ସୁଲ୍ଲି ଡିଲ୍ସ ଆପର ମାଷ୍ଟରମାଇଣ୍ଡକୁ ଗିରଫ କଲା ଦିଲ୍ଲୀ ପୋଲିସ
ନୂଆଦିଲ୍ଲୀ: ସାରା ଦେଶରେ ଏବେ ସୁଲ୍ଲି ଡିଲ୍ସ ଆପକୁ ନେଇ ଚର୍ଚ୍ଚା ଜାରି ରହିଛି । ଏହି ମାମଲାରେ ଦିଲ୍ଲୀ ପୋଲିସକୁ ବଡ଼ ସଫଳତା ମିଳିଛି । ସୁଲ୍ଲିଡିଲ୍ସ ଆପ୍ ତିଆରି କରିଥିବା ଅଭିଯୁକ୍ତ ଓଁଙ୍କରେଶ୍ୱର ଠାକୁରଙ୍କୁ ଗିରଫ କରିଛି ଦିଲ୍ଲୀ ପୋଲିସ । ମଧ୍ୟପ୍ରଦେଶରୁ ଓଁଙ୍କରେଶ୍ୱରକୁ ଗିରଫ କରିଛି ଦିଲ୍ଲୀ ପୋଲିସ । ମଧ୍ୟପ୍ରଦେଶର ଇନ୍ଦୋରରୁ ଓଁଙ୍କରେଶ୍ବରକୁ ଗିରଫ କରିଥିଲା ଦିଲ୍ଲୀ ପୋଲିସର ଇଣ୍ଟେଲିଜେନ୍ସ ଫ୍ୟୁଜନ ଆଣ୍ଡ ଷ୍ଟ୍ରାଟେଜିକ ଅପରେସନ ବିଭାଗ । ସୁଲ୍ଲି ଡିଲ୍ସ ଘଟଣାରେ ଏହା ହେଉଛି ପ୍ରଥମ ଗିରଫଦାରୀ । ଗତବର୍ଷ ଲଞ୍ଚ ହୋଇଥିବା ଏହି ଆପ୍ ଜରିଆରେ ଶହ ଶହ ମୁସଲିମ ମହିଳାଙ୍କୁ ଫଟୋ ଅପଲୋଡ କରାଯିବା ସହ ସେମାନଙ୍କୁ ନିଲାମ କରାଯିବ ବୋଲି ସୂଚନା ଦିଆଯାଉଥିଲା ।
କେବଳ ସୁଲ୍ଲି ଡିଲ୍ସ ନୁହେଁ ବୁଲ୍ଲିବାଇ ଆପ୍ ଜରିଆରେ ମଧ୍ୟ ମହିଳାଙ୍କ ଫଟୋ ଅପଲୋଡ କରାଯିବା ପରେ ଦେଶବ୍ୟାପୀ ପ୍ରତିବାଦ ହୋଇଥିଲା । ତେବେ ସୁଲ୍ଲି ଡିଲ୍ ଆପ କ୍ରିଏଟର୍ସକୁ ଗିରଫ କରିବା ପରେ ଦିଲ୍ଲୀ ପୋଲିସ ଡେପୁଟି କମିଶନର କେ.ପି.ଏସ. ମାଲହୋତ୍ରା କହିଛନ୍ତି କି ସୁଲ୍ଲି ଡିଲ୍ସ ଆପ୍ର ମାଷ୍ଟରମାଇଣ୍ଟ ଓଁଙ୍କରେଶ୍ୱରକୁ ଗିରଫ କରାଯିବା ପରେ ତାକୁ ଜେରା କରାଯିବ । ଓଁଙ୍କରେଶ୍ୱରର ବୟସ ୨୬ ବର୍ଷ ଓ ସେ ଇନ୍ଦୋରର ନ୍ୟୁୟର୍କ ସିଟି ଟାଉନସିପର ବାସିନ୍ଦା । ସେପଟେ ବୁଲ୍ଲିବାଇ ଆପ୍ର ମୁଖ୍ୟ ଅଭିଯୁକ୍ତ ନୀରଜ ବିଷ୍ଣୋଇ ଆତ୍ମହତ୍ୟା କରିବାକୁ ଧମକ ଦେଇଛି । ଏପରିକି ସେ ଇତିମଧ୍ୟରେ ଦୁଇ ଥର ନିଜକୁ କ୍ଷତାକ୍ତ କରିବା ଲାଗି ଉଦ୍ୟମ କରିଛି ବୋଲି ଦିଲ୍ଲୀ ପୋଲିସ କହିଛି । ବୁଲ୍ଲିବାଇ ଆପକୁ ନେଇ ଅଭିଯୋଗ ଆସିବା ପରେ ତାକୁ ଗିରଫ କରିଥିଲା ମୁମ୍ବାଇ ପୋଲିସ । ୨୧ ବର୍ଷ ଅଭିଯୁକ୍ତ ନୀରଜକୁ ଆସାମର ଜୋରହାଟରୁ ଗିରଫ କରିଥିଲା ଦିଲ୍ଲୀ ପୋଲିସ । ବୁଲ୍ଲିବାଇ ଆପ୍ ମାମଲାରେ ବର୍ତ୍ତମାନ ସୁଦ୍ଧା ୪ ଜଣଙ୍କୁ ଗିରଫ କରାଯାଇଛି ।
