ଭୁବନେଶ୍ବର : ବାଜିଲା ବିଗୁଲ, କମ୍ପିଲା କ୍ୟାମ୍ପସ । ସରଗରମ କଲେଜ ରାଜନୀତି । ଆସନ୍ତା ୧୫ ତାରିଖରେ ଛାତ୍ର ସଂସଦ ନିର୍ବାଚନ । ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଭେଟିବା ପରେ ଛାତ୍ର ସଂସଦ ନିର୍ବାଚନ ନେଇ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ତାରିଖ ଘୋଷଣା କରିଛନ୍ତି । ଏହାସହ ନିର୍ବାଚନ ହେବା ନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି । ଯେଉଁଥିରେ ୧୦ ଦିନ ଭିତରେ ନିର୍ବାଚନ ସରିବ ବୋଲି ଉଲ୍ଲେଖ ରହିଛି । ନିର୍ବାଚନ ନେଇ ଅକ୍ଟୋବର ୭ ତାରିଖରେ ବାହାରିବ ବିଜ୍ଞପ୍ତି । ୯ ତାରିଖରେ ନାମାଙ୍କନ ଦାଖଲ ପାଇଁ ତାରିଖ ଧାର୍ଯ୍ୟ ହୋଇଛି । ୯ ତାରିଖ ଦିନ ୧୦ଟାରୁ ଗୋଟାଏ ଭିତରେ ପ୍ରାର୍ଥୀମାନେ ନାମାଙ୍କନ ଦାଖଲ କରିପାରିବେ । ସେହିଦିନ ଅପରାହ୍ଣ ୨ଟାରୁ ୪ଟା ଭିତରେ ନାମାଙ୍କନ ଯାଞ୍ଚ ସରିବ । ୫ଟାରେ ବୈଧ ନାମାଙ୍କନ ପ୍ରକାଶ ପାଇବ । ସେହିପରି ୧୦ ତାରିଖ ନାମାଙ୍କନ ପ୍ରତ୍ୟାହାର ଦିବସ ରହିଥିବାବେଳେ ଦିନ ୧୦ରୁ ଗୋଟାଏ ପର୍ଯ୍ୟନ୍ତ ନାମାଙ୍କନ ପ୍ରତ୍ୟାହାର ସମୟ ରହିଛି । ସେହି ୧୦ ତାରିଖ ଅପରାହ୍ନ ୩ଟାରେ ପ୍ରକାଶ ପାଇବ ଚୂଡାନ୍ତ ପ୍ରାର୍ଥୀ ତାଲିକା । ୧୪ ତାରିଖରେ ହ୍ବାଏ ଆଇ ଷ୍ଟାଣ୍ଡ ଫର ମିଟିଂ ଅନୁଷ୍ଠିତ ହେବ । ୧୫ ତାରିଖରେ ନିର୍ବାଚନ ସକାଳ ୮ଟାରୁ ଦିନ ଦୁଇଟା ପର୍ଯ୍ୟନ୍ତ ଭୋଟଗ୍ରହଣ ଚାଲିବ । ଭୋଟଗ୍ରହଣ ସରିବା ପରେ କାଉଣ୍ଟିଂ କରାଯାଇ ଫଳାଫଳ ପ୍ରକାଶ ପାଇବ । ୧୬ ତାରିଖରେ ଶପଥ ଗ୍ରହଣ ଉତ୍ସବ ଅନୁଷ୍ଠିତ ହେବ । ରାଜ୍ୟର ସବୁ କଲେଜରେ ନିର୍ବାଚନ ହେବାକୁ ଯାଉଛି । ନିର୍ବାଚନ ଶାନ୍ତି ଶୃଙ୍ଖଳାର ସହ ସାରିବାକୁ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଅପିଲ କରିଛନ୍ତି ।…
