କ୍ୱାରେଣ୍ଟାଇନକୁ ମହାପ୍ରଭୁଙ୍କ ଅଣସର ସହ କାହିଁକି ତୁଳନା କଲେ ସୁବ୍ରତ ବାଗଚୀ ?

ଭୁବନେଶ୍ୱର: ଭୟ ନୁହେଁ ସଚେତନତା ହିଁ କରୋନା ସଂକ୍ରମଣରୁ ରକ୍ଷା କରିବ । ତେବେ, ସଂଘବଦ୍ଧ ନୁହେଁ ସଂଘରୋଧ ହେଲେ ହିଁ ମହାମାରୀ କରୋନାକୁ ରୋକିହେବ । ଏଥିପାଇଁ ମହାପ୍ରଭୁ ସ୍ନାନଯାତ୍ରା ପରେ ଅଣସର ଘରକୁ ଗଲା ଭଳି ଆମକୁ କ୍ୱାରେଣ୍ଟାଇନରେ ରହିବାକୁ ପଡ଼ିବ । ଅଣସରରେ ରହିଲେ ହିଁ ଆମେ କରୋନା ସଂକ୍ରମଣକୁ ରୋକି ପାରିବା ବୋଲି କରୋନା ମୁକାବିଲା କମିଟିର ମୁଖପାତ୍ର ସୁବ୍ରତ ବାଗଚୀ କହିଛନ୍ତି ।ଶୁକ୍ରବାର ଅପରାହ୍ଣ ୨ଟା ସୁଦ୍ଧା https://covid19.odisha.gov.in/ ପୋର୍ଟାଲରେ ମୋଟ ୨୧୩୧ ଜଣ ପଞ୍ଜିକରଣ କରିଛନ୍ତି । ସବୁଠୁ ଅଧିକ ଲୋକ ଦୁବାଇରୁ ଓଡ଼ିଶା ଫେରୁଥିବା ସୁବ୍ରତ ବାଗଚୀ ସୂଚନା ଦେଇଛନ୍ତି । ତେବେ, କରୋନାର ଜନ୍ମସ୍ଥଳୀ ଚୀନରୁ କେହି ଓଡ଼ିଆ ଆସୁନଥିବା ସେ ସୂଚନା ଦେଇଛନ୍ତି । ଖୋର୍ଦ୍ଧା ଜିଲ୍ଲାରୁ ସର୍ବାଧିକ ୩୭% ଲୋକ ବିଦେଶରୁ ଫେରିବା ପାଇଁ ପଞ୍ଜିକରଣ କରିଛନ୍ତି । ମାଲକାନଗିରି ଜିଲ୍ଲାରୁ କେହି ପଞ୍ଜିକରଣ କରିନାହାନ୍ତି ।

କରୋନା ମୁକାବିଲା ଦିଗରେ ସରକାରଙ୍କୁ ସହଯୋଗ ଲାଗି ପୁରୀ ଗଜପତିଙ୍କ ଅପିଲ୍

ସମ୍ଭାବ୍ୟ ସଂକ୍ରମଣ ରୋକିବାକୁ ଆମକୁ ସାମାଜିକ ଦୂରତା ରକ୍ଷା କରିବାକୁ ପଡ଼ିବ । ସଂଘବଦ୍ଧ ନହୋଇ ସଂଘରୋଧ ହୋଇ ରହିଲେ କରୋନା ସହ ଲଢ଼ିହେବ । ତେବେ, ସମସ୍ତେ ମାସ୍କ ପିନ୍ଧିବା ଦରକାର ନାହିଁ । ସୁସ୍ଥ ଲୋକଙ୍କୁ ମାସ୍କର କୌଣସି ଆବଶ୍ୟକତା ନାହିଁ । ଜ୍ୱର, କାଶ ହେଉଥିଲେ ମାସ୍କ ବ୍ୟବହାର କରିବାକୁ ସୁବ୍ରତ ବାଗଚୀ କହିଛନ୍ତି । ସାନିଟାଇଜର ନଥିଲେ ସାବୁନରେ ହାତ ସଫା କରିବାକୁ ସେ ପରାମର୍ଶ ଦେଇଛନ୍ତି ।

ମନ୍ଦିର, ମସଜିଦ୍, ଗୀର୍ଜା ଭଳି ଧାର୍ମିକ ସ୍ଥଳୀରେ ଜନସମାଗମ ନିୟନ୍ତ୍ରଣ ପାଇଁ ସରକାର ଉପଦେଶାବଳୀ ଜାରି କରିଛନ୍ତି । ଧାର୍ମିକ ସ୍ଥଳୀଗୁଡ଼ିକ ଆଡଭାଇଜରିକୁ ମାନିବାକୁ ପଡ଼ିବ । ଆଡଭାଇଜରି ଅନୁସାରେ ପଦକ୍ଷେପ ନେଇ ନପାରିଲେ ଜନସମାଗମ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଥିବା ସେ କହିଛନ୍ତି ।