି । ନାଳ କଡ଼ରେ, ରୟତି ଜମିରେ ବି ବେଆଇନ ଭାବେ ଖନନ କରି କୋଇଲା ବାହାର କରାଯାଇଛି। ଜିଲ୍ଲାପାଳଙ୍କ କଡ଼ା ନିର୍ଦ୍ଦେଶ ପରେ ପ୍ରଶାସନ ସଜାଗ ହୋଇଛି ଏବଂ ବେଆଇନ ଖଣି କାରବାରକୁ ସମ୍ପୂର୍ଣ୍ଣ ବନ୍ଦ କରିବା ପାଇଁ ଅଣ୍ଟା ଭିଡ଼ିଛି ।