ଅନୁଗୁଳରୁ ଅନ୍ତରୀକ୍ଷ ଚିନ୍ତା, ବ୍ୟାଗ ବିକାଳିଙ୍କ ପୁଅକୁ ନାସା ଟିକେଟ୍

ଦୃଢ ଇଚ୍ଛାଶକ୍ତି ଥିଲେ ଉପାୟ ଆପେ ଆପେ ଆସିଥାଏ । ଆଉ ସମସ୍ତ ପ୍ରତିବନ୍ଧକ ମଧ୍ୟ ହାର ମାନି ଯାଏ । ଏ କଥାକୁ ପ୍ରମାଣିତ କରିଛନ୍ତି ଅନୁଗୁଳର ପୁଅ ଶୁଭ୍ରାଂଶୁ । ଜଣେ ବ୍ୟାଗ ବିକାଳିଙ୍କ ପୁଅ ହୋଇ ମଧ୍ୟ କଠିନ ପରିଶ୍ରମ ଓ ଅଧ୍ୟବସାୟ ବଳରେ ଏକ ପ୍ରକଳ୍ପ ତିଆରି କରିଛନ୍ତି । ଏହି ପ୍ରକଳ୍ପ ପାଇଁ ତାଙ୍କୁ ନାସା ବୈଜ୍ଞାନିକଙ୍କ ପ୍ରସଂଶାର ପାତ୍ର ହେବା ସହ ନାସା ବୈଜ୍ଞାନିକ ହେବାର ମୂଳଦୁଆ ପକାଇଛନ୍ତି ।

ଅନୁଗୋଳ ସହର ଉପକଣ୍ଠ ହୁଲୁରିସିଂହାର ଲକ୍ଷ୍ମଣ ନାୟକ ଓ ମାଆ ସୁଲୋଚନା ନାୟକଙ୍କ ଏକ ମାତ୍ର ପୁଅ  ଶୁଭ୍ରାଂଶୁ । ଲକ୍ଷ୍ମଣ ଜଣେ ବ୍ୟାଗ ବିକାଳି । ଯେ କି ନିଜେ ବ୍ୟାଗ ତିଆରି କରି ବଜାରରେ ବିକ୍ରି କରନ୍ତି । ଏଥିରୁ ଯାହା ରୋଜଗାର ହୁଏ ସେଥିରେ ଚଳିଥାଏ ୩ ପ୍ରାଣୀଙ୍କ ତେଲ ଲୁଣର ସଂସାର । ହେଲେ ପୁଅ ଶୁଭ୍ରାଂଶୁର ସ୍ଵପ୍ନ ବୈଜ୍ଞାନିକ ହେବା । ଆଉ ପୁଅର ଏହି ସ୍ଵପ୍ନ ପାଇଁ ଯଥାସମ୍ଭବ ଚେଷ୍ଟା ମଧ୍ୟ କରନ୍ତି ଲକ୍ଷ୍ମଣ । ଶୁଭ୍ରାଂଶୁ ଅନୁଗୋଳ ଗାନ୍ଧୀ-ମାର୍ଗସ୍ଥିତ ସରସ୍ଵତୀ ଶିଶୁ ବିଦ୍ୟା ମନ୍ଦିରରେ ପାଠ ପଢନ୍ତି । ବର୍ଷେ ତଳେ ସ୍କୁଲରେ ଆରମ୍ଭ ହୋଇଥିଲା ଅଟଳ ଟିଙ୍କରିଙ୍କ ଲ୍ୟାବ ।

ଆଉ ଏହା ପାଇଁ ଶୁଭ୍ରାଂଶୁ ୬୫ ହଜାର ଟଙ୍କା ଖର୍ଚ୍ଚକରି ନିର୍ମାଣ କରିଥିଲେ ପ୍ରକଳ୍ପ “ମାଭିକ”। ଏହା ଦ୍ୱାରା ଆକାଶ ମାର୍ଗରେ ଯାଇ ଦୁର୍ଗମ ଅଞ୍ଚଳ ଓ ଦୁର୍ଘଟଣାଗ୍ରସ୍ତ ଲୋକଙ୍କ ପାଖରେ ପହଞ୍ଚି ପ୍ରାଥମିକ ଚିକିତ୍ସା ଯୋଗାଇ ଦିଆଯାଇପାରିବ । ସବୁ ସ୍ଥାନକୁ ଡାକ୍ତର କିମ୍ବା ଆମ୍ବୁଲାନ୍ସ ଯିବା ସମ୍ଭବ ହେଉନଥିବା ବେଳେ “ମାଭିକ” ଫାଷ୍ଟଏଡ୍ ଧରି ଘଟଣାସ୍ଥଳରେ ପହଞ୍ଚିଯିବ । କ୍ୟାମେରା ସହାୟତାରେ ଡାକ୍ତରଙ୍କ ସହ ଯୋଗାଯୋଗ କରି ପରାମର୍ଶ ନେଇ ହେବ । ଏଭଳି ଏକ ଯନ୍ତ୍ର ତିଆରି କରି ଶୁଭ୍ରାଂଶୁ ନାସା ପ୍ରତିଯୋଗୀତା ପାଇଁ ମନୋନୀତ ହୋଇଛନ୍ତି ।

ଛୋଟ ଛୋଟ ପିଲାଙ୍କ ଦେହ ସାମାନ୍ୟ ଅସୁସ୍ଥ ହେଲେ ସେମାନେ ସ୍କୁଲ ନଯାଇ ଘରେ କାର୍ଟୁନ କିମ୍ବା ମୋବାଇଲରେ ଗେମ ଖେଳିଥାନ୍ତି । କିନ୍ତୁ ଶୁଭ୍ରାଂଶୁ ଥିଲେ ଏ ସବୁଠୁ ଅଲଗା । ଗତବର୍ଷ ପଡି ଯିବାରୁ ହାତ ଭାଙ୍ଗି ଯାଇଥିଲା । ହେଲେ ଘରେ ବସି କାର୍ଟୁନ କିମ୍ବା ଗେମ ନଖେଳି ‘ମାଭିକ’ ନିର୍ମାଣ ରେ ଲାଗି ପଡିଥିଲେ । ବାପା ଏଥିପାଇଁ ଏକ ଲ୍ୟାପଟପ ଓ କିଛି ଉପକରଣ ମଧ୍ୟ ଯୋଗାଇ ଦେଇଥିଲେ । ପ୍ରାୟ ୩ ମାସ ପରିଶ୍ରମ କରିଥିଲେ ଶୁଭ୍ରାଂଶୁ । ଦିନ ରାତି ଏକ କରି ତିଆରି କରିଥିଲେ ‘ମାଭିକ’ । ଏହି ପ୍ରକଳ୍ପ ନିର୍ମାଣରେ ବିଜ୍ଞାନ ଶିକ୍ଷକ ସୌମେନ୍ଦ୍ର ଡାଙ୍ଗଙ୍କର ଥିଲା ପ୍ରୋତ୍ସାହନ । ଆଉ ଏହି ପ୍ରକଳ୍ପ ନିର୍ମାଣ କରି ସାରିବା ପରେ ନାସାର ୱେବସାଇଟରେ ଅପଲୋଡ କରିଥିଲେ ।

ଶୁଭ୍ରାଂଶୁଙ୍କ ଏହି ପ୍ରକଳ୍ପ ଦେଖି ନାସା ବୈଜ୍ଞାନିକଙ୍କୁ ଆଚମ୍ବିତ କରିବା ସହ ନାସା ପକ୍ଷରୁ ଚିଠି ଆସିଥିଲା । ଯେଉଁଥିରେ ସେ ବିଶ୍ଵର ହଜାର ହଜାର ପିଲାଙ୍କୁ ପଛରେ ପକାଇ ତୃତୀୟ ସ୍ଥାନ ଅଧିକାର କରିଥିଲେ । ଆଉ ନାସାରୁ ଡାକରା ଆସିବା ପରେ ଏହି ପ୍ରକଳ୍ପକୁ ଅଧିକା ବିକଶିତ କରିବାରେ ଲାଗି ପଡିଛନ୍ତି ଶୁଭ୍ରାଂଶୁ । ଆଉ ଶୁଭ୍ରାଂଶୁଙ୍କ ଏହି ସଫଳତା ପରେ ସ୍କୁଲ ଠାରୁ ଆରମ୍ଭ କରି ସାହି ପଡ଼ିଶା ବେଶ ଗର୍ବିତ । ତେବେ ସମସ୍ତଙ୍କ ଠାରୁ ଅଧିକ ଖୁସି ଅଛନ୍ତି ପରିବାର ଲୋକ ।

ନାସା ପ୍ରତିଯୋଗିତାରେ ଭାଗ ନେବାର ସୁଯୋଗ ପରେ ମନୋବଳ ବଢିଛି ଶୁଭ୍ରାଂଶୁଙ୍କର । ଶତ ପ୍ରତିଶତ ପ୍ରଦର୍ଶନ ଦେଇ ପ୍ରଥମ ସ୍ଥାନ ଅଧିକାର କରିବା ଲକ୍ଷ୍ୟ ରଖିବା ସହ ତାଙ୍କ ଏହି ‘ମାଭିକ’ ସଫଳତା ହାସଲ କଲେ ଲୋକଙ୍କ ହିତରେ ଲାଗି ପାରିବ ବୋଲି ଆଶା ରଖିଛନ୍ତି ଶୁଭ୍ରାଂଶୁ । ')}

Leave a Reply

Your email address will not be published.